ຕາມການລາຍງານ ຈາກນັກຂ່າວເມືອງວິລະບູລີ ແຂວງສະຫວັນນະເຂດໃຫ້ຮູ້ວ່າ: ນັບເປັນຮອບທີສອງຂອງສົກປີ 2017-2018 ນີ້ ທີ່ເມືອງວິລະບູລີ ໄດ້ພົບ ກັບ ໄພພິບັດນ້ຳຖ້ວມ ໃນໄລຍະເວລາໄລ່ເລຍກັນ ຝົນຕົກໜັກແກ່ຍາວເປັນເວລາດົນ ໄດ້ເຮັດໃຫ້ລະດັບນ້ຳເຊນ້ອຍ, ເຊບາຍ, ເຊກອກ ແລະ ສາຍຫ້ວຍຕ່າງໆ ໄດ້ເພີ່ມ ລະດັບຂຶ້ນຢ່າງໄວວາ ນ້ຳໄດ້ໄຫລລົ້ນຝັ່ງ ເຂົ້າຖ້ວມເນື້ອທີ່ທຳການຜະລິດ ແລະ ເຮືອນຊານຂອງພໍ່ແມ່ປະຊາ ຊົນ, ເສັ້ນທາງຫລາຍເສັ້ນຖືກນ້ຳໄຫລຜ່ານ, ນ້ຳຖ້ວມຂັງ ແລະ ຖືກຕັດຂາດຈາກການສັນຈອນ ໂດຍສະເພາະແມ່ນ ເສັ້ນທາງ 28A.
ປັດຈຸບັນ ໃນວັນທີ 13 ກໍລະກົດ 2018 ເຫັນວ່າ ລະດັບນ້ຳເຊກອກ ແມ່ນເພີ່ມລະດັບຂຶ້ນໄວ ແລະ ຕໍ່ເນື່ອງ, ເຊິ່ງວັດແທກໄດ້ 9 ແມັດ 90 ຊັງຕີແມັດ ເຫັນວ່າກາຍ ຂີດອັດຕະລາຍແລ້ວ ແລະ ລະດັບນ້ຳເຊ ຍັງຄົງເພີ່ມຂຶ້ນເລື້ອຍໆ ໄດ້ສົ່ງຜົນເຮັດໃຫ້ນ້ຳໄຫລເຂົ້າຖ້ວມເສັ້ນທາງ 28A ລວມມີທັງໝົດ 16 ຈຸດ ນັບແຕ່ທາງເຂົ້ານາບໍ່ ຫາ ເມືອງວິລະບູລີ ເຮັດໃຫ້ເສັ້ນທາງຖືກຕັດຂາດ, ພ້ອມນີ້ ກໍເລີ່ມໄຫລເຂົ້າຖ້ວມບ້ານເຮືອນ ຂອງປະຊາຊົນໃນຫລາຍບ້ານ.
ຕໍ່ສະພາບການດັ່ງກ່າວ, ພາກສ່ວນກ່ຽວຂ້ອງຂອງເມືອງກໍໄດ້ແຈ້ງເຕືອນ ເຖິງພໍ່ແມ່ປະຊາຊົນບັນດາເຜົ່າ, ອຳນາດການປົກຄອງ ແລະ ອົງການຈັດຕັ້ງທຸກ ພາກ ສ່ວນ ທີ່ອາໄສຢູ່ລຽບຕາມສາຍເຊນ້ອຍ, ເຊບາຍ, ເຊກອກ ແລະ ສາຍຫວ້ຍຕ່າງໆ ຈົ່ງມີສະຕິ ແລະ ກຽມພ້ອມຮັບມືກັບສະພາບຝົນຕົກໜັກ, ເຊິ່ງຈະເຮັດໃຫ້ມີ ຕົ້ນ ໄມ້ ຫັກ ລົ້ມ, ດິນເຈື່ອນ, ນ້ຳຖ້ວມຂັງ, ນ້ຳຖ້ວມອັ່ງ ແລະ ລົມພັດແຮງ ພ້ອມນີ້ຂໍໃຫ້ເກັບມ້ຽນ ແລະ ເຄື່ອນຍ້າຍວັດຖຸສິ່ງຂອງ ພ້ອມສັດລ້ຽງໄປໄວ້ບ່ອນສູງ ແລະ ປອດໄພ ພ້ອມ ນັ້ນ ກໍຂໍໃຫ້ຕິດຕາມຂ່າວພະຍາກອນອາກາດ ແລະ ລະດັບນ້ຳຈາກກົມອຸຕຸນິຍົມ ແລະ ອຸທົກກະສາດ ເປັນປະຈຳແຕ່ລະໄລຍະ.