ກະະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມປຶກສາຫາລື ກ່ຽວກັບການຈັດຕັ້ງປະຕິບັດຄຳສັ່ງ ຂອງ ທ່ານນາຍົກລັດຖະມົນຕີ ວ່າດ້ວຍການປັບປຸງ ບັນດາລະບຽບການ ແລະ ກົນໄກການປະສານງານ ການດຳເນີນທຸລະກິດ ຢູ່ ສປປ ລາວ ໂດຍການເປັນປະທານຂອງ ທ່ານ ບຸນມີ ມະນີວົງ ຮອງລັດຖະມົນຕີກະຊວງ ອຸດສາຫະກຳ ແລະ ການຄ້າ, ມີບັນດາຫົວໜ້າກົມ, ຮອງກົມ, ພ້ອມດ້ວຍຜູ້ຕາງໜ້າ ຈາກແໜງການທີ່ກ່ຽວຂ້ອງ ເຂົ້າຮ່ວມ.
ການຈັດກອງປະຊຸມໃນຄັ້ງນີ້, ແກ້ໄຂບັນຫາທີ່ຕິດພັນ ກັບ ໝວດຕົວຊີ້ວັດທີ 8 ການຄ້າຂ້າມແດນ, ເຊິ່ງເປັນວຽກງານໜຶ່ງ ທີ່ຕິດພັນກັບຫລາຍຂະແໜງການທີ່ກ່ຽວຂ້ອງ,ປຶກສາຫາລື ເພື່ອວາງທິດທາງແຜນການ ຈັດຕັ້ງປະຕິບັດ ໃນຕໍ່ໜ້າ ໂດຍສຸມໃສ່ການປັບປຸງຂອດຂັ້ນ ຫລື ຕັດຂັ້ນຂອດທີ່ບໍ່ຈຳເປັນ ເພື່ອຫລຸດຜ່ອນເວລາ ແລະ ຄ່າໃຊ້ຈ່າຍໃນການດຳເນີນການນຳເຂົ້າ ແລະ ສົ່ງອອກ, ເຊິ່ງຕິດພັນກັບຂອດ ການອະນຸມັດ ຂອງຫລາຍຂະແໜງການ ພ້ອມທັງ ປັບປຸງຂອດການປະສານງານ ລະຫວ່າງຂະແໜງການ ເພື່ອເຮັດໃຫ້ມີຄວາມວ່ອງໄວ ແລະ ມີປະສິດທິພາບ.
ໃນໄລຍະ 6 ເດືອນຜ່ານມາ ກະຊວງອຸດສາຫະກຳ ແລະ ການຄ້າ ໄດ້ສຸມໃສ່ສ້າງກົນໄກ ການຈັດຕັ້ງປະຕິບັດ ຕົວຊີ້ວັດການຄ້າຂ້າມແດນ ເຊິ່ງເຫັນໄດ້ຈາກ ຄະນະກຳມະການຊີ້ນຳລວມອຳນວຍຄວາມສະດວກ ທາງດ້ານການຄ້າ ໄດ້ຖືກແຕ່ງຕັ້ງຂຶ້ນ ແນໃສ່ເພີ່ມທະວີກົນໄກ ການປະສານງານລະຫວ່າງ ຂະແໜງການທີ່ກ່ຽວຂ້ອງ ທັງຢູ່ສູນກາງ ແລະ ທ້ອງຖິ່ນ, ທັງເປັນກົນໄກໃນການແກ້ໄຂບັນຫາ ແລະ ຂໍ້ຫຍຸງຍາກ ໃນການດຳເນີນທຸລະກິດ ນຳເຂົ້າ-ສົ່ງອອກ ໃນຂອບເຂດທົ່ວປະເທດໃຫ້ເປັນເອກະພາບ.
ທິດທາງແຜນການໃນຕໍ່ໜ້າ ແມ່ນສືບຕໍ່ເປັນເຈົ້າການ ໃນການຈັດຕັ້ງປະຕິບັດວຽກງານ ອຳນວຍຄວາມສະດວກ ທາງດ້ານການຄ້າຂ້າມແດນ, ໂດຍການປະສານສົມທົົບກັບ ຂະແໜງການທີ່ກ່ຽວຂ້ອງ ຄື ການເລັ່ງປັບປຸງ, ແກ້ໄຂຂະບວນການ, ຂັ້ນຕອນ ການອະນຸຍາດນໍາເຂົ້າ-ສົ່ງອອກ ໃຫ້ຫລຸດລົງ ຢ່າງໜ້ອຍ 50% ໃນປີ 2019, ພ້ອມທັງ ໃຫ້ສຳເລັດ ການສ້າງ ແລະ ປະກອບ ຄະນະກຳມະການຊີ້ນຳລວມອຳນວຍຄວາມສະດວກທາງດ້ານການຄ້າ ຂັ້ນສູນກາງ ແລະ ທ້ອງຖິ່່ນ ໃຫ້ສົມບູນ.
Cr.KPL
Hits: 2
