ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ໄດ້ຕັ້ງໜ້າຊີ້ນຳຂົງເຂດສື່ມວນຊົນ ສຸມໃສ່ໂຄສະນາເຫດການຕ່າງໆທີ່ເກີດຂຶ້ນຢູ່ພາຍໃນ ແລະ ຕ່າງປະເທດ ເປັນຕົ້ນ ໄພພິບັດນ້ຳຖ້ວມທີ່ເກີດຂຶ້ນໃນທົ່ວປະເທດ ເພື່ອສ້າງຄວາມເຂົ້າໃຈທີ່ຖືກຕ້ອງໃຫ້ປະຊາຊົນ ຕອບຕ້ານການໂຄສະນາບິດເບືອນ.
ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງ ຖວທ ໃຫ້ຮູ້ວ່າ: ໃນໄລ ຍະ 6 ເດືອນຜ່ານມາ ຂະແໜງຖະແຫຼງຂ່າວ ແລະ ວັດທະນະທຳ ສາມາດຍາດໄດ້ຜົນສຳເລັດຫຼາຍດ້ານ ເປັນຕົ້ນ ດ້ານວຽກງານຖະແຫຼງຂ່າວ ໄດ້ສຸມໃສ່ຮັບໃຊ້ໂຄສະນາເຫດການຕ່າງໆເຊັ່ນ: ວຽກດີຄົນເດັ່ນ ໄພພິບັດທີ່ໄດ້ເກີດຂຶ້ນຢູ່ເມືອງສະ ໜາມໄຊ ແຂວງອັດຕະປື ແລະ ເຫດການໄພນ້ຳຖ້ວມທີ່ເກີດຂຶ້ນຢູ່ແຂວງຕ່າງໆໃນທົ່ວປະເທດ
ພ້ອມນັ້ນ ຍັງໄດ້ໂຄສະນາວິທີການແກ້ໄຂໄພພິບັດນ້ຳຖ້ວມຕ່າງໆ ທັງຜົນສຳເລັດໃນການແກ້ໄຂເຮັດໃຫ້ປະຊາຊົນກັບຄືນມາດຳລົງຊີວິດປົກກະຕິດີຂຶ້ນເທື່ອລະກ້າວ ແລະ ໄດ້ໂຄສະນາອອກຂ່າວກ່ຽວກັບຜູ້ທີ່ມີຈິດໃຈດີ ງາມມາຊ່ວຍເຫຼືອປະຊາຊົນລາວ ໃນເວລາທີ່ພົບຄວາມຫຍຸ້ງຍາກຄືດັ່ງກ່າວນັ້ນ ທັງພາຍໃນ ແລະ ຕ່າງປະເທດ ໄດ້ອອກຂ່າວຢ່າງສະເໝີພາບຕາມຄວາມເປັນຈິງ ແລະ ທີ່ສຳ ຄັນຍັງໄດ້ແກ້ຂ່າວບິດເບືອນບາງອັນກັບຜູ້ທີ່ບໍ່ຫວັງດີ ໂດຍໄດ້ອອກຂ່າວຕ່າງໆກ່ຽວກັບເຫດການທີ່ເກີດຂຶ້ນ ໂດຍອາໄສໄພພິບັດເກີດຂຶ້ນແລ້ວ ເວົ້າໄປໃນທາງທີ່ບໍ່ຖືກຕ້ອງ
ໂດຍສື່ມວນຊົນຂອງພວກເຮົາໄດ້ເພີ່ມທະວີແກ້ຂ່າວຄືນເພື່ອໃຫ້ປະຊາຊົນໄດ້ເຂົ້າໃຈຢ່າງຖືກຕ້ອງຕາມຄວາມເປັນຈິງ ເວົ້າລວມແລ້ວ ໄດ້ຮັບການເຫັນດີເຫັນພ້ອມກັບຜູ້ທີ່ບໍລິ ໂພກຂ່າວຫຼາຍສົມຄວນ ນອກນັ້ນ ໄດ້ສືບຕໍ່ຕິດຕັ້ງໂທລະໂຄ່ງຕາມບ້ານຕ່າງໆທີ່ປະສົບໄພພິບັດນ້ຳຖ້ວມ ຊ່ວຍການປະຊາສຳພັນແຈ້ງຂ່າວເຕືອນໄພຕ່າງໆໄດ້ດີຂຶ້ນ ວິທະຍຸ ໜັງສືພິມ ໂທລະພາບ ໄດ້ມີຫຼາຍພາກສ່ວນລາຍງານພິເສດ ກໍ່ຄື ຄໍລຳພິເສດສຳລັບໂຄສະນາກ່ຽວກັບໄພພິບັດທີ່ເກີດຂຶ້ນ ແລະ ໄດ້ອອກຂ່າວເປັນປະຈຳ ເພື່ອແຈ້ງຂ່າວໃຫ້ປະຊາຊົນໄດ້ຮັບຊາບຢ່າງວ່ອງໄວ ທັນເຫດການ
ນອກຈາກວຽກດັ່ງກ່າວ ຍັງໄດ້ສືບຕໍ່ສ້າງຕັ້ງສະຖານີວິທະຍຸຊຸມຊົນ ຕິດຕັ້ງສະ ຖາ ນີໂທລະ ພາບຢູ່ແຂວງຕ່າງໆ ຕາມແຜນ ການທີ່ປະສົບຜົນສຳເລັດໄດ້ຫັນຈາກດ້ານການນຳໃຊ້ລະບົບເຕັກນິກອັນນາລ໋ອກເປັນດີຈີຕ໋ອນໄປເທື່ອລະກ້າວ ໂດຍໄດ້ທົດລອງຈັດຕັ້ງປະຕິບັດຢູ່ 4 ແຂວງເຫັນໄດ້ວ່າມີຄວາມຄືບໜ້າ ພ້ອມທັງໄດ້ຊຸກຍູ້ໃຫ້ໜັງສືພິມຂະ ຫຍາຍໄປສູ່ຮາກຖານຫຼາຍຂຶ້ນ.
ສ່ວນວຽກງານວັດທະນະທຳ ໄດ້ສືບຕໍ່ສົ່ງເສີມການປົກປັກຮັກສາອະນຸຮັກວັດທະນະທຳຂອງຊາດຂອງປະຊາຊົນບັນ ດາເຜົ່າ ຫຼັງຈາກທີ່ສຽງແຄນລາວໄດ້ຮັບຮອງຈາກອົງການຢູເນັດສະໂກ ໃຫ້ເປັນມໍລະດົກທາງດ້ານວັດທະນະທຳ ນາມມະທຳຂອງມວນມະນຸດໃນໂລກ ໂດຍໄດ້ໂຄສະນາຢ່າງກວ້າງຂວາງ ເຮັດໃຫ້ປະຊາຊົນພາກພູມໃຈໃນມູນ ເຊື້ອວັດທະນະທຳຂອງຕົນເອງ ແລະສືບຕໍ່ສະເໜີໂຄງ ການຕ່າງໆໄປຫາອົງການຢູເນັດສະໂກ ເພື່ອຈະໄດ້ຮັບຮອງເອົາເປັນມໍລະດົກໂລກເຊັ່ນ: ທົ່ງໄຫຫີນ ເຂດພູຫີນໜາມໜໍ່ ແລະ ມໍລະດົກທາງວັດທະນະທຳນາມມະທຳຈຳນວນໜຶ່ງ ປັດຈຸບັນ ໄດ້ປະກອບເອກະສານສົ່ງຫາອົງການດັ່ງ ກ່າວເປັນທີ່ຮຽບຮ້ອຍ
ນອກນັ້ນຍັງໄດ້ເພີ່ມທະວີຍົກລະດັບສິລະປະການສະແດງໃຫ້ດີຂຶ້ນ ໄດ້ນຳໄປສະແດງຢູ່ພາຍໃນ ແລະ ຕ່າງປະເທດ ໃນການໂຄສະນາການທ່ອງ ທ່ຽວເຊັ່ນ: ງານວາງສະແດງການທ່ອງທ່ຽວທີ່ແບກແລັງ ປາຣີ ປະເທດຝຣັ່ງ ໂຮ່ຈີມິງ ສສ ຫວຽດ ນາມ ຊຽງໃໝ່ ປະເທດໄທ ໂຕກຽວ ປະເທດຍີ່ ປຸ່ນ ແລະ ອື່ນໆ
Cr. Vientiane Mai