ເປີດກອງປະຊຸມສຳມະນາວິທະຍາສາດພາຍໃຕ້ຫົວຂໍ້ “ການຄຸ້ມຄອງ, ນຳໃຊ້ ແລະ ພັດທະນາສື່ໃນໄລຍະໃໝ່.
ຕາມໜ້າເພຈຂອງທ່ານ ຮອງ ລມຕ ກະຊວງວິທະຍາສາດ ແລະເຕັກໂນໂລຊີ ໃຫ້ຮູ້ວ່າ:
ໃນວັນທີ 24-25 ກັນຍາ 2018 ໄດ້ເປີດກອງປະຊຸມສຳມະນາວິທະຍາສາດພາຍໃຕ້ຫົວຂໍ້ “ການຄຸ້ມຄອງ, ນຳໃຊ້ ແລະ ພັດທະນາສື່ໃນໄລຍະໃໝ່ຄື:
(ກ). ທັດສະນະຂອງພັກ ແລະ ລັດຖະບານແຫ່ງ ສປປລາວ ກ່ຽວກັບສື່ມວນຊົນ:
(1) ພາຫະນະສື່ມວນຊົນແຫ່ງ ສປປລາວ ແມ່ນເຄື່ອງມືທາງດ້ານການເມືອງ ແລະ ແນວຄິດຂອງບັນດາອົງການຈັດຕັ້ງໃນລະບົບການເມືອງ ເຊີ່ງມີພັກເປັນແກນນຳທີ່ປະກອບມີ: ໜັງສືພິມ, ວາລະສານ, ໃບຂ່າວສານ, ລາຍການກະຈາຍສຽງ, ລາຍການໂທລະພາບ, ລາຍການເບີ່ງ ຟັງ ແລະ ສົນທະນາສະຖານະການ, ໂດຍໄດ້ຮັບການປະຕິບັດດ້ວຍພາຫະນະເຕັກນິກທີ່ແຕກຕ່າງກັນ;
(2) ພາຫະນະສື່ມວນຊົນ ມີບົດບາດສຳຄັນໃນພາລະກິດແຫ່ງການກໍສ້າງ ແລະ ຂະຫຍາຍລະບອບປະຊາທິປະໄຕປະຊາຊົນ ກໍຄືພາລະກິດແຫ່ງການປ່ຽນແປງໃໝ່ຢ່າງຮອບດ້ານ ດັ່ງນີ້:
- ເສີມສ້າງຄວາມສາມະຄີປອງດອງປວງຊົນທັງຊາດ,
- ໂຄສະນາ ປຸກລະດົມ ຊຸກຍູ້ການພັດທະນາສ້າງສາເສດຖະກິດສັງຄົມຂອງປະເທດເຮົາ,
- ຫັນປ່ຽນເສດຖະກິດທຳມະຊາດເປັນເສດຖະກິດສິນຄ້າ,
- ສຶກສາອົບຮົມການເມືອງແນວຄິດ ສ້າງທັດສະນະຫຼັກໝັ້ນ ແລະ ຄວາມເຊື່ອໝັ້ນຕໍ່ອຸດົມຄະຕິ ແລະ ການນຳພາຂອງພັກ,
- ຊຸກຍູ້ ປຸກລະດົມທົ່ວປວງຊົນ ເຮັດໜ້າທີ່ປ້ອງກັນຊາດ ແລະ ປ້ອງກັນຄວາມສະຫງົບ,
- ໂຄສະນາດຶງດູດເອົາການຮ່ວມມື ການຊ່ວຍເຫຼືອ ແລະ ການລົງທຶນຈາກຕ່າງປະເທດ,
- ເສີມຂະຫຍາຍປະຊາທິປະໄຕ ແລະ ຕໍ່ສູ້ຕ້ານກັບປະກົດການຫຍໍ້ທໍ້ຕ່າງໆທີ່ເກີດຂື້ນ ແລະ ອື່ນໆອີກ;
(3) ສື່ມວນຊົນລາວ ຕ້ອງມີລັກສະນະຕໍ່ສູ້, ລັກສະນະສຶກສາອົບຮົມ, ລັກສະນະຈັດຕັ້ງຊີ້ນຳມະຫາຊົນ ແລະ ລັກສະນະຕົວຈີງ;
(4) ໃນການນຳພາຊີ້ນຳ ແລະ ຄຸ້ມຄອງສື່ມວນຊົນ ຕ້ອງເຊື່ອມຊືມກຳແໜ້ນບັນດາທັດສະນະດັ່ງຕໍ່ໄປນີ້: - ສື່ມວນຊົນ ເປັນເຄື່ອງມືອັນແຫຼມຄົມຂອງພັກ ແລະ ລັດຖະບານ,
- ສື່ມວນຊົນ ເປັນເວທີຂອງມະຫາຊົນ ແລະ ເປັນສາຍຜູກພັນລະຫວ່າງມະຫາຊົນ ແລະ ພັກລັດ,
- ສື່ມວນຊົນ ຕ້ອງມີຫຼາຍຮູບຫຼາຍສີ ແລະ ອຸດົມຮັ່ງມີດ້ານເນື້ອໃນ,
- ອົງການ ຂະແໜງການ ພະນັກງານນຳພາຂອງພັກ ແລະ ລັດຂັ້ນຕ່າງໆ ມີຄວາມຮັບຜິດຊອບ ແລະ ຕ້ອງເອົາໃຈໃສ່ຊີ້ນຳ ຊ່ວຍເຫຼືອສື່ມວນຊົນ,
- ຕ້ອງມີນະໂຍບາຍອັນເໝາະສົມຕໍ່ສື່ມວນຊົນ.
(ຂ). ທັດສະນະຂອງໂລກທຶນນິຍົມຕະເວັນຕົກ ໄດ້ໃຫ້ຂໍ້ສະຫຼຸບກ່ຽວກັບບົດບາດວຽກງານສື່ມວນຊົນ ເປັນໜື່ງໃນສີ່ອຳນາດທີ່ມີອິດທິພົນສູງສຸດໃນສັງຄົມຍຸກປັດຈຸບັນ:
(1) ອຳນາດທາງດ້ານການເມືອງ: ປະກອບດ້ວຍອຳນາດຂອງພັກການເມືອງ, ອຳນາດລັດ ແລະ ອຳນາດຂອງປະຊາຊົນ;
(2) ອຳນາດທາງດ້ານເສດຖະກິດ: ແມ່ນການນຳໃຊ້ທ່າແຮງທາງດ້ານເສດຖະກິດ ເພື່ອເຂົ້າແຊກແຊກ, ຂົ່ມຂູ່, ປິດລ້ອມ, ຂວໍ້າບາດ, ບັງຄັບ, ກືນກິນ ແລະ ເອົາປຽບ;
(3) ອຳນາດທາງດ້ານອາວຸດຍຸດໂທປະກອນ: ການດຳເນີນສົງຄາມ, ການຊ່ວງເສັງກັນພັດທະນາອາວຸດຕ່າງໆ ແລະ ການກໍ່ລັດຖະປະຫານ;
(4) ອຳນາດຂອງສື່ມວນຊົນ ໃນທາງທິດສະດີ ແລະ ພຶດຕິກຳຕົວຈິງ: ແມ່ນສາມາດສ້າງຄວາມປັ່ນປ່ວນ, ໂຄ່ນລົ້ມດ້ວຍຖ້ອຍທຳນອງ ໂຈມຕີຜ່ານພາຫະນະສື່ມວນຊົນ, ໃສ່ຮ້າຍປ້າຍສີ, ບິດເບືອນລະບອບການເມືອງ, ແນວທາງ, ໂຄ່ນລົ້ມໂຈມຕີ ແລະ ເຮັດໃຫ້ຜູ້ນຳເສັຍບົດບາດອິດທິພົນ ແລະ ອື່ນໆ.
Cr.Sourioudong Sundara
Hits: 33
