ລັດຖະບານ ຈະສຸມໃສ່ປັບປຸງ ແລະ ແກ້ໄຂ 5 ບັນຫາ ເພື່ອຊຸກຍູ້ສົ່ງເສີມກຳລັງແຮງຂອງບັນດາ ພາກສ່ວນເສດຖະກິດ ໂດຍຮັບປະກັນ ໃຫ້ທຸກພາກສ່ວນ ສາມາດເຄື່ອນໄຫວຢ່າງ ມີຄວາມສະເໝີພາບ ຕໍ່ໜ້າກົດໝາຍຢ່າງແທ້ຈິງ, ທັງມີສະພາບແວດລ້ອມທີ່ອຳນວຍ ໃຫ້ສາມາດເຄື່ອນໄຫວຢ່າງຄ່ອງຕົວ ແລະ ສາມາດປະກອບສ່ວນເຂົ້າ ໃນການຂະຫຍາຍກຳລັງການຜະລິດ, ສ້າງສາປະເທດຊາດ ໄດ້ຢ່າງເໝາະສົມ, ພ້ອມທັງມີຄວາມສາມາດ ແຂ່ງຂັນເພີ່ມຂຶ້ນ ຕາມກົນໄກເສດຖະກິດຕະຫລາດ ກໍຄື ໃນຂະບວນວິວັດແຫ່ງການເຊື່ອມໂຍງສາກົນ.
5 ບັນຫານັ້ນມີ ຫັນພາກທຸລະກິດ, ຜູ້ປະກອບການດ້ານຕ່າງໆ ໃຫ້ເຂົ້າສູ່ ກົດໝາຍ, ພັດທະນາບຸກຄະລາກອນ ແລະ ມີແຜນພັດທະ ນາໃນໄລຍະຍາວ, ສ້າງວັດທະນະທຳທຸລະກິດ, ສ້າງສະພາບແວດລ້ອມ ຫັນປ່ຽນໃໝ່ດ້ານຈິດຕະສາດ ຂອງຜູ້ປະກອບການ ແລະ ສ້າງຄວາມເຂັ້ມແຂງດ້ວຍຕົນເອງ; ຊຸກຍູ້ສົ່ງເສີມນັກທຸລະກິດພາຍໃນ ໃຫ້ດຳເນີນການຮ່ວມມື ແລະ ສຳພັນກັນ ລະຫວ່າງວິສາຫະກິດ ໃນຂະແໜງການດຽວກັນ, ສ້າງກຳລັງຄວາມສາມາດໃນການແຂ່ງຂັນ ລວມທັງຂະຫຍາຍການຮ່ວມມື ແລະ ສຳພັນກັບ ວິສາຫະກິດຂອງຕ່າງປະເທດ ເພື່ອມີທຶນຮອນເພີ່ມຂຶ້ນ, ທັງຍາດແຍ່ງເອົາບົດຮຽນ, ແບບວິທີການຄຸ້ມຄອງທີ່ທັນສະໄໝ, ການນຳໃຊ້ເຕັກໂນໂລຊີໃໝ່ ເພື່ອຍົກມາດຕະຖານ ຄຸນນະພາບຂອງຜະລິດຕະພັນ ແລະ ການບໍລິການຂອງວິສາຫະກິດ ແລະ ສ້າງເຄືອຂ່າຍຕະຫລາດພາຍໃນ ແລະ ຕ່າງປະເທດ ທີ່ໝັ້ນທ່ຽງ ແລະ ກວ້າງອອກຕື່ມ.
ສ້າງ ແລະ ປັບປຸງບັນດານະໂຍບາຍ, ກົນໄກຕ່າງໆຢ່າງເປັນລະບົບ, ຈະແຈ້ງ, ມີຄວາມເຂັ້ມ ແຂງ, ໂປ່ງໃສ ເຮັດໃຫ້ພາກສ່ວນ ເສດຖະກິດຕ່າງໆ ເຄື່ອນໄຫວດຳເນີນທຸລະກິດ ຢ່າງສະເໝີພາບ, ໄດ້ຮັບໂອກາດ ແລະ ການແຂ່ງຂັນທີ່ເປັນທຳ, ພ້ອມທັງເພີ່ມທະວີ ການປະສານສົມທົບ ລະຫວ່າງບັນດາຂະແໜງ ການທີ່ກ່ຽວຂ້ອງຂອງລັດ ເພື່ອຊ່ວຍໃຫ້ການເຄື່ອນໄຫວ ທຸລະກິດຂອງພາກສ່ວນ ເສດຖະກິດຕ່າງໆ ດຳເນີນໄປຢ່າງສະດວກ, ຫລີກເວັ້ນການຊ້ຳຊ້ອນກັນ ແລະ ໂຍນຄວາມຮັບຜິດຊອບໃຫ້ກັນ ເປັນຕົ້ນ ແມ່ນສ້າງສະພາບແວດລ້ອມ ທີ່ເອື້ອອຳນວຍ ໃນການເຂົ້າເຖິງ ແຫລ່ງທຶນດອກເບ້ຍ ຕ່ຳກວ່າປັດຈຸບັນ; ປັບປຸງ ແລະ ກໍ່ສ້າງລະບົບໂຄງລ່າງການຂົນສົ່ງ, ໂທລະຄົມມະນາຄົມ ໃຫ້ສະດວກ ແລະ ທັນສະໄໝ ເພື່ອຫລຸດຜ່ອນຕົ້ນທຶນການຜະລິດ.
Cr.KPL
Hits: 121
