ມື້ນີ້, ທີ່ບ້ານຈັນສະຫວ່າງ ເມືອງສີໂຄດຕະບອງ ນະຄອນຫຼວງວຽງຈັນ, ໄດ້ມີພິທີມອບ-ຮັບໂຄງການຊ່ວຍເຫຼືອລາວ ກ່ຽວກັບ ການປ້ອງກັນ ແລະຄວບຄຸມພະຍາດສັດ ຂ້າມຊາຍແດນລາວ-ຈີນ ຊຶ່ງເປັນໂຄງການຊ່ວຍເຫຼືອລ້າຈາກລັດຖະບານ ສປ ຈີນ ເປັນມູນຄ່າ 39 ລ້ານຢວນ ຫຼື ປະມານ 6 ລ້ານໂດລາ.
ໂຄງການນີ້ ມີຈຸດປະສົງເພື່ອເພີ່ມທະວີການຮ່ວມມືລະຫວ່າງ ສປ ຈີນ ແລະສປປລາວ ກ່ຽວກັບການຄວບຄຸມພະຍາດສັດຂ້າມຊາຍແດນ, ໃນນັ້ນ ໄດ້ກໍ່ສ້າງສູນເຝົ້າລະວັງ 1 ແຫ່ງ ຢູ່ນະຄອນຫຼວງວຽງຈັນ ແລະສະຖານີເຝົ້າລະວັງອີກ 2 ແຫ່ງ ແມ່ນຢູ່ແຂວງຜົ້ງສາລີ ແລະຫຼວງນ້ຳທາ, ລວມເນື້ອທີ່ທັງໝົດ 2 ພັນກວ່າຕາແມັດ, ປະກອບດ້ວຍອຸປະກອນການວິໄຈພະຍາດສັດ ແລະຝຶກອົບຮົມດ້ານວິຊາການໃຫ້ແກ່ຝ່າຍລາວ, ສຳລັບ ການປະຕິບັດວຽກຂອງໂຄງການແມ່ນແບ່ງອອກເປັນ 3 ໄລຍະຄື: ໄລຍະສຶກສາຄວາມເປັນໄປໄດ້, ໄລຍະກໍ່ສ້າງ 18 ເດືອນ ແລະໄລຍະຮ່ວມມືດ້ານວິຊາການ (2 ປີ) ແມ່ນເລີ່ມຈາກມື້ມອບ-ຮັບນີ້ເປັນຕົ້ນໄປ, ໂດຍຝ່າຍຈີນ ຈະສະໜັບສະໜູນຜູ້ຊ່ຽວຊານມາຝຶກອົບຮົມ ກ່ຽວກັບ ການນຳໃຊ້ເຄື່ອງມື-ເຕັກ ນິກການວິໄຈ ແລະດຳເນີນການເຝົ້າລະວັງດ້ານລະບາດວິທະຍາໃຫ້ແກ່ຝ່າຍລາວ.
ທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີກະຊວງກະສິກຳ ແລະປ່າໄມ້ ກ່າວວ່າ: ໂຄງການ ນີ້ ແມ່ນເໝາະສົມກັົົບເວລາ ແລະຖືກຕ້ອງຕາມຄວາມມຸ່ງໝາດປາດຖະໜາຂອງລັດຖະບານລາວ ທີ່ຈະໄດ້ນຳໃຊ້ສູນ, ສະຖານີໃໝ່ນີ້ ເພື່ອຮອງຮັບການເຝົ້າລະວັງ, ວິໄຈ ແລະຕອບໂຕ້ພະຍາດສັດຂ້າມຊາຍແດນ ໃຫ້ໄດ້ແຕ່ຫົວທີ, ຈະໃຊ້ເປັນເຄື່ອງມື ສຳລັບວິໄຈ ແລະຢັ້ງຢືນສຸຂະພາບສັດໃຫ້ແກ່ບັນດາໂຄງການລ້ຽງສັດ, ວຽກກັກກັນ ແລສຸຂານາໄມສັດ ເພື່ອສົ່ງອອກຈາກລາວ ສູ່ ຈີນ ທີ່ພາກເອກະຊົນກຳລັງມີການລົງທຶນຢູ່ໃນລາວ ແລະຖ້າບໍ່ມີສູນສະຖານີເຫຼົ່ານີ້ເກີດຂຶ້ນ ບັນດາໂຄງການພາກລັດ ກໍຄື ເອກະຊົນ ທີ່ມີຈຸດປະສົງຜະລິດສົ່ງອອກສັດໄປ ສປຈີນ ກໍຄົງຈະເປັນໄປບໍ່ໄດ້.