ໃນໄລຍະຜ່ານມາທາງພາກສ່ວນທີ່ກ່ຽວຂ້ອງຂອງແຂວງອຸດົມໄຊ ສົມທົບກັບບໍລິສັດຂອງຈີນທີ່ຮັບເຫມົາໂຄງການກໍ່ສ້າງເສັ້ນທາງລົດໄຟ ຄວາມໄວສູງ ໄດ້ພ້ອມກັນເຄື່ອນໄຫວຊຳລະຄ່າຊົດເຊີຍຕໍ່ຜູ້ທີ່ໄດ້ຮັບຜົນກະທົບຈາກໂຄງການດ່ັງກ່າວແລ້ວ ໂດຍອີງໃສ່ບັນດາຂໍ້ມູນທີ່ລົງກວດກາຕົວຈິງ ແລະ ຊຳລະຕາມອັດຕາມມູນຄ່າທີ່ໄດ້ກຳນົດໄວ້ ມາຮອດປັດຈຸບັນແມ່ນມີມູນຄ່າທັງຫມົດ 250.89 ຕື້ກີບ
ອີງຕາມການສະຫຼຸບລາຍງານຂອງພະແນກ ຍທຂ ແຂວງ ຕໍ່ກັບກອງປະຊຸມສະໄຫມສາມັນເທື່ອທີ່ 5 ຂອງສະພາປະຊາຊົນແຂວງອຸດົມໄຊ ຄັ້ງທີ 1 ເຫັນວ່າ ປັດຈຸບັນແມ່ນສຳເລັດໃນການເບີກຈ່າຍ ຫຼື ຊຳລະຄ່າຊົດເຊີຍງວດທຳອີດ ປະຈຳປີ 2017 ໃຫ້ແກ່ຜູ້ທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟຄວາມໄວສູງ ຊ່ວງຜ່ານແຂວງອຸດົມໄຊ ແລ້ວ ເຊິ່ງມີຈຳນວນທັງຫມົດ 3 ເມືອງ, 32 ບ້ານ ຄື ເມືອງນາຫມໍ້ 10 ບ້ານ,ເມືອງໄຊ 12ບ້ານ ແລະ ເມືອງງາ 10 ບ້ານ ລວມເປັນເງິນທັງຫມົດ 250 ກວ່າຕື້ກີບ ໃນນັ້ນ ຢູ່ເມືອງນາຫມໍ້ ມີ 227 ກວ່າຕື້ກີບ, ເມືອງໄຊ 1 ຕື້ 3 ຮ້ອຍກວ່າລ້ານກີບ ແລະ ເມືອງງາ 20 ກວ່າຕື້ກີບ ໃນຈຳນວນຜູ້ທີ່ໄດ້ຮັບຜົນກະທົບດັ່ງກ່າວ ທັງຫມົດແມ່ນຮັບຜ່ານບັນຊີທະນາຄານ ທີ່ມີຢູ່ເມືອງຂອງຕົນ ເພື່ອເຮັດໃຫ້ສະດວກສະບາຍໃນການເບີກຈ່າຍ. ເຖິງຢ່າງໃດກໍຕາມ ກໍຍັງມີບາງຄອບຄົວທີ່ຍັງບໍ່ທັນໄດ້ຮັບ ເນື່ອງຈາກຕົນເອງຍັງບໍ່ທັນໄດ້ເປີດບັນຊີຢູ່ທະນາຄານ,ບາງຄອບຄົວແມ່ນຢູ່ຕ່າງເມືອງ,ຕ່າງແຂວງ ແລະ ບໍ່ຢາກຮັບເປັນງວດ ລໍຖ້າຮັບບາດດຽວພາຍຫຼັງການກໍ່ສ້າງສຳເລັດ.
ສ່ວນທິດທາງແຜນການໃນການຊໍາລະຄ່າຊົດເຊີຍໃຫ້ແກ່ຜູ້ທີ່ໄດ້ຮັບຜົນກະທົບໃນງວດທີ່ 2 ທາງພາກສ່ວນທີ່ກ່ຽວຂ້ອງຂອງແຂວງອຸດົມໄຊ ໄດ້ມີການສະເໜີຫາບໍລິສັດຮ່ວມທຶນໂຄງການກໍ່ສ້າງເສັ້ນທາງລົດໄຟ ລາວ ຈີນ ເພື່ອສະຫຼຸບສັງລວມແລ້ວ ໃນມູນຄ່າ 64 ກວ່າຕື້ກີບ ໃນນັ້ນ ເມືອງນາຫມໍ້ 19 ຕື້ກວ່າກີບ,ເມືອງໄຊ 27 ຕື້ກວ່າກີບ ແລະ ເມືອງງາອີກຈຳນວນ 17 ຕື້ກວ່າກີບ. ເຊິ່ງຄາດວ່າຈະໄດ້ຮັບການແກ້ໄຂໃນໄວໆນີ້.tagแท็กรูปภาพ