ທ້າຍອາທິດຜ່ານມາ, ທີ່ກະຊວງແຜນການ ແລະ ການລົງທຶນ ຮ່ວມກັບກະຊວງການຕ່າງປະເທດ ແລະ ອົງການ ອຸຍນີເຊັບ ປະຈຳ ສປປ ລາວ ຈັດພິທີເຜີຍແຜ່ບົດສຶກສາຄົ້ນຄວ້າ ກ່ຽວກັບ ການວິເຄາະບັນດາປັດໄຈເຖິງຄວາມ ເປັນຢູ່ທີ່ດີ ລວມທັງຜົນກະທົບຕໍ່ການພັດທະນາດ້ານຕ່າງໆ ຂອງເດັກນ້ອຍ ຢູ່ ສປປ ລາວ(MODA) ເຊິ່ງບົດວິເຄາະດັ່ງກ່າວ ຈະສະແດງໃຫ້ເຫັນເຖິງ ຄວາມສະຫລັບຊັບຊ້ອນຂອງຄວາມທຸກຍາກ ແລະ ຂາດເຂີນຂອງເດັກນ້ອຍຢູ່ ສປປ ລາວ ເພື່ອໃຫ້ ພາກລັດໄດ້ມີແຜນການ ວາງນະໂຍບາຍການພັດທະນາເດັກ ໃຫ້ແທດເໝາະກັບສະພາບຕົວຈິງ ຂອງເດັກໃນແຕ່ລະໄລຍະເກນອາຍຸ.
ທ່ານ ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທືນ ກ່າວວ່າ: ການວິເຄາະບັນດາປັດໄຈ ທີ່ມີຜົນກະທົບຕໍ່ການພັດທະນາດ້ານຕ່າງໆຂອງເດັກ ຢູ່ ສປປ ລາວ ຍັງເປັນການປະກອບສ່ວນ ໃນການທົບທວນຄືນຄວາມຄືບໜ້າ ແລະ ການວາງແຜນ ເພື່ອບັນລຸເປົ້າໝາຍ ການພັດທະນາແບບຍືນຍົງ ທີ່ກ່ຽວຂ້ອງກັບເດັກໂດຍກົງ ແນ່ໃສ່ຈັດຕັ້ງປະຕິບັດໂຕຊີ້ວັດດ້ານ ການພັດທະນາແບບຍືນຍົງ ທີ 1.2 ວ່າດ້ວຍ ການຫລຸດຜ່ອນອັດຕາຄວາມທຸກຍາກ ໃນທຸກດ້ານຂອງ ຜູ້ຊາຍ, ແມ່ຍິງ ແລະ ເດັກນ້ອຍ ໃນທຸກເກນອາຍຸໃຫ້ໄດ້ເຄິ່ງໜຶ່ງ ພາຍໃນປີ 2030. ນອກຈາກນີ້, ບົດວິເຄາະດັ່ງກ່າວຈະເປັນພື້ນຖານ ໃນການສະໜອງຂໍ້ມູນ ເຂົ້າໃນບົດລາຍງານກາງສະໄໝ ຂອງແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 8, ກະກຽມແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 9 ແລະ ການກະກຽມກອງປະຊຸມໂຕະມົນ ໃນເດືອນ ທັນວາ 2018 ນີ້.
ຜູ້ຕາງໜ້າຈາກສາມພາກສ່ວນ ໄດ້ຕີລາຄາສູງຕໍ່ຜົນສຳເລັດຂອງບົດວິເຄາະດັ່ງກ່າວ ແລະ ຫວັງວ່າຈະເປັນພື້ນຖານໃຫ້ແກ່ລັດຖະບານ ສປປ ລາວ ແລະ ອົງການຈັດຕັ້ງສາກົນ ໃນການນຳໃຊ້ເຂົ້າ ໃນການວາງແຜນນະໂຍບາຍແຫ່ງຊາດ ແລະ ເຊື່ອມສານບັນດາຕົວຊີ້ວັດຂອງ ເປົ້າໝາຍການພັດທະນາແບບຍືນຍົງ ທີ່ຕິດພັນກັບເດັກ ເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ ແຕ່ລະໄລຍະຢ່າງຖືກຕ້ອງ ແລະ ເໝາະສົມເພື່ອຮັບປະກັນການປົກປ້ອງສິດ ແລະ ຜົນປະໂຫຍດ ຂອງເດັກ ກໍຄື ຜູ້ສືບທອດ ໃນອະນາຄົດຂອງຊາດຕາມຫລັກການ “ບໍ່ປະຖີ້ມໃຜໄວ້ຂ້າງຫຼັງ” ຂອງວາລະການພັດທະນາແບບຍືນຍົງຂອງ ສປຊ ຮອດປີ 2030.
Cr.kpl
#insidelaos