ໃນໂອກາດລົງເຄື່ອນໄຫວຢຽ້ມຢາມ ແລະ ຕິດຕາມຄວາມຄືບໜ້າ ການຟື້ນຟູຊີວິດການເປັນຢູ່ຂອງປະຊາຊົນ ຢູ່ເມືອງໜາມໄຊ ໃນລະຫວ່າງທ້າຍອາທິດຜ່ານມາ, ທ່ານ ສອນໄຊ ສີພັນດອນ ຮອງນາຍົກນາຍົກລັດຖະມົນຕີ ປະທານຄະນະກໍາມະການ ສະເພາະກິດແກ້ໄຂ ໄພພິພັດລະດັບຊາດ ພອ້ມດວ້ຍຄະນະ ໄດ້ສືບຕໍ່ຕິດຕາມໂຄງການ ຈັດສັນທີ່ຢູ່ອາໃສ ໃຫ້ແກ່ປະຊາຊົນ ທີ່ໄດ້ຮັບຜົນກະທົບ ຈາກໂຄງການ ເຂື່ອນໄຟຟ້າເຊຂະໜານ 1 ຢູ່ເມືອງ ຊານໄຊ, ແຂວງອັດຕະປື, ໂດຍມີອໍານາດການປົກຄອງເມືອງ ແລະ ປະຊາຊົນເມືອງຊານໄຊ ໃຫ້ການຕ້ອນຮັບ.
ທ່ານ ສອນໄຊ ສີພັນດອນ ໄດ້ໃຫ້ກຽດໂອ້ລົມພໍ່ແມ່ປະຊາຊົນ ແລະ ຄະນະຮັບຜິດຊອບໂຄງການ ກໍ່ສ້າງເຂື່ອນໄຟຟ້າເຊຂະໝານ 1, ກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜູ້ຮັບຜິດຊອບໂຄງການ ທີ່ໄດ້ເອົາໃຈໃສ່ໃນການ ຈັດຕັ້ງປະຕິບັດວຽກງານ ການຍົກຍ້າຍຈັດສັນທີ່ຢູ່ອາໃສ ແລະ ກໍ່ສ້າງບັນດາພື້ນຖານ ໂຄງລ່າງໃຫ້ແກ່ປະຊາຊົນ. ພ້ອມດຽວກັນນີ້, ທ່ານຍັງໄດ້ເນັ້ນໜັກໃຫ້ ອໍານນາດການປົກຄອງເມືອງ ເອົາໃຈໃສ່ປະສານສົມທົບກັບ ຜູ້ຮັບຜິດຊອບໂຄງການດັ່ງກ່າວ, ເພື່ອຈັດຕັ້ງປະຕິບັດ ດ້ານວຽກງານຕ່າງໆ ຕາມທີ່ໄດ້ຕົກລົງກັນໃນສັນຍາ ໃຫ້ສາມາດດຳເນີນໄປມີຜົນສໍາເລັດ ໂດຍສະເພາະແມ່ນວຽກງານຈັດສັນອາຊີບໃຫ້ປະຊາຊົນ, ການສ້າງເສດຖະກິດຄອບຄົວ, ການຈັດສັນເນື້ອ ທີ່ທໍາການຜະລິດ, ການຊຸກຍູ້ສົ່ງເສີມການປູກ-ການລ້ຽງ ແລະ ການຜະລິດເປັນສິນຄ້າ ຂອງປະຊາຊົນ; ເອົາໃຈໃສ່ເຂົ້າໃນການສະໜອງ ແນວພັນພຶດ-ສັດ, ວຽກງານ ສາທາລະນະສຸກ ໃຫ້ເອົາໃຈໃສ່ການ ຮັກສາສຸຂະພາບ ຂອງປະຊາຊົນ, ການສະໜອງນໍ້າສະອາດ, ນໍ້າກິນ-ນໍາໃຊ້ໃຫ້ປະຊາຊົນ.ທັງນີ້, ກໍ່ເພື່ອຟື້ນຟູຊິວິດ ການເປັນຢູ່ຂອງປະຊາຊົນ ທີ່ໄດ້ຮັບຜົນ ກະທົບໃຫ້ມີ ຊີວິດການເປັນ ຢູ່ທີ່ດີຂຶ້ນກວ່າເກົ່າ. ສໍາຄັນໃຫ້ຮີບຮ້ອນ ປັບປຸງກົງຈັກການຈັດຕັ້ງ ຂອງບ້ານໃຫ້ສໍາເລັດໂດຍໄວ ຕິດພັນກັບການເອົາໃຈໃສ່ ວຽກງານປ້ອງກັນຊາດ-ປ້ອງກັນ ຄວາມສະຫງົບ ແລະ ຮັກສາຄວາມສາມັກຄີພາຍໃນບ້ານ.
ສຳລັບໂຄງການຈັດສັນບ້ານຫ້ວຍດຸມ ໄດ້ດໍາເນີນການຍົກຍ້າຍ ຈັດສັນມາແຕ່ ປີ 2014 ມີ 3 ບ້ານ ຄື: ບ້ານຫີນດໍາ, ບ້ານດອນແຄນ ແລະ ບ້ານຕັງເກີ, ມີ 815 ຄົວເຮືອນ. ນອກຈາກນີ້, ໂຄງ ການດັ່ງກ່າວ ຍັງໄດ້ມີການກໍ່ສ້າງພື້ນຖານ ໂຄງການພາຍໃນບ້ານ ເປັນຕົ້ນ ໂຮງຮຽນ, ສຸກສາລາ, ຕະ ຫລາດ, ວັດວາອາຮາມ ແລະ ອື່ນໆ ເຊິ່ງເຂດຈັດສັນບ້ານຫ້ວຍດຸມ ຄາດໝາຍຂອງ ການພັດທະນາ ແມ່ນຈະດໍາເນີນຮອດປີ 2036.
Cr.KPL
ພາບປະກອບ: laophattananews