ທ້າຍອາທິດຜ່ານມາ ທີ່ແຂວງວຽງຈັນ, ສູນຄວບຄຸມວັນນະໂລກ ກະຊວງສາ ທາລະນະສຸກ ໄດ້ຈັດກອງປະຊຸມສະຫລຸບການເຄື່ອນໄຫວ ວຽກງານຄວບຄຸມວັນນະໂລກ ປະຈຳປີ 2017 ແລະ ຄວາມຄືບໜ້າ 6 ເດືອນຕົ້ນປີ 2018 ຂອງບັນດາແຂວງພາກກາງ ແລະ ໂຮງໝໍສູນກາງ, ໂດຍມີພະນັກງານທີ່ກ່ຽວຂ້ອງ ເຂົ້າຮ່ວມຫລາຍກວ່າ 50 ທ່ານ. ຈຸດປະສົງ ເພື່ອແລກປຽນບົດ ຮຽນສະຫລຸບການເຄື່ອນໄຫວວຽກງານ ຄວບຄຸມວັນນະໂລກໃນປີຜ່ານມາ, ຄວາມຄືບໜ້າປີ 2018 ແລະ ວາງແຜນ ປີ 2019.
ທ່ານ ດຣ. ນາງ ພອນນາລີ ຈິດຕະມະນີ ຫົວໜ້າສູນຄວບຄຸມວັນນະໂລກ ໄດ້ກ່າວວ່າ: ປັດໄຈສຳຄັນ ທີ່ກໍ່ໃຫ້ເກີດເປັນພະຍາດດັ່ງກ່າວ, ແມ່ນຍ້ອນຄວາມທຸກຍາກ ຊຶ່ງຄົນສ່ວນ ໃຫຍ່ຈະຢູ່ໃນກຸ່ມອາຍຸ 15–55 ປີ ເປັນໄລຍະກຳລັງທຳການຜະລິດ ແລະ ເປັນຜູ້ຊາຍຫລາຍກວ່າຜູ້ຍິງ 2 ຕໍ່ 1, ເຊິ່ງເປັນຜົນກະທົບຕໍ່ເສດຖະກິດຄອບຄົວ ແລະ ສັງຄົມໜັກພໍສົມຄວນ. ວັນ ໂລກເປັນພະຍາດຕິດແປດ ແລະ ຍັງເປັນບັນຫາສຳຄັນ ໃນຂົງເຂດວຽກງານສາທາລະນະສຸກ. ສະນັ້ນ, ຈຶ່ງຮຽກຮ້ອງມາຍັງທຸກພາກສ່ວນ ຈົ່ງຊ່ວຍກັນປະກອບສ່ວນ ປະຕິບັດວຽກງານ ຄວບຄຸມວັນນະໂລກ ແລະ ວາງແຜນການ ເພື່ອສືບຕໍ່ໃນການຈັດຕັ້ງປະຕິບັດ ການເຄື່ອນໄຫວວຽກງານດັ່ງກ່າວໃຫ້ສຳເລັດ.
ລາຍງານວ່າ: ດ້ານລະບາດວິທະຍາວັນນະໂລກໃນ ສປປ ລາວ ປີ 2017 ຜ່ານມາ, ມີການຄາດຄະເນ ການເກີດເປັນວັນນະໂລກໃໝ່ (Incidence) 168/100.000 ຄົນ (ປະມານ 12.000 ຄົນ), ຈຳນວນຄົນຕາຍຍ້ອນວັນນະໂລກ 41/100.000 ຄົນ (ປະມານ 3.000 ຄົນ). ອັດຕາການ ຊອກຄົ້ນ ຫລື ຄົ້ນພົບກໍລະນີຍັງເຫັນວ່າຕ່ຳ ເມື່ອທຽບໃສ່ອັດຕາຄວາມຊຸກຊຸມແລ້ວ ເຫັນວ່າໄດ້ພຽງ 50%ເທົ່ານັ້ນ, ເຫັນໄດ້ວ່າຍັງມີກໍ ລະນີວັນນະໂລກ ຈຳນວນຫລາຍ ທີ່ຍັງລີ້ຊ່ອນ ຢູ່ໃນ ຊຸມຊົນ ບໍ່ໄດ້ຖືກບົ່ງມະຕິ ແລະ ຮັບການປິ່ນປົວ.
Cr.KPL
#insidelaos
Hits: 3
