ມື້ນີ້, ທີ່ກະຊວງການເງິນ, ກົມສ່ວນສາອາກອນ ກະຊວງການເງິນ ຮ່ວມກັບ ທະນາຄານການຄ້າຕ່າງປະເທດລາວ ມະຫາຊົນ (ທຄຕລ) ຈັດພິທີເປີດການທົດລອງຊໍາລະຄ່າພາສີທີ່ດິນ ຜ່ານລະບົບ ທະນາຄານການຄ້າຕ່າງປະເທດລາວ ມະຫາຊົນ ໂດຍມີທ່ານ ພູທະນູເພັດ ໄຊສົມບັດ ຫົວໜ້າກົມສ່ວນສາອາກອນ ທ່ານ ນາງ ເພັດມາລາພອນ ວົງຈັນ ຮອງສູນບໍລິການເອເລັກໂຕຣນິກ ແລະຜະລິດຕະພັນບັດ ພ້ອມດ້ວຍພະນັກງານວິຊາການຈາກກົມ ແລະ ທະນາຄານເຂົ້າຮ່ວມ.
ທ່ານ ພູທະນູເພັດ ໄຊສົມບັດ ກ່າວວ່າ: ກົມສ່ວນສາອາກອນ ເລີ່ມຕົ້ນການຮ່ວມມືກັບ ທຄຕລ ຄັ້ງທໍາອິດ ແມ່ນການພັດທະນາລະບົບຮັບຊໍາລະຄ່າທໍານຽມຜ່ານ ທຄຕລ ໃນທ້າຍປີ 2017 ເຊິ່ງໄດ້ປະສົບຜົນສໍາເລັດໃນລະດັບທີ່ໜ້າພໍໃຈ ໂດຍໄດ້ຮັບຄວາມສົນໃຈ ແລະຄວາມເຊື່ອຖືຈາກສັງຄົມຢ່າງກວ້າງຂວາງ ໂດຍສືບເນື່ອງມາຈາກໂຄງການດັ່ງກ່າວ ລັດຖະບານຈຶ່ງເລັ່ງເຫັນໄດ້ວ່າ ການເກັບລາຍຮັບເຂົ້າງົບປະມານແຫ່ງລັດຜ່ານທະນາຄານນີ້ ເຮັດໃຫ້ມີຄວາມສະດວກຕໍ່ປະຊາຊົນ ແລະພາກລັດ ເຊິ່ງສາມາດເກັບລາຍຮັບເຂົ້າງົບປະມານແຫ່ງລັດໃຫ້ທັນເວລາ ຖືກຕ້ອງ ມີຄວາມໂປ່ງໃສ ແລະສາມາດກວດສອບຄືນໄດ້.
ການຊໍາລະພາສີທີ່ດິນສາມາດຊໍາລະໄດ້ 3 ຊ່ອງທາງຄື: ຜ່ານເຄົ້າເຕີ້ ທຄຕລ ຜ່ານແອັບ BCEL one ແລະ ຜ່ານຕົວແທນ ທຄຕລ ໃນໄລຍະທໍາອິດຈະເປີດໃຫ້ ກະຊວງການເງິນ ແລະ ທຄຕລ ທົດລອງນໍາໃຊ້ກ່ອນເປັນເວລາ 1 ອາທິດ ຫຼັງຈາກນັ້ນ ຈະເປີດໃຫ້ປະຊາຊົນໃນຂອບເຂດນະຄອນຫຼວງວຽງຈັນໄດ້ນໍາໃຊ້ ແລະຈະເປີດນໍາໃຊ້ຢ່າງເປັນທາງການໃນຂອບເຂດທົ່ວປະເທດ ໃນວັນທີ 1 ມັງກອນ 2019 ທີ່ຈະມາເຖິງນີ້. ສໍາບັບການຊໍາລະພາສີທີ່ດິນຜ່ານລະບົບຂອງ ທຄຕລ ນີ້ ພຽງແຕ່ປະກອບເອກະສານຄື: ໃບຕາດິນ ໃບຢັ້ງຢືນສິດນໍາໃຊ້ ພ້ອມດ້ວຍໃບຮັບເງິນຊໍາລະປີສຸດທ້າຍທີ່ທ່ານມາຊໍາລະ ເຊິ່ງສາມາດໃຊ້ຊໍາເນົາ ຫຼື ຕົ້ນສະບັບກໍ່ໄດ້ ເພື່ອປະກອບເອກະສານຊໍາລະພາສີທີ່ດິນ ຫຼັງຈາກຊໍາລະແລ້ວຈະໄດ້ຮັບໃບບິນເພື່ອເປັນຫຼັກຖານໃນການຊໍາລະແກ່ເຈົ້າຂອງໃບຕາດິນ.