ບໍ່ດົນຜ່ານມານີ້, ທີ່ແຂວງ ວຽງຈັນ, ກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກ ໄດ້ຈັດກອງປະຊຸມປຶກສາຫາລື ເພື່ອປັບປຸງແຜນການ 2019 ແລະ ສ້າງແຜນການ 2020 ສຳລັບ 9 ແຂວງພາກເໜືອຂຶ້ນ ເພື່ອໃຫ້ກະທົບໃສ່ 9 ຕົວຊີ້ວັດທີ່ສະພາ ຮັບຮອງ ໃຫ້ບັນລຸຕາມຄາດໝາຍ, ເຊິ່ງຕົວຊີ້ວັດດັ່ງກ່າວ ປະກອບດ້ວຍອັດຕາການຕາຍ ຂອງເດັກ ນ້ອຍລຸ່ມ 5 ປີ ທີ່ມີນ້ຳໜັກຕ່ຳກວ່າມາດຕະຖານ ໃຫ້ຍັງເຫລືອ 21%, ອັດຕາການຕາຍ ຂອງເດັກນ້ອຍລຸ່ມ 5 ປີ ທີ່ມີລວງສູງຕ່ຳ ກວ່າມາດຕະຖານ ໃຫ້ຍັງເຫລືອ 33,2%, ຕາຍອັດຕາການຂອງເດັກນ້ອຍລຸ່ມ 1 ປີ ໃຫ້ຍັງເຫລືອ 38/1.000 ຄົນ ຂອງເດັກເກີດມີຊີວິດ, ອັດຕາການຕາຍ ຂອງເດັກນ້ອຍລຸ່ມ 5 ປີ ໃຫ້ຍັງເຫລືອ 51/1.000 ຄົນ ຂອງເດັກເກີດມີຊີວິດ, ອັດຕາການຕາຍຂອງແມ່ ໃຫ້ຍັງເຫລືອ 175/100.000 ຄົນຂອງເດັກເກີດມີຊີວິດ, ອັດຕາການເກີດລູກ ມີແພດຊ່ວຍໃຫ້ໄດ້ 74%, ອັດຕາການສັກຢາກັນພະຍາດ ໃນເດັກນ້ອຍລຸ່ມ 1 ປີໃຫ້ໄດ້ 90%, ອັດຕາ ການຊົມໃຊ້ນ້ຳສະອາດໃຫ້ໄດ້ 88% ຂອງປະຊາກອນທັງໝົດ, ອັດຕາການຊົມໃຊ້ວິດຖ່າຍຄອບຄົວ ໃຫ້ໄດ້ 73% ຂອງປະຊາກອນທັງໝົດ.
ກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກ ຍັງໃຫ້ຮູ້ຕື່ມອີກວ່າ: ໃນປີ2017 ຜ່ານມາ ໃນທົ່ວປະເທດອັດຕາເດັກນ້ອຍ ນ້ຳໜັກຫລຸດມາດຕະຖານ 21,1%, ການສູງຕ່ຳບໍ່ໄດ້ມາດຕະຖານ 33%, ອັດຕາການຕາຍ ຂອງເດັກນ້ອຍລຸ່ມ 1 ປີ 40/1.000 ຄົນຂອງເດັກເກີດມີຊີວິດ, ອັດຕາການຕາຍຂອງເດັກນ້ອຍລຸ່ມ 5 ປີ 46/1.000 ຄົນຂອງເດັກເກີດມີຊີວິດ.
ນອກຈາກນີ້, ອັດຕາການເກີດມີແພດຊ່ວຍ 64,4%, ການສັກຢາກັນພະຍາດ 59,7%, ການຊົມໃຊ້ນ້ຳສະອາດ 83,9% ແລະ ອັດຕາການຊົມໃຊ້ວິດຖ່າຍ 73,8%. ສຳລັບການສຳຫລວດອັດຕາການຕາຍຂອງແມ່ ໃນປີ 2018 ມີ 175/100.000ຄົນ ເຫັນວ່າຫລຸດລົງເມື່ອທຽບກັບປີ 2017.
ກອງປະຊຸມດັ່ງກ່າວ, ໂດຍການເປັນປະທານຂອງ ທ່ານ ດຣ.ບຸນເພັງ ພິລາວົງ ຫົວໜ້າກົມອະນາໄມ ແລະ ສົ່ງເສີມສຸຂະພາບ.
#insidelaos
Cr.KPL
Hits: 41
