ໂຄງການສັກຢາກັນພະຍາດແຫ່ງຊາດ ຂອງສູນແມ່ ແລະ ເດັກ, ສູນຂ່າວສານການແພດ-ສຸຂະສຶກສາ ຮ່ວມກັບ ພະແນກສາທາລະນະສຸກແຂວງ, ເມືອງ ແລະ ສຸກສາລາ ໄດ້ລົງໂຄສະ ນາສຸຂະສຶກສາ ແລະ ສັກຢາກັນພະຍາດ ໄຂ້ທໍລະພິດ (Typhoid) ໃຫ້ແກ່ເດັກ ແລະ ປະຊາຊົນຜູ້ທີ່ມີອາຍຸຕັ້ງແຕ່ 6 ເດືອນຫາ 45 ປີ, ໂດຍບໍ່ຈໍາກັດເພດ ທີ່ຈຸດພັກເຊົາທັງໝົດ 7 ແຄ້ມ.
ໂຄງການດັ່ງກ່າວ, ໄດ້ເລີ່ມແຕ່ວັນທີ 12 ພະຈິກ 2018, ໂດຍໃຊ້ວັກແຊັງທັງໝົດ 9.180 ໂດສ, 1ໂດສຕໍ່ 1 ຄົນ. ພ້ອມກັນນີ້, ທີມງານແພດປິ່ນປົວ, ແມ່ ແລະ ເດັກ, ໂພຊະນາການ, ສຸຂະສຶກສາແຂວງ, ເມືອງ ໄດ້ສົມທົບກັນລົງກວດສຸຂະພາບແມ່ ແລະ ເດັກແບບເຊື່ອມສານແລະ ໃຫ້ປະຊາຊົນທີ່ຖືກຜົນກະທົບ ໃນ 19 ບ້ານເປົ້າໝາຍ, ເຊິ່ງສາມາດສັກໄດ້ 5.700 ກວ່າຄົນ.
ພະຍາດໄຂ້ທໍລະພິດ ເປັນພະຍາດຕິດຕໍ່ ໂດຍການກິນອາຫານ ຫລື ນ້ຳດື່ມ ທີ່ປົນເປື້ອນດ້ວຍເຊື້ອພະຍາດໄຂ້ທໍລະພິດ ເມື່ອເປັນແລ້ວ ມັນຈະແຜ່ລະບາດເປັນວົງກວ້າງ ຈາກບ້ານນີ້ໄປຫາບ້ານອື່ນໄດ້ ຍ້ອນການຖ່າຍໜັກ ແບບຊະຊາຍ, ຂາດສຸຂະອະນາໄມສ່ວນບຸກຄົນ ແລະ ຊຸມຊົນ. ຜູ້ມີເຊື້ອຈະມີອາການສະແດງອອກມາ ເປັນຕົ້ນ ມີໄຂ້ສູງຕະຫລອດ, ເຈັບບໍລິເວນທ້ອງຮຸນແຮງ, ເມື່ອຍ, ເຈັບຫົວ,ປວດຮາກ, ປັ່ນປ່ວນລະບົບລະລາຍ, ທ້ອງຜູກ, ຖອກທ້ອງ ແລະ ຖ່າຍເປັນເລືອດ ຫລື ຖ່າຍດຳ ເປັນໄດ້ທັງເດັກ ແລະ ຜູ້ໃຫຍ່ ຖ້າເປັນແລ້ວ ຫາກບໍ່ໄດ້ຮັບການປິ່ນປົວ ຈະມີອາການສົນ ຄື: ເຮັດໃຫ້ມີເລືອດໄຫລໃນລະບົບລະລາຍ, ໄສ້ຊອດ ແລະ ເຮັດໃຫ້ເສຍຊີວິດໄດ້.
ດັ່ງນັ້ນ, ເພື່ອບໍ່ໃຫ້ມີອາການເຈັບ ຍ້ອນພະຍາດໄຂ້ທໍລະພິດ ນອກຈາກການສັກຢາວັກແຊັງກັນພະຍາດແລ້ວ ຍັງຕ້ອງເອົາໃຈໃສ່ ໃນການຮັກສາອະນາໄມ 3 ສະອາດ ຄື: ກິນສະອາດ, ດື່ມສະອາດ ແລະ ຢູ່ສະອາດ. ພ້ອມຖ່າຍໃສ່ວິດທຸກຄັ້ງ, ໝັ່ນລ້າງມືໃສ່ສະບູກ່ອນອອກຈາກຫ້ອງນ້ຳ ແລະ ໃຊ້ນ້ຳທີ່ສະອາດເພື່ອປຸງແຕ່ງອາຫານ.
#insidelaos
#ອິນໄຊລາວ
Cr.KPL