ບໍ່ດົນມານີ້, ຢູ່ໂຮງແຮມ ລາວພາຊາ ໄດ້ຈັດກອງປະຊຸມເຜີຍແຜ່ແນວຄວາມຄິດ ກອງທຶນສົ່ງເສີມ ການຝຶກອົບຮົມວິຊາຊີບ ດ້ານການທ່ອງທ່ຽວ ແລະ ການໂຮງແຮມ, ໂດຍການເປັນ ປະທານຂອງ ທ່ານ ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ແຊມ ໄຊເນີ ອຸປະທູດ ລຸກຊຳບວກປະຈຳ ສປປ ລາວ, ທ່ານ ບາບາຣາ ແຢັກກີ ຮາດ ຮອງຫົວຫນ້າ ອົງການ ເພື່ອການພັດທະນາ ແລະ ການຮ່ວມມືສາກົນ ແຫ່ງ ປະເທດສະວິດເຊີແລນ (SDC), ພ້ອມດ້ວຍພາກສ່ວນ ທີ່ກ່ຽວຂ້ອງ ເຂົ້າຮ່ວມ.
ໂອກາດນີ້, ທ່ານ ກອງສີ ແສງມະນີ ກ່າວວ່າ: ກອງທຶນສົ່ງເສີມ ການຝຶກອົບຮົມວິຊາຊີບ ດ້ານການທ່ອງທ່ຽວ ແລະ ການໂຮງແຮມ ແມ່ນໂຄງການລິເລີ່ມ ຂອງກະຊວງສຶກສາທິການ ແລະ ກິລາ ເຊິ່ງຈັດຕັ້ງປະຕິບັດ ໂດຍກົມອາຊີວະສຶກສາ ແລະ ຫ້ອງການສະພາ ທີ່ປຶກສາອາຊີວະສຶກສາ ແລະ ພັດທະນາສີມືແຮງງານ, ໂດຍໄດ້ຮັບການສະໜັບ ສະໜູນດ້ານເຕັກນິກ ແລະ ວິຊາການ ຈາກໂຄງການທັກ ສະວຽກງານທ່ອງທ່ຽວ ແລະ ໄດ້ທຶນສະໜັບສະໜູນ ຈາກລັດຖະບານລາວ, ລັດຖະບານ ລຸກຊໍາບວກ ແລະ ລັດ ຖະບານສະວິດເຊີແລນ. ລັດຖະບານລາວ ມີຄວາມມຸ່ງໝັ້ນຕະຫລອດມາ ເພື່ອຊ່ວຍໃຫ້ນັກຮຽນທີ່ຈົບ ຈາກສາຍວິຊາຊີບ ອາຊີວະສຶກສາ ມີຄວາມຮູ້, ຄວາມສາມາດ, ທັກສະ, ມີທັດສະນະຄຸນສົມບັດທີ່ເໝາະສົມ ກັບຄວາມຕ້ອງການ ຂອງຜູ້ຈ້າງງານ, ໂດຍສະເພາະ ຂະແໜງການທ່ອງທ່ຽວ ແລະ ການໂຮງແຮມ.
ທ່ານ ແຊມ ໄຊເນີ ກ່າວວ່າ: ກອງທຶນດັ່ງກ່າວ, ແມ່ນໜຶ່ງໃນຫລາຍກົນໄກ ທາງດ້ານການເງິນ ຫລື ກອງທຶນລິເລີ່ມ ທີ່ໃຫ້ການສະໜັບສະໜູນ, ໂດຍໂຄງການທັກສະ ສຳລັບວຽກງານທ່ອງທ່ຽວ (LAO/029), ເຊິ່ງມີຈຸດປະສົງ ເພື່ອສົ່ງເສີມ ແລະ ສ້າງຄວາມເຂັ້ມແຂງໃຫ້ແກ່ ຂະແໜງການທ່ອງທ່ຽວ ແລະ ການໂຮງແຮມ ຂອງລາວ ແລະ ເຊື່ອໝັ້ນວ່າກອງທຶນດັ່ງກ່າວ, ຈະເປັນແຮງກະຕຸ້ນອັນໜຶ່ງ ທີ່ຈະປະກອບສ່ວນເຂົ້າໃນ ການຊ່ວຍແກ້ໄຂ ແລະ ປັບປຸງບັນຫາ ເຫລົ່ານີ້ໃຫ້ດີຂຶ້ນ.
ທ່ານ ບາບາຣາ ແຢັກກີ ຮາດ ມີຄຳເຫັນວ່າ: ຂະແໜງການທ່ອງທ່ຽວ ແລະ ການໂຮງແຮມ ຖືວ່າເປັນຂະແໜງການ ທີ່ມີທ່າແຮງສູງຕໍ່ການ ຊ່ວຍຫລຸດຜ່ອນຄວາມທຸກຍາກ. ເຖິງຢ່າງໃດກໍຕາມ, ຍັງມີຜູ້ທີ່ດ້ອຍໂອກາດ ຫລາຍກຸ່ມ ທີ່ຍັງບໍ່ທັນໄດ້ຮັບຜົນປະໂຫຍດ ຈາກການພັດທະນາ ແລະ ການຈະເລີນເຕີບໂຕຂອງ ຂະແໜງການທ່ອງທ່ຽວ ແລະ ການໂຮງແຮມໃນ ລາວ ແລະ ເຊື່ອໝັ້ນວ່າ ກອງທຶນດັ່ງກ່າວ, ຈະເປັນຊ່ອງທາງ ຊ່ວຍເຫລືອ ຜູ້ທີ່ດ້ອຍໂອກາດ ໄດ້ເຂົ້າເຖິງການ ຝຶກອົບຮົມວິຊາຊີບ ແລະ ສ້າງວຽກເຮັດງານທຳ ກໍຄື ການພັດທະນາ ອາຊີບຂອງພວກເຂົາເຈົ້າ ໃນຂະແໜງການດັ່ງກ່າວ, ໃຫ້ນັບມື້ເພີ່ມຂຶ້ນ.
Cr.KPL
ພາບປະກອບ: http://huunghivietlao.thoidai.com.vn/