ໃນທ້າຍອາທິດທີ່ຜ່ານມາ ທີ່ໂຮງແຮມແລນມາກ ນະຄອນຫລວງວຽງຈັນ, ກົມປິ່ນປົວ ແລະ ຟື້ນຟູໜ້າທີ່ການ ແລະ ສະພາຄຸ້ມຄອງວິຊາຊີບປິ່ນປົວ, ກະຊວງສາທາລະນະສຸກ ໄດ້ຈັດກອງປະຊຸມ ເພື່ອປະກາດເລີ່ມດຳເນີນການຈັດຕັ້ງປະຕິບັດ ໂຄງການພັດທະນາ ແລະ ຮັບປະກັນຄຸນນະພາບວິຊາຊີບປິ່ນປົວແບບຍືນຍົງ ຂອງບພະຍາບານ ໃນ ສປປ ລາວ ດີຂຶ້ນກວ່າເກົ່າ. ກອງປະຊຸມ ຍັງມີການແລກປ່ຽນຂໍ້ມູນ-ຂ່າວສານ ກ່ຽວກັບຄວາມຄືບໜ້າ ແລະ ແຜນການໃນຕໍ່ໜ້າ.
ທ່ານ ດຣ. ບຸນໜັກ ໄຊຊະນະສົງຄາມ ຫົວໜ້າກົມປິ່ນປົວ ແລະ ຟືີນຟູໜ້າທີ່ການ ກະຊວງສາທາລະນະສຸກ ກ່າວວ່າ: ໂຄງການນີ້ເປັນໂຄງການຮ່ວມມືລະຫວ່າງ ກະຊວງສາທາລະນະສຸກ ແລະ ອົງການໄຈກາ ໂດຍໄດ້ຮັບການຊ່ວຍເຫລືອລ້າ ຈາກລັດຖະບານຍີ່ປຸ່ນ ໂດຍມີກຳນົດການຈັດຕັ້ງປະຕິບັດ 5 ປີ ເຊິ່ງເລີ່ມຕົ້ນແຕ່ເດືອນ ກໍລະກົດ 2018 ແລະ ຈະສິ້ນໂຄງການໃນເດືອນ ກໍລະ ກົດ 2023 ເປົ້າໝາຍ ລວມຂອງໂຄງການນີ້ ແມ່ນເພື່ອປັບປຸງຄຸນນະພາບ ຂອງຜູ້ປະກອບວິຊາຊີບປິ່ນປົວ ໃນ ສປປ ລາວ ເຮັດໃຫ້ຄຸນນະພາບປິ່ນປົວດີຂຶ້ນ ໂດຍສະເພາະ ແມ່ນວິຊາຊີບພະຍາບານ.
ການຈັດຕັ້ງປະຕິບັດໂຄງການນີ້ ຍັງຈະມີຜົນໄດ້ຮັບດ້ານ ນິຕິກຳ ແລະ ລະບຽບການຕ່າງໆ ສຳລັບລະບົບການອອກໃບອະນຸຍາດ ແລະ ຂຶ້ນທະບຽນ ຜູ້ປະກອບການວິຊາຊີບປິ່ນປົວ ໃນ ສປປ ລາວ ໄດ້ຈັດຕັ້ງປະຕິບັດການສອບເສັງລະດັບຊາດ ເພື່ອຢັ້ງຢືນຂີດຄວາມສາມາດ ໃນການອອກໃບອະນຸຍາດ ແລະ ຮັບປະກັນຄຸນນະພາບ ຂອງວິຊາຊີບພະຍາບານ ໄດ້ຮັບການຈັດຕັ້ງ ປະຕິບັດໂຄງ ການ ຫລັກສູດຝຶກງານ ຂອງພະຍາບານຢູ່ໃນໂຮງໝໍຄູ່ຮ່ວມງານ ແລະ ປະຕິບັດຕາມຂັ້ນຕອນຕ່າງໆ ເພື່ອອອກໃບອະນຸຍາດປະກອບວິຊາຊີບປິ່ນປົວສົມບູນ ໃຫ້ແກ່ຜູ້ປະກອບວິຊາຊີບການພະຍາບານ.
ພາບປະກອບ: http://www.laolanexang-gold.com
#insidelaos
Cr.KPL