ໂຮງໄຟຟ້າພະລັງງານຄວາມຮ້ອນຫົງສາ ເປັນໂຄງການໜຶ່ງທີ່ຜະລິດໄຟຟ້າ ຈາກພະລັງງານຄວາມຮ້ອນຖ່ານຫີນ (ລິກໄນ) ມີໜ່ວຍຜະລິດກະແສໄຟຟ້າ 3 ໜ່ວຍ, ມີກໍາລັງການຜະລິດທັງໝົດ 1.878 ເມກາວັດ ໃນນີ້ ໄດ້ຈຳໜ່າຍໃຫ້ລັດວິສາຫະກິດໄຟຟ້າລາວ 100 ເມກາວັດ ແລະ ການໄຟຟ້າຝ່າຍຜະລິດແຫ່ງປະເທດໄທ 1.473 ເມກາວັດ. ຢ່າງໃດກໍຕາມ ບໍລິສັດໄຟຟ້າຫົງສາ ຈຳກັດ ໄດ້ວາງເປົ້າໝາຍພັດທະນາການຜະລິດ ຈະໃຫ້ໄດ້ຮັບມາດຕະຖານ ISO 9001:2015 ໃນປີ 2019 ທີ່ຈະມາເຖິງນີ້, ພ້ອມນັ້ນ ຍັງໄດ້ຮັບການຊີ້ນໍາຈາກລັດຖະບານ ເຂົ້າແຂ່ງຂັນພະລັງງານທີ່ເປັນມິດຕໍ່ສິ່ງແວດລ້ອມ ເຊິ່ງຄາດວ່າໃນປີ 2022 ຈະໄດ້ເຂົ້າຮ່ວມແຂ່ງຂັນ.
ທ່ານ ຍຸດທະຍາ ຈຸນພັນທອງ ຜູ້ອຳນວຍການຝ່າຍສື່ສານອົງການ ບໍລິສັດ ໄຟຟ້າຫົງສາ ຈຳກັດ ໃຫ້ຮູ້ວ່າ: ໂຮງໄຟຟ້າພະລັງງານຄວາມຮ້ອນຫົງສາ ເປັນໂຄງການຮ່ວມທຶນ ລະຫວ່າງ ລັດວິສາຫະກິດຖືຮຸ້ນລາວ 20%, ບໍລິ ສັດບ້ານປູ ພາວເວີ ຈຳກັດ ມະຫາຊົນ 40% ແລະ ບໍລິສັດ ອາເອດ ອິນເຕີເນເຊີແນວ ສິງກະໂປ ຄໍປໍເຣເຊີນ ຈຳກັດ, ບໍລິສັດຍ່ອຍຂອງ ບໍລິສັດຜະລິດໄຟຟ້າ ຣາດຊະບູລີ ໂຮນດິ້ງ ຈຳກັດ 40%, ລວມມູນຄ່າການລົງທຶນທັງໝົດ 3 .710 ລ້ານໂດລາສະຫະລັດ, ມີເນື້ອທີ່ 76,2 ກິໂລແມັດມົນທົນ ແລະ ມີໄລຍະສຳປະທານ 25 ປີ. ໂຄງການນີ້ ໄດ້ເປີດນຳໃຊ້ໃນປີ 2015, ປັດຈຸບັນບໍລິສັດ ໄຟຟ້າຫົງສາ ມີແຮງງານທັງໝົດ 4.000 ກ່ວາຄົນ ເຊິ່ງສ່ວນໃຫຍ່ແມ່ນແຮງງານລາວ.
ຄຽງຄູ່ກັບການດໍາເນີນທຸລະກິດ ຕາມທິດຊີ້ນໍາຂອງລັດຖະບານ ບໍລິສັດ ໄຟຟ້າຫົງສາ ຍັງໄດ້ເອົາໃຈໃສ່ ຮັກສາຜົນປະໂຫຍດຂອງປະຊາຊົນຜູ້ຖືກກະທົບຈາກໂຄງການຈໍານວນ 5 ໝູ່ບ້ານ, 450 ຄອບຄົວ ໂດຍໄດ້ ຍົກຍ້າຍຈັດສັນ ໃຫ້ໄປຢູ່ສະຖານທີ່ໃໝ່ ທີ່ເໝາະສົມ, ອຸດົມສົມບູນແລະ ຊຸກຍູ້-ສົ່ງເສີມ ຊີວິດການເປັນຢູ່ຂອງປະຊາຊົນໃຫ້ດີຂຶ້ນກວ່າເກົ່າ ເປັນຕົ້ນ ໂຄງການໄດ້ປຸກເຮືອນຫລັງໃໝ່ ໃຫ້ ໃນເນື້ອທີ່ 450 ຕາແມັດ ຕໍ່ຄອບ ຄົວ, ເນື້ອທີ່ທຳການຜະລິດ 2 ເຮັກຕາຕໍ່ຄອບຄົວ, ພ້ອມມີລະ ບົບຊົນລະປະທານນ້ຳລິນ, ລວມທັງເນື້ອທີ່ລ້ຽງສັດ. ພ້ອມນັ້ນໂຄງການ ຍັງໄດ້ວາງລະບົບສາທາລະນຸປະໂພກ ໄວ້ຢ່າງຄົບຖ້ວນ ເປັນຕົ້ນ ໄຟຟ້າ, ນ້ຳປະປາ, ທາງ ປູຢາງ, ລະບົບລະບາຍນ້ຳ, ໂຮງຮຽນ, ໂຮງໝໍ, ຕະຫລາດ, ວັດ, ຫ້ອງການບ້ານ, ປ້ອມຕຳຫລວດ, ຫ້ອງປະຊຸມຂອງໝູ່ບ້ານ ແລະ ອື່ນໆ. ນອກຈາກນັ້ນ ໃນປີ 2018 ໂຮງໄຟຟ້າພະລັງງານຄວາມຮ້ອນຫົງສາ ຍັງໄດ້ອະນຸມັດໃຫ້ ບໍລິສັດສາກົນ ເຂົ້່າກວດສອບ ເພື່ອເຮັດການຢັ້ງຢືນ ມາດຕະຖານ ISO ທັງນີ້ ກໍເພື່ອຮັບປະກັນບໍ່ໃຫ້ເກີດຜົນກະທົບຕໍ່ການດຳລົງຊີວິດ ຂອງປະຊາຊົນ ຢູ່ໃນຂົງເຂດດັ່ງກ່າວ.
#insidelaos
Cr.KPL
