ທ່ານ ບຸນຈັນ ໄຊປັນຍາ ຫົວໜ້າພະແນກກະສິກຳ ແລະ ປ່າໄມ້ ແຂວງຄຳມ່ວນ ລາຍງານວ່າ: ໃນສົກປີ 2018-2019 ທົ່ວແຂວງແມ່ນຈະສູ້ຊົນຜະລິດເຂົ້ານາແຊງໃຫ້ບັນລຸ 10 ພັນເຮັກຕາ ໃນນີ້ຜະລິດເປັນສະບຽນອາຫານ 5.220 ເຮັກຕາ ແລະ ຜະລິດເປັນສິນຄ້າ 4.780 ເຮັກຕາ ໃນຈຳນວນໂຄງການຊົນລະປະທານທັງໝົດ 117 ໂຄງການ ເຊິ່ງໃນນີ້ 64 ໂຄງການແມ່ນຈະຕ້ອງໄດ້ສ້ອມແປງຄືນ ໂດຍທາງພະແນກກະສິກຳ ແລະ ປ່າໄມ້ແຂວງ ໄດ້ປະສານສົມກັບກັບບັນດາເມືອງເພື່ອວາງແຜນ, ຊຸກຍຸ້ປຸກລະດົມພໍ່ແມ່ປະຊາຊົນອະນາໄມຄອງເໝືອງ ແລະ ຈັດຫາຜູ້ປະກອບການສ້ອມແປງ ລະບົບຊົນລະປະທານ ຕາມງົບປະມານທີ່ລັດຖະບານໄດ້ແບ່ງປັນໃຫ້ຈຳນວນ 4,8 ຕື້ກີບ.
ມາຮອດວັນທີ 8 ທັນວາ 2018 ແມ່ນສາມາດສ້ອມແປງສຳເລັດແລ້ວຈຳນວນ 62 ໂຄງການ ແລະ ຍັງອີກ 2 ໂຄງການແມ່ນໄດ້ສ້ອມແປງ ລະບົບຫົວງານສຳເລັດແລ້ວ ຍັງເຫຼືອພຽງແຕ່ປະຕູນ້ຳຍັງບໍ່ທັນຮັບປະກັນ ແຕ່ຄາດວ່າຈະໃຫ້ສຳເລັດໃນຕົ້ນເດືອນທັນວານີ້ ເພື່ອສະໜອງນໍ້າໃຫ້ບັນລຸຕາມເນື້ອທີ່ແຜນ ແລະ ທັນກັບລະດູການຜະລິດ.
ທ່ານ ບຸນຈັນ ໄຊປັນຍາ ກ່າວຕື່ມວ່າ: ສຳລັບການຜະລິດນາແຊງປີນີ້ແມ່ນເປັນຂະບວນຄຶກຄື້ນອັນເນື່ອງມາຈາກ ລະດູນາປີຂອງປະຊາຊົນ ໃນໄລຍະຜ່ານມາແມ່ນຖືກນ້ຳຖ້ວມເສຍຫາຍຫຼາຍ ປະຊາຊົນຈຶ່ງມີຄວາມຕື່ນຕົວສູງໃນການ ຜະລິດເຂົ້ານາແຊງ ເພື່ອທົດແທນ. ມາຮອດວັນທີ 11 ທັນວາ ຊາວກະສິກອນໃນທົ່ວແຂວງແມ່ນໄດ້ສຳເລັດການຕົກກ້າ 100% ແລະ ລົງມືປັກດຳໄດ້ 26%, ສຳລັບການສະໜອງແນວພັນນອກຈາກແຂວງສະໜອງໃຫ້ແລ້ວ ແມ່ນຍັງມີຜູ້ ປະກອບການສະໜັບສະໜູນຕື່ມ ເປັນຕົ້ນແມ່ນເຂດເມືອງໜອງບົກ, ເຊບັ້ງໄຟ, ມະຫາໄຊ ແລະ ຍົມມະລາດ ໂດຍລວມແລ້ວແມ່ນ ສາມາດຕອບສະໜອງໄດ້ໂດຍພື້ນຖານສຳລັບແນວພັນ, ສ່ວນປຸ໋ຍແມ່ນທາງແຂວງໄດ້ມອບໃຫ້ແກ່ ຜູ້ປະກອບການເປັນຜູ້ນຳເຂົ້າ ສ່ວນລັດແມ່ນໄດ້ແກ້ໄຂທາງດ້ານການນະໂຍບາຍໃນການນຳເຂົ້າ ເພື່ອອຳນວຍຄວາມ ສະດວກແກ່ຜູ້ປະກອບການ ແລະ ຕອບສະໜອງໄດ້ຕາມຄວາມຕ້ອງການຂອງຜູ້ຜະລິດ.
ຢ່າງໃດກໍ່ຕາມເຖິງວ່າແຂວງຄຳມ່ວນຈະຖືກຜົນກະທົບເສຍຫາຍໜັກ ແຕ່ໃນທົ່ວແຂວງຍັງສາມາດດຸ່ນດ່ຽງເຂົ້າກິນ ໂດຍສະເລ່ຍໃສ່ຫົວຄົນໃນທົ່ວແຂວງແມ່ນຍັງສາມາດກຸ້ມກິນ, ສາມາດຄ້ຳປະກັນໄດ້ທາງດ້ານສະບຽງອາຫານ ແລະ ຍັງຄ້ຳປະກັນໄດ້ສ່ວນໜຶ່ງໃນການຕອບສະໜອງເຂົ້າເພື່ອສົ່ງອອກທີ່ລັດຖະບານໄດ້ກຳນົດໄວ້.
#insidelaos
ທີ່ມາ: facebook.com/784293368584558