ທ່ານ ທອງໄຊ ອາດຜາສຸກ ຮອງເຈົ້າເມືອງໆຫລວງນໍ້າທາ ແລະ ທ່ານ ເອ ດລຽນ ຄລອກເກ ຫົວໜ້າໂຄງການອະນຸລັກຊິວະນາໆພັນ ໃນເຂດປ່າສະຫງວນແຫ່ງຊາດ ແລະ ແລວເຊື່ອມຕໍ່ ພ້ອມຄະນະທີມງານ ໄດ້ລົງຢ້ຽມ ຢາມ ປະຊາຊົນບ້ານສິນອຸດົມ ເມືອງຫລວງນໍ້າທາ ແຂວງຫລວງນໍ້າທາ ເຊິ່ງເປັນໜຶ່ງ ທີ່ໄດ້ຮັບການສະໜັບສະ ໜູນ ແລະ ສົ່ງເສີມ ວຽກງານຫັດຫະກຳຈັກສານ ແລະ ເຟີນີເຈີ ຈາກໂຄງການ ເພື່ອສ້າງລາຍຮັບເສີມໃຫ້ແກ່ຄອບຄົວ ແລະ ສາມາດແກ້ໄຂຄວາມທຸກຍາກ ເທື່ອລະກ້າວ.
ໂຄງການດັ່ງກ່າວ ໄດ້ເລິ່ມຈັດຕັ້ງປະຕິບັດ ກິດຈະກຳຕົວຈິງແຕ່ເດືອນກຸມພາ 2017 ເປັນຕົ້ນມາ ເຊິ່ງໄດ້ເນັ້ນສົ່ງດ້ານວິຊາຊີບ ຫັດຖະກຳການຈັກ-ສານ ແລະ ເຟີນີເຈີ ເພຶ່ອຊ່ວຍເຫລືອປະຊາຊົນພາຍໃນ 04 ບ້ານເປົ້າໜາຍຄື: ບ້ານ ສົບຊີມ, ບ້ານສິນອຸດົມ, ບ້ານ ຫາດຍອງ ແລະ ບ້ານຫາດນາແລ້ງ, ເມືອງນາແລ ແລະ ເມືອງຫລວງນໍ້າທາ ແຂວງຫລວງນໍ້າທາ ໂດຍໄດ້ແບ່ງອອກເປັນ 8 ກຸ່ມ ຄື: ກຸ່ມເຟີນີເຈີ 4 ກຸ່ມ, ມີສໍາມະຊີກ 37 ຄົນ ແລະ ກຸ່ມຫັດຖະ ກຳຈັກ-ສານ 4 ກຸ່ມ ມີສໍາມະຊີກ 37 ຄົນ, ລວມທັງໜົດ 74 ຄົນ ເຊິ່ງໂຄງການນີ້ ໄດ້ມີສ່ວນຮ່ວມສຳຄັນ ເພື່ອເຮັດປະຊາຊົນໄດ້ເກັບກູ້ໄມ້ປ່ອງແບບຍືນຍົງ. ສຳລັບກຸ່ມຫັດຖະກຳຈັກ-ສານ ມາຮອດປະຈຸບັນສາມາດຜະ ລິດ ແລະ ຈຳໜ່າຍຜະລິດຕະພັນຂອງຕົນ ລວມທັງໜົດ 10 ລ້ານກວ່າກີບ, ສະເລ່ຍລາຍຮັບໄດ້ 279.000 ກີບຕໍ່ຄົນ/ເດືອນ; ກຸ່ມເຟີນີເຈີ ສາມາດຜະລິດ ແລະ ຈຳໜ່າຍຜະລິດຕະພັນ ລວມທັງໜົດ 68 ລ້ານກີບ, ສະເລ່ຍລາຍຮັບເກືອບ 2 ລ້ານກີບຕໍ່ຄົນ.
ສຳລັບແຜນການພັດທະນາ ແລະ ສົ່ງເສີມ ສະມາຊິກໃນຕໍ່ໜ້າ ໄດ້ວາງເປົ້າການຜະລິດໃຫ້ໄດ້ຫລາຍ, ກາຍເປັນສິນຄ້າ ເພຶ່ອສ້າງລາຍຮັບເຂົ້າສູ່ບ້ານ ແລະ ເຂົ້າສູ່ຄອບຄົວແບບຍືນຍົງ, ພ້ອມທັງຜັນຂະຫຍາຍຄວາມຮູ້ ທາງດ້ານ ເຕັກນິກ ວິຊາການ ເພຶ່ອເຮັດໃຫ້ຜະລິດຕະພັນ ໄປສູ່ຂົງເຂດອຶ່ນ, ສູ້ຊົນໃຫ້ຜະລິດຕະພັນໄມ້ປ່ອງ ໃຫ້ໄດ້ຮັບການຢັ້ງຢືນເປັນໜຶ່ງເມືອງໜຶ່ງຜະລິດຕະພັນ ແລະ ສາມາດສ້າງເປັນຕົ້ນແບບການສົ່ງເສີມ ມຸນຄ່າການຕະຫລາດໄມ້ປ່ອງຂອງລາວ.
#insidelaos
#ອິນໄຊລາວ
ທີ່ມາ: KPL
ຮູບປະກອບ:http://rattan.raicyber.com/