ສະພາແຫ່ງຊາດ ຈະສຸມໃສ່ຕິດຕາມກວດກາ 2 ຫົວຂໍ້ໃຫຍ່ ທີ່ຕິດພັນກັບການເກັບລາຍຮັບ ແລະ ການສ້າງວຽກເຮັດງານທຳ ຂອງປະຊາຊົນ ສຳລັບປີ 2019 ເພື່ອຍົກສູງຄຸນນະພາບ ແລະ ປະສິດທິຜົນ ຂອງວຽກງານ ຕິດຕາມກວດກາ ໃຫ້ໄດ້ຮັບຜົນດີ ແລະ ນັບມື້ນັບດີຂຶ້ນ.
ທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ລາຍງານຕໍ່ກອງປະຊຸມສະໄໝສາມັນ ເທືອທີ 6 ຂອງສະພາແຫ່ງຊາດ ຊຸດທີ VIII ວ່າ: ໃນປີ 2019 ສະພາແຫ່ງຊາດ ຈະສຸມໃສ່ຕິດຕາມກວດກາ ການຈັດ ຕັ້ງປະຕິບັດ ກົດໝາຍ ແລະ ນິຕິກຳໃຕ້ກົດໝາຍ ທີ່ພົວພັນກັບການເກັບລາຍຮັບ ເປັນຕົ້ນ ກົດໝາຍວ່າດ້ວຍ ສ່ວຍສາອາກອນ, ກົດໝາຍວ່າດ້ວຍພາສີ, ກົດໝາຍ ວ່າດ້ວຍທີ່ດິນ, ກົດໝາຍວ່າດ້ວຍໄຟຟ້າ ແລະ ອື່ນໆ, ເຊິ່ງເນື້ອໃນຕິດຕາມກວດກວດດັ່ງກ່າວ ຈະລາຍງານຕໍ່ກອງປະຊຸມ ສະໄໝສາມັນ ເທືອທີ 7 ຂອງສະພາແຫ່ງຊາດ ຊຸດທີ VIII. ອີກເປົ້າໝາຍໜຶ່ງ ແມ່ນຕິດຕາມ ກວດກາ ການຈັດຕັ້ງປະຕິບັດ ກົດໝາຍ ແລະ ນິຕິກຳໃຕ້ກົດ ໝາຍ ທີ່ພົວພັນກັບການສ້າງວິຊາຊີບ, ການພັດທະນາສີມື ແຮງງານທີ່ມີຄຸນນະພາບ ຕິດພັນກັບການສ້າງວຽກເຮັດງານທຳ ຂອງປະຊາຊົນ ເປັນຕົ້ນ ກົດໝາຍວ່າດ້ວຍການສຶກສາ, ກົດໝາຍວ່ດ້ວຍ ອາຊີວະສຶກສາ, ກົດໝາຍວ່າດ້ວຍແຮງງານ ໂດຍເນື້ອໃນຕິດຕາມ ກວດກວດດັ່ງກ່າວ ຈະລາຍງານ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII.
ຈຸດປະສົງຂອງການຕິດຕາມກວດກາ ແມ່ນເພື່ອຈັດຕັ້ງຜັນຂະຫຍາຍ ແນວທາງນະໂຍບາຍຂອງພັກ, ລັດຖະທຳ ມະນູນ ແລະ ກົດໝາຍ ໃຫ້ເປັນອັນລະອຽດ ເຂົ້າໃນການເຄື່ອນໄຫວ ວຽກງານຂອງ ສະພາແຫ່ງຊາດ ໂດຍສະ ເພາະ ເພີ່ມທະວີການຈັດຕັ້ງປະຕິບັດ ພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ ປະຈຳປີ 2019 ໃຫ້ມີປະສິດທິຜົນ ແລະ ການແກ້ໄຂຜົນການຕິດຕາມ ກວດກາໃຫ້ມີ ຄວາມສັກສິດ. ນອກຈາກນັ້ນ, ກໍເພື່ອເປັນບ່ອນອີງໃຫ້ຄະນະປະຈຳສະພາແຫ່ງຊາດ, ບັນດາກຳມາທິການ, ຄະນະເລຂາທິການສະພາແຫ່ງຊາດ, ກົງ ຈັກທີ່ຄະນະປະຈຳ ສະພາແຫ່ງຊາດສ້າງຕັ້ງ ໄດ້ນຳໄປຜັນຂະຫຍາຍ ເປັນແຜນການ ຕິດຕາມກວດກາ ລະອຽດຂອງຕົນ.
ທີ່ມາ: ຂປລ
Hits: 5
