ເລຂາທິການສະຫະພັນນັກໜັງສືພິມແຫ່ງອາຊຽນ (CJA)
ສະມາຄົມນັກຂ່າວນັກໜັງສືພິມແຫ່ງປະເທດໄທໄດ້ເປີດໃຈໂອ້ລົມກັບອິນໄຊລາວ ໃນກໍລະນີລາຍການຂ່າວຂອງໄທລາຍການໜຶ່ງ ເຊິ່ງໄດ້ນໍາເອົາຂໍ້ມູນມາຈາກ VOA ກ່ຽວກັບເລື່ອງໂຄງການທາງລົດໄຟ ລາວ-ຈີນ ມານໍາສະເໜີເມື່ອເດືອນທັນວາທີ່ຜ່ານມາ ຈົນສົ່ງຜົນກະທົບຕໍ່ຈິດໃຈຂອງປະຊາຊົນລາວ ໂດຍເນັ້ນໜັກວ່າຜູ້ດຳເນີນລາຍການທັງສອງຄົນ ຕ່າງກໍເສຍໃຈຕໍ່ກັບເຫດການທີ່ເກີດຂຶ້ນ ແລະ ໄດ້ອອກມາຂໍໂທດໃນລາຍການຂ່າວ ໃນວັນທີ 20 ທັນວາ ທີ່ຜ່ານມາ ເຊິ່ງທາງຜູ້ໃຫຍ່ຝ່າຍ ສປປລາວ ໄດ້ຮັບຮູ້ ແລະ ພ້ອມດຳເນີນງານຮ່ວມກັນໃນການຈັດຕັ້ງກອງປະຊຸມຜູ້ນໍາຂ່າວລະດັບອາຊຽນໃນເດືອນມີນາທີ່ຈະມາເຖິງນີ້.
ທ່ານ ຊະວາຣົງ ລິມປັດທະມະປານີ ທີ່ປຶກສາສະມາຄົມນັກຂ່າວແຫ່ງປະເທດໄທ ໄດ້ເລົ່າເຖິງລາຍລະອຽດຂອງເລື່ອງນີ້ວ່າ: “ໄດ້ເວົ້າໂອ້ລົມກັບຜູ້ດຳເນີນລາຍການແລ້ວ ທັງສອງທ່ານກໍຮູ້ສຶກເສຍໃຈທີ່ເກີດເຫດການແບບນີ້ ແລະຈະລະມັດລະວັງໃຫ້ຫຼາຍຂຶ້ນໃນເລື່ອງເຫຼົ່ານີ້ ແລະ ໃນຂໍ້ມູນຕ່າງໆ ເນື່ອງຈາກວ່າຂໍ້ມູນສົ່ງມາຫຼາຍຮູບແບບ ແລະ ຖືກນໍາມາສະເພາະບາງເລື່ອງບາງປະເດັນເຮັດໃຫ້ການຕີຄວາມຂໍ້ມູນຈຶ່ງຜິດພາດ ເຊິ່ງຖືວ່າເຫດການໃນຄັ້ງນີ້ກໍເປັນບົດຮຽນ’’.
“ໃນມື້ຕໍ່ມາຈຶ່ງມີການຂໍໂທດທາງລັດຖະບານລາວ ແລະ ປະຊາຊົນຊາວລາວ ວ່າຂ່າວນີ້ມີຄວາມເຂົ້າໃຈໃນໂຄງການຕ່າງໆຜິດໄປ ຂໍໂທດທີ່ເຮັດໃຫ້ເກີດຄວາມເຂົ້າໃຈຜິດ ແລະ ບໍ່ໄດ້ມີເຈດຕະນາທີ່ຈະວິພາກວິຈານ ຫຼື ໄປດູຖູກປະຊາຊົນລາວ ຫຼື ລັດຖະບານລາວແຕ່ຢ່າງໃດ ແລະ ຫຼັງຈາກນັ້ນກໍມີການຂໍໂທດອີກຄັ້ງໃນລາຍການດຽວກັນນີ້”.
ເຖິງຢ່າງໃດກໍຕາມ, ທ່ານ ຊະວະຣົງ ໄດ້ໃຫ້ຄຳເຫັນເພີ່ມຕື່ມອີກວ່າ: ໃນອີກມຸມໜຶ່ງ ການປະສານງານຄັ້ງນີ້ ກໍສະແດງໃຫ້ເຫັນວ່າ ສື່ມວນຊົນລາວ ແລະ ສື່ມວນຊົນໄທມີສາຍພົວພັນທີ່ແໜ້ນແຟ້ນໃນການໂອ້ລົມ ແລະ ການປະສານຄວາມຮ່ວມມື ເຊິ່ງທັນທີທີ່ໄດ້ຮັບແຈ້ງຈາກທາງລາວ ທາງໄທກໍໄດ້ມີການປະສານງານທັນທີ ແລະ ເມື່ອທາງຜູ້ດຳເນີນລາຍການອອກມາຂໍໂທດແລ້ວ ກໍສົ່ງຄຣິບມາໃຫ້ເບິ່ງ ເຊິ່ງຜູ້ໃຫຍ່ທາງລາວກໍໄດ້ສະແດງຄວາມພໍໃຈຕອບກັບ .
ທ່ານ ດຳຣິດ ວິຣິຍະກຸນ ເລຂາທິການສະຫະພັນນັກໜັງສືພິມແຫ່ງອາຊຽນ (CJA) ກ່າວສະແດງຄວາມເຫັນກ່ຽວກັບເລື່ອງນີ້ວ່າ. “ກໍໄດ້ເບິ່ງເຫັນເຈດຕະນາວ່າ ເປັນການແປຂ່າວຈາກສຳນັກຂ່າວຕ່າງປະເທດ ທີ່ໄດ້ຖືກແປມາອີກເທື່ອໜຶ່ງເຊິ່ງອາດບໍ່ຄົບຖ້ວນ ແລະ ອາດມີການນຳສະເໜີວິພາກວິຈານທີ່ຄາດເຄື່ອນໄປຈາກຄວາມເປັນຈິງ ແລະ ເຮັດໃຫ້ເກີດຄວາມບໍ່ສະບາຍໃຈ ເຊິ່ງເລື່ອງນີ້ ຂ້າພະເຈົ້າເອງກໍໄດ້ໂອ້ລົມກັບກົມສາລະນິເທດກະຊວງການຕ່າງປະເທດຂອງໄທ ແລະ ທາງກະຊວງກໍໄດ້ໃຫ້ຄວາມສຳຄັນກັບເລື່ອງນີ້ ວ່າຖ້າສິ່ງທີ່ສື່ໄປມີຜົນກະທົບຕໍ່ຄວາມຮູ້ສຶກຂອງເພື່ອນບ້ານກໍຕ້ອງມີການປະສານງານກັນ.
ທີ່ປຶກສາສະມາຄົມນັກຂ່າວແຫ່ງປະເທດໄທ
ທັງນີ້ ການດຳເນີນງານຮ່ວມກັນດັ່ງກ່າວ ເປັນໄປຕາມບົດບັນທຶກຄວາມເຂົ້າໃຈຮ່ວມກັນ (MOU) ລະຫວ່າງ ສະມາຄົມນັກຂ່າວແຫ່ງ ສາທາລະນະລັດປະຊາທິປະໄຕປະຊາຊົນລາວ ແລະ ສະມາຄົມນັກຂ່າວນັກໜັງສືພິມແຫ່ງ ປະເທດໄທເມື່ອວັນທີ 15 ກັນຍາ 2015 ທີ່ນະຄອນຫຼວງວຽງຈັນ ຖ້າຫາກມີຂໍ້ມູນຂ່າວສານໃດທີ່ບໍ່ຖືກຕ້ອງ ຫຼື ເກີດຄວາມເຂົ້າໃຈຜິດຂຶ້ນທາງອົງການສື່ມວນຊົນຂອງສອງປະເທດຈະຮ່ວມປະສານງານ ເພື່ອໃຫ້ເກີດຄວາມເຂົ້າໃຈລະຫວ່າງຄົນໃນວົງການສື່ມວນຊົນດ້ວຍກັນ ແລະ ສືບຕໍ່ແກ້ໄຂບັນຫາໄປໃນທາງທີ່ດີ ແລະ ຖືກຕ້ອງ.
“ຜູ້ດຳເນີນລາຍການທີ່ວິຈານເກີນເລີຍໄປ ຫຼື ຄາດເຄື່ອນຈາກຄວາມເປັນຈິງ ກໍພ້ອມແກ້ໄຂ ແລະ ຂໍໂທດຢ່າງເປັນທາງການ ໃນລາຍການທາງໂທລະພາບຂອງຝ່າຍຕົນເອງ ເຊິ່ງເປັນວິທີການທີ່ຖືກຕ້ອງ ເປັນການຮັບຜິດຊອບໃນໜ້າທີ່ຂອງສື່ມວນຊົນ ອີງໃສ່ພື້ນຖານຂອງຄວາມເປັນມືອາຊີບ ແລະ ຈັນຍາບັນດ້ານວິຊາຊີບ ເຊິ່ງໄດ້ເຮັດຢ່າງເປັນທາງການ ຜູ້ທີ່ຮັບຊົມກໍມີຄວາມເຂົ້າໃຈແລ້ວວ່າ ສິ່ງທີ່ສື່ໄປນັ້ນຄວາມຜິດພາດແມ່ນເກີດຈາກຫຍັງ? “
“ສິ່ງໃດທີ່ເຮັດຜິດພາດໄປ ໃຫ້ຄວາມຊີ້ແຈງກັນ ຂໍໂທດກັນ ຂໍອະໄພກັນ ເຊິ່ງພວກເຮົາເອງກໍຢູ່ເທິງພື້ນຖານອັນດຽວກັນ ແລະ ກໍເຊື່ອວ່າ ພວກເຮົາຈະໃຫ້ອະໄພກັນ ແລະ ກັນ“ ທ່ານ ດໍາຣິດ ກ່າວ
ໄທພ້ອມສະໜັບສະໜູນລາວ
ຈັດປະຊຸມຜູ້ນຳຂ່າວລະດັບອາຊຽນ
ກ່ຽວກັບການເດີນທາງມາຍັງນະຄອນຫຼວງວຽງຈັນ ຂອງຕົວແທນສະມາຄົມນັກຂ່າວແຫ່ງປະເທດໄທ ແລະ ສະຫະພັນນັກໜັງສືພິມແຫ່ງອາຊຽນຄັ້ງນີ້ “ທ່ານ ດຳຣິດ ອະທິບາຍວ່າ”: ຈຸດປະສົງກໍເພື່ອເຂົ້າຮ່ວມກອງປະຊຸມກັບສະມາຄົມນັກຂ່າວແຫ່ງ ສປປ.ລາວ ເພື່ອໃຫ້ການສະຫນັບສະໜູນໃນການກຽມງານປະຊຸມຂອງຄະນະກໍາມະການບໍລິຫານສະຫະພັນນັກໜັງສືພິມແຫ່ງອາຊຽນ ເຊິ່ງຈະຈັດຂຶ້ນໃນວັນທີ 27-31 ມີນາ 2019 ທີ່ນະຄອນຫຼວງວຽງຈັນ ໃຫ້ສຳເລັດ ແລະລຸລ່ວງໄປດ້ວຍດີ ພ້ອມສອດຄ່ອງຕາມຖະແຫຼງການວ່າດ້ວຍການເຮັດວຽກຮ່ວມກັນ ແລະ ການພັດທະນາການສ້າງຄວາມຮ່ວມມືລະຫວ່າງອາຊຽນ.
“ການປະຊຸມຜູ້ນໍາອົງກອນສື່ມວນຊົນໃນອາຊຽນກໍຖືເປັນສິ່ງທີ່ຍິ່ງໃຫຍ່ໃນວົງການວິຊາຊີບສື່ມວນຊົນ ເຊິ່ງເປັນອີກບົດບາດໜຶ່ງຂອງລາວ, ເນື່ອງຈາກວ່າໃນອີກ 2 ປີຂ້າງໜ້າ ສປປ.ລາວ ກໍຈະມາຮັບຕໍາແໜ່ງປະທານສະຫະພັນ ເຊິ່ງຖືວ່າການຕຽມການໃນຄັ້ງນີ້ເປັນການຕຽມຮັບກອງປະຊຸມໃຫຍ່ຂອງສະຫະພັນໃນອີກ 2 ປີຂ້າງໜ້າອີກດ້ວຍ” ທ່ານ ດໍາຣິດ ກ່າວປິດທ້າຍ
Hits: 10
