ກົມຄຸ້ມຄອງພະລັງງານ ແລະ ລັດວິສາຫະກິດໄຟຟ້າລາວ ກະຊວງພະລັງງານ ແລະ ບໍ່ແຮ່ ໄດ້ຈັດກອງປະຊຸມຖອດຖອນບົດຮຽນ ການຄຸ້ມຄອງ ແລະ ດຳເນີນທຸລະກິດ ບໍລິການກໍ່ສ້າງ ແລະ ຕິດຕັ້ງໄຟຟ້າ ປະຈຳປີ 2018 ເຊິ່ງໄດ້ຊີ້ໃຫ້ເຫັນຂໍ້ບົກຜ່ອງ ໃນໄລຍະຜ່ານມາ, ພ້ອມທັງມີແຜນປັບປຸງແບບແຜນວິທີການເຮັດວຽກ ການໃຫ້ບໍລິການຕິດຕັ້ງໄຟຟ້າຮັບໃຊ້ປະຊາຊົນ ໃຫ້ສັ້ນລົງ ຈາກ 6 ຂັ້ນຕອນມາເປັນ 3 ຂັ້ນຕອນ ແລະ ຈາກ 134 ວັນມາເປັນ 50 ວັນ.
ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ກ່າວວ່າ: ການພັດທະນາອຸດສາຫະກຳພະລັງງານກໍຄືການດຳເນີນກິດຈະການກໍ່ສ້າງ ແລະ ຕິດຕັ້ງໄຟຟ້າ ແມ່ນຫລີກລ້ຽງບໍ່ໄດ້ ທີ່ຈະມີຈຸດອ່ອນ ແລະ ຂໍ້ບົກຜ່ອງ ທີ່ຕ້ອງໄດ້ພ້ອມກັນ ຄົ້ນຄວ້າປຶກສາຫາລື ແລະ ແກ້ໄຂ ເປັນຕົ້ນ ຂອດການໃຫ້ບໍລິການຕິດຕັ້ງໄຟຟ້າຊັກຊ້າ ເຮັດໃຫ້ມີຫາງສຽງຈົ່ມວ່າຈາກສັງຄົມ ກໍຄື ຜູ້ຊົມໃຊ້ເຊິ່ງລັດວິສາຫະກິດໄຟຟ້າລາວ ຕ້ອງຮີບຮ້ອນແກ້ໄຂບັນຫາດັ່ງກ່າວ ໃຫ້ສອດຄ່ອງ ແລະ ເໝາະສົມ. ປັດ ຈຸບັນ ອີງຕາມການປະເມີນຂອງທະນາຄານໂລກປີ 2017 ດັດຊະນີຍ່ອຍຕົວຊີ້ວັດການຕິດຕັ້ງໄຟຟ້າລາວ ແມ່ນຕິດອັນດັບທີ 155 ຂອງໂລກ ແລະ ເປັນອັນດັບທ້າຍສຸດໃນອາຊຽນ (ມຽນມາ ອັນດັບ 149 ແລະ ກຳປູເຈຍ ອັນດັບ 136). ສະນັ້ນ ຕ້ອງໄດ້ພັດທະນາໃຫ້ກ້າວຂຶ້ນເລື້ອຍໆ ເພື່ອແນໃສ່ເຮັດໃຫ້ເປົ້າໝາຍການພັດທະນາການຫັນເປັນອຸດສາຫະກຳ ແລະ ທັນສະໄໝ ຕາມທິດພັດທະນາແບບເປັນມິດກັບສິ່ງ ແວດລ້ອມ ແລະ ມີລັກສະນະຍືນຍົງ ມີຜົນສຳເລັດເປັນກ້າວໆ.
ທ່ານ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ຮູ້ອີກວ່າ: ວຽກງານກໍ່ສ້າງ ແລະ ຕິດຕັ້ງໄຟຟ້າ ແມ່ນວຽກງານສຳຄັນທີ່ພົວພັນເຖິງການເຄື່ອນໄຫວ ທຸກກຸ່ມເປົ້າໝາຍຂອງຜູ້ຊົມໃຊ້ ຢູ່ໃນທົ່ວສັງຄົມ ເພື່ອໃຫ້ສາມາດເຂົ້າເຖິງການຊົມໃຊ້ກະແສໄຟຟ້າ ໃຫ້ມີຄວາມສະດວກສະບາຍ ເຊິ່ງໃນໄລຍະຜ່ານມາ ການພັດທະນາອຸດສາຫະກຳ ພະລັງງານໄຟຟ້າຢູ່ລາວ ໄດ້ມີບາດກ້າວຂະຫຍາຍຕົວຢ່າງຕໍ່ເນື່ອງ ແລະ ໜັກແໜ້ນສົມຄວນ. ມາຮອດປັດຈຸບັນ ປະເທດລາວມີແຫລ່ງ ຜະລິດພະລັງງານໄຟຟ້າທັງໝົດ 61 ແຫ່ງ ລວມກຳລັງການຕິດຕັ້ງ 7.207 ເມກາວັດ, ສາມາດຜະລິດພະລັງງານໄຟຟ້າໄດ້ 37.366 ກິກາວັດໂມງຕໍ່ປີ. ໃນນີ້, ມີເຂື່ອນຜະລິດກະແສໄຟຟ້າ ຂະໜາດກາງຫາໃຫຍ່ 32 ແຫ່ງ, ເຂື່ອນຂະໜາດນ້ອຍ 15 ເມກາວັດລົງມາມີ 21 ແຫ່ງ, ໄຟຟ້າຖ່ານຫີນ 1 ແຫ່ງ, ໄຟຟ້າພະລັງງານທົດແທນ 2 ແຫ່ງ ແລະ ໂຄງການໄຟຟ້າແສງຕາເວັນ 5 ແຫ່ງ. ພ້ອມນີ້, ຍັງມີໂຄງການກໍ່ສ້າງແຫລ່ງ ຜະລິດພະລັງງານໄຟຟ້າ ທີ່ພວມດຳເນີນການກໍ່ສ້າງ ແລະ ຄາດວ່າຈະສຳເລັດປີ 2019-2020 ຈຳນວນ 36 ໂຄງການ ມີກຳລັງຕິດຕັ້ງ 4.184 ເມກາວັດ ສາມາດຜະລິດພະລັງງານໄດ້ 20.892,99 ກິກາວັດໂມງຕໍ່ປີ.
ທີ່ມາ: ຂປລ