ເທດສະການກຸດຈີນ ແລະ ບຸນປີໃໝ່ປະຈຳຊາດ ຫວຽດນາມ ບັນດາເຈົ້າຂອງຫ້າງຮ້ານໃນນະຄອນຫລວງວຽງຈັນ, ໄດ້ສະຫລອງກັນຢ່າງຄືກຄື້ນ ໂດຍໄດ້ມີການເຊື້ອເຊີນໃຫ້ຄະນະສິງໂຕ ມາສະແດງພາຍໃນຮ້ານຂອງຕົນ, ຕາມຄວາມເຊື່ອມາແຕ່ບູຮານ ການເຊີດສິງໂຕແມ່ນຈະນຳເອົາຄວາມໂຊກດີມາໃຫ້, ຈະຊື້ໄດ້ຂາຍໝານ, ລ້ຳລວຍ ແລະ ຈະສາມາດປັດເປົ່າສິ່ງບໍ່ດີອອກໄປໃຫ້ໝົດ.
ທ່ານ ນາງ ສັນທະນີ ໃສມະນີວັນ ຫົວໜ້າຄະນະສິງໂຕ-ມັງກອນ ລູກຫລານພໍ່ເລັງ ໄດ້ໃຫ້ສຳພາດວ່າ: ການເຊີດສິງໂຕ ແມ່ນສິລະປະປະເພດໜຶ່ງ ທີ່ມີມາແຕ່ດົນນານແລ້ວ ແລະ ກາຍເປັນວັດທະນະທໍາທີ່ເປັນເອກະລັກສະເພາະ ໃນໂອກາດບຸນປີໃໝ່ປະຈໍາຊາດ ຂອງຊາວຫວຽດນາມ ແລະ ຊາວຈີນ. ເຊິ່ງການເຊີດສິງໂຕຕ້ອງມີເຕັກນິກທີ່ຄ່ອງແຄ້ວ ແລະ ລະອຽດ ໃນແຕ່ລະຈັງຫວະ, ຜູ້ສະແດງຕ້ອງເຊື່ອມຕົວເຂົ້າກັບສິງໂຕ ເພື່ອຖ່າຍທອດເຖິງຜູ້ຊົມໃຫ້ຮູ້ສຶກມ່ວນຊື່ນ ແລະ ໂກດແຄ້ນ, ຮັກແພງ, ຕ້ອງວາດພາບສິງໂຕປຽບເໝືອນສັດໂຕໜຶ່ງ ທີ່ກໍາລັງຈອບຫາເຫຍື່ອ ຫລື ກໍາລັງນອນພັກຜ່ອນ, ຮູບແບບການເຊີດສິງ ໂຕຊຸດເຄື່ອງແບບຕ້ອງມີສີສັນ, ຮຸ່ງເຮືອງເຫລືອງເຫລື້ອມພໍສົມຄວນ, ບັນຈຸກໍາລັງແຮງ, ຄວາມສວຍງາມ ແລະ ເຊື່ອກັນວ່າການເຊີດສິງໂຕ ແມ່ນຈະນຳຄວາມໂຊກດີມາສູ່, ສາມາດປັດເປົ່າສິ່ງໂຊກຮ້າຍໃຫ້ໝົດໄປ.
ນາງ ມີມີ່ ລິດດາວົງ ເຈົ້າຂອງຮ້ານຂາຍຄຳ ທັດສະພອນ ໄດ້ໃຫ້ຮູ້ວ່າ: ແຕ່ລະປີໄດ້ເຊີນໃຫ້ຄະນະສິງໂຕມາສະແດງພາຍໃນຮ້ານ ເພື່ອຈະໄດ້ນຳເອົາຄວາມໂຊກດີມາໃຫ້ ແລະ ປັດເປົ່າສິ່ງບໍ່ດີອອກໄປ, ພ້ອມທັງເປັນການອະນຸລັກວັດທະນະທຳ ແລະ ຮີດຄອງປະເພນີ ຂອງຊາວຫວຽດນາມ ແລະ ຈີນ ນຳອີກ.
ທີ່ມາ: ຂປລ
