ບໍ່ດົນຜ່ານມານີ້, ທີ່ຫ້ອງປະຊຸມຂອງ ທະນາຄານໂລກ ປະຈຳ ສປປ ລາວ, ກະຊວງການເງິນ ໂດຍມີ ທ່ານ ອັງຄານສະດາ ມ່ວງຄຳ ຮອງຫົວໜ້າກົມການເງິນຕ່າງປະເທດ ແລະ ຄຸ້ມຄອງໜີ້ສິນ ເປັນຫົວໜ້າຄະນະ ຕາງໜ້າໃຫ້ ຝ່າຍ ສປປ ລາວ ແລະ ທ່ານ ນາງ ແຟນນີ່ ໄວເນີ (Fanny Weiner) ເປັນຫົວໜ້າຄະນະ ຕາງໜ້າໃຫ້ຝ່າຍ ກຸ່ມການພັດທະນາສາກົນ, ທະນາຄານໂລກ ໄດ້ເຂົ້າຮ່ວມພິທີການເຈລະຈາຂໍກູ້ຢືມເງິນ ມູນຄ່າ 20 ລ້ານໂດລາສະຫະລັດ ກັບທະນາຄານໂລກ.
ເງິນກູ້ຢືມດັ່ງກ່າວແມ່ນຈະນຳໃຊ້ເຂົ້າໃນການຈັດຕ້ັງປະຕິບັດ ໂຄງການສົ່ງເສີມຄວາມອາດສາມາດ ໃນການຄຸ້ມຄອງການເງິນແຫ່ງລັດ ຜ່ານລະບົບອີເລັກໂທຼນິກ (Enhancing PFM through ICT and Skill Project: E–FITS) ເຊິ່ງເປັນໂຄງການຢູ່ໃນແຜນຍຸດທະສາດການຮ່ວມມື ລະຫວ່າງ ລັດຖະບານ ສປປ ລາວ ແລະ ທະນາຄານໂລກ ສຳລັບປີ 2019-2025 ແລະ ເປັນການຈັດຕັ້ງປະຕິບັດ ຍຸດທະສາດ ການຄຸ້ມຄອງການເງິນແຫ່ງລັດເປັນທັນສະໄໝ ກໍ່ຄືຈັດຕັ້ງປະຕິບັດ ວິໄສທັດ ຮອດປີ 2030 ແລະ ຍຸດທະສາດພັດທະນາການເງິນແຫ່ງລັດ ຮອດປີ 2025; ໂດຍຈະນຳໃຊ້ບ້ວງເງິນດັ່ງກ່າວເຂົ້າໃນ 03 ອົງປະກອບໜ້າວຽກ ດັ່ງນີ້:
- ອົງປະກອບທີ 01 ລວມມີການຈັດຊື້ ແລະ ການຈັດຕັ້ງປະຕິບັດ ລະບົບຄຸ້ມຄອງຂໍ້ມູນຂ່າວສານການເງິນ ແຫ່ງລັດ (Financial Management Information system: FMIS);
- ອົງປະກອບທີ 02 ການຝຶກອົບຮົມສ້າງຄວາມອາດສາມາດທາງດ້ານວິຊາການ ທີ່ຕິດພັນກັບ ການຄຸ້ມຄອງການເງິນພາກລັດ ແລະ ການຝຶກອົບຮົມຜູ້ນຳໃຊ້ ລະບົບ FMIS;
- ອົງປະກອບທີ 03 ການບໍລິຫານຄຸ້ມຄອງ ແລະ ຈັດຕັ້ງປະຕິບັດໂຄງການ ໂດຍມີໜ່ວຍງານປະສານງານ (Project Implementation Unit: PIU).
ໂຄງການສົ່ງເສີມຄວາມອາດສາມາດ ໃນການຄຸ້ມຄອງການເງິນແຫ່ງລັດ ຜ່ານລະບົບອີເລັກໂທຼນິກ (E–FITS) ແມ່ນຄວາມຮັບຜິດຊອບຂອງກະຊວງການເງິນ ເປັນຜູ້ຈັດຕັ້ງປະຕິບັດ, ພ້ອມກັນນັ້ນ, ໜ່ວຍງານຈັດຕັ້ງປະຕິບັດແຜນງານການປະຕິຮູບລະບົບຄຸ້ມຄອງການເງິນແຫ່ງລັດ (Project Implementation Unit: PIU) ໄດ້ຮັບການແຕ່ງຕັ້ງ ໂດຍພາຍໃຕ້ການຊີ້ນຳຂອງ ກົມນະໂຍບາຍການເງິນ ແລະ ນິຕິກຳ ໃນນາມກອງເລຂາ ຄະນະຈັດຕັ້ງປະຕິບັດ ການປະຕິຮູບລະບົບຄຸ້ມຄອງການເງິນແຫ່ງລັດ.
ຜ່ານການເຈລະຈາກັນໃນຄັ້ງນີ້ ທັງສອງຝ່າຍແມ່ນໄດ້ຕົກລົງເຫັນດີເປັນເອກະພາບຕໍ່ຮ່າງ ສັນຍາເງິນກູ້ມູນຄ່າ 20 ລ້ານ ໂດລາ ແລະ ຈະນຳສະເໜີລາຍງານຄະນະນຳກະຊວງການເງິນ ເພື່ອຂໍທິດຊີ້ນຳໃນການດຳເນີນຂັ້ນຕອນການເຊັນສັນຍາ.