ເມືອງຊະນະຄາມ ແຂວງວຽງຈັນ ເປັນເມືອງໜຶ່ງທີ່ມີທ່າແຮງດ້ານການບໍລິການທາງຜ່ານ ແລະ ຍັງຖືເອົາການຜະລິດກະສິກຳເປັນສິນຄ້າເພື່ອສ້າງລາຍຮັບໃຫ້ກັບປະຊາຊົນ, ຂະນະທີ່ໃນປີ 2019 ນີ້ເມືອງດັ່ງກ່າວໄດ້ຕັ້ງເປົ້າໝາຍໃນການຜະລິດກະສິກຳເປັນສິນຄ້າຊຶ່ງຈະສາມາດສ້າງລາຍຮັບໃຫ້ໄດ້ປະມານ 3 ຮ້ອຍ ກວ່າຕື້ກີບຈາກທີ່ເຄີຍໄດ້ 265 ຕື້ກວ່າກີບ ໃນປີ 2018 ຜ່ານມາ.
ທ່ານ ບຸນຊ່ວງ ວັນສີ ຫົວໜ້າຫ້ອງການກະສິກຳ ແລະປ່າໄມ້ເມືອງຊະນະຄາມ ແຂວງວຽງຈັນ ໄດ້ລາຍງານໃຫ້ຮູ້ວ່າ: ຊະນະຄາມເປັນເມືອງໜຶ່ງທີ່ມີທ່າແຮງບົ່ມຊ້ອນດ້ານການປູກຝັງ ແລະ ການລ້ຽງສັດເພື່ອບໍລິໂພກ ແລະຜະລິດເປັນສິນຄ້າ, ທັງນີ້ກໍເພາະວ່າເມືອງຊະນະຄາມສາມາດເຮັດນາໄດ້ 2 ລະດູ ແລະມີລະ ບົບຊົນລະປະທານເອື້ອອຳນວຍຄວາມສະດວກໃນການຜະລິດກະສິກຳເປັນສິນຄ້າ, ດັ່ງນັ້ນ ໃນປີ 2018 ຜ່ານມາ, ສະເພາະການຜະລິດເຂົ້າຂອງເມືອງໃນຈຳ ນວນ 8 ພັນກວ່າເຮັກຕາສາມາດໃຫ້ຜົນຜະລິດໄດ້ທັງໝົດ 32,28 ພັນໂຕນ, ສະເລ່ຍໃຫ້ພົນລະເມືອງແລ້ວແມ່ນໄດ້ 792 ກິໂລຕໍ່ຄົນຕໍ່ປີ, ສ່ວນການຜະ ລິດພືດຊຶ່ງອັນພົ້ນເດັ່ນແມ່ນມັນຕົ້ນ, ກ້ວຍ ແລະປາມນ້ຳມັນ, ສຳລັບການລ້ຽງສັດເພື່ອສະໜອງທາດຊີ້ນໄດ້ 2,16 ພັນ ໂຕນ, ສະເລ່ຍໃສ່ຫົວຄົນໄດ້ 53 ກິໂລຕໍ່ຄົນຕໍ່ປີ, ພ້ອມນັ້ນຍັງສາມາດຂະຫຍາຍພັນເຂົ້າ ແລະພັນສັດເພື່ອຂະຫຍາຍໃນລະດູການຜະລິດຕໍ່ໜ້າອີກດ້ວຍ.
ພ້ອມດຽວກັນນັ້ນ, ໃນການຜະລິດກະສິກຳເປັນສິນຄ້າຂອງປີຜ່ານມາ, ເມືອງສາມາດສ້າງມູນຄ່າໄດ້ທັງໝົດ 265,80; ຕື້ກີບ, ໃນນັ້ນປູກພືດເປັນສິນຄ້າ 1,66 ແສນໂຕນລວມເປັນມູນຄ່າ 206 ຕື້ກວ່າກີບ(ຕົ້ນຕໍແມ່ນ ເຂົ້າ, ສາລີ, ໝາກເດືອຍ, ມັນຕົ້ນ, ກ້ວຍ, ໝາກຂາມຫວານ, ປາມນ້ຳມັນ, ຢາງພາລາ, ຂະຫຍາຍພັນໄມ້ໃຫ້ໝາກ ແລະອື່ນໆ), ນອກນັ້ນແມ່ນໄດ້ຈາກການລ້ຽງສັດ.
ທ່ານ ບຸນຊ່ວງ ວັນສີ ໃຫ້ຮູ້ອີກວ່າ: ເພື່ອສືບຕໍ່ເຮັດໃຫ້ວຽກງານການຜະລິດເປັນສິນຄ້າຂອງເມືອງເດີນໜ້າຕໍ່ໄປ ແລະ ບັນລຸຕາມລະດັບຄາດໝາຍໃນປີ 2019, ເມືອງຈຶ່ງວາງຄາດໝາຍສູ້ຊົນໃນການຜະລິດກະສິກຳເປັນສິນຄ້າໃຫ້ໄດ້ 1,63 ແສນໂຕນຄິດເປັນມູນຄ່າ 306,27 ຕື້ ກີບ, ໂດຍສ່ວນຫຼາຍແມ່ນຈະສຸມໃສ່ພືດເສດຖະກິດທີ່ເປັນປາຍແຫຼມເຊັ່ນ: ເຂົ້າ, ສາລີແຂງ, ປາມນ້ຳມັນ, ມັນຕົ້ນ, ກ້ວຍ, ໝາກຂາມຫວານ, ໝາກເດືອຍ ແລະ ພືດອື່ນໆ, ສ່ວນການລ້ຽງສັດຈະສາມາດຜະລິດເພື່ອເປັນສິນຄ້າໃຫ້ໄດ້ທັງໝົດ 2,28 ແສນໂຕນ ແລະປາໃຫ້ໄດ້ 989 ໂຕນ ລວມເປັນມູນຄ່າ 54 ຕື້ກວ່າກີບ.
ທີ່ມາ: ນສພ ເສດຖະກິດ-ສັງຄົມ