ນະຄອນຫຼວງ ຍົກລະດັບ ແລະ ຂະຫຍາຍທໍ່, ໂຮງງານນ້ຳປະປາຢູ່ຫຼາຍເມືອງເພື່ອໃຫ້ປະຊາຊົນໄດ້ຊົມໃຊ້ນ້ຳສະອາດ, ຖືກຫຼັກອະນາໄມ ແຕ່ກໍ່ຍັງມີບາງບ້ານທີ່ຢູ່ຫ່າງໄກສອກຫຼີກທີ່ຍັງບໍ່ສາມາດຂະຫຍາຍທໍ່ສົ່ງໄປໄດ້ເຖິງ.
ພິທີ ມອບ-ຮັບ ແລະ ເປີດການນຳໃຊ້ໂຄງການຂະຫຍາຍທໍ່, ປ່ຽນຖ່າຍລະບົບທໍ່ ແລະ ປັບປຸງສິ່ງອຳນວຍຄວາມສະດວກ ລັດວິສາຫະກິດນ້ຳປະປາ ນະຄອນຫຼວງ, ທຶນກູ້ຢືມຈາກ ບໍລິສັດ NORINCO ຈັດຂຶ້ນໃນວັນທີ 27 ກຸມພາ 2019 ຜ່ານມາທີ່ບ້ານຂົວກາງແສນ ເມືອງ ນາຊາຍທອງ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງທ່ານ ປອ. ສີນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ຫວັງ ຊີ ຮຸຍ ທູດທີ່ປຶກສາ ເສດຖະກິດ-ການຄ້າ ສປ ຈີນ ປະຈຳລາວ, ທ່ານ ຮອງລັດຖະມົນຕີ, ຫົວໜ້າກົມ, ເຈົ້າເມືອງເຂົ້າຮ່ວມ.
ທ່ານ ຄຳເຜີຍ ວົງສາຄຳຜຸຍ ຜູ້ອຳນວຍການໃຫຍ່ ລັດວິສາຫະກິດນ້ຳປະປາ ນະຄອນຫຼວງວຽງຈັນ ກ່າວວ່າ: ເພື່ອຕອບສະໜອງຕາມຄວາມຕ້ອງການນ້ຳປະປາຢູ່ໃນນະຄອນຫຼວງນັບມື້ສູງຂຶ້ນຕາມຈຳນວນປະຊາກອນທີ່ເພີ່ມຂຶ້ນ ແລະ ຄວາມສາມາດໃນການສະໜອງທີ່ມີຢ່າງຈຳກັດ ໃນປີ 2017 ບໍລິສັດ NORINCO ຈາກ ສປ ຈີນ ໄດ້ສະໜອງທຶນກູ້ຢືມດອກເບ້ຍຕ່ຳໃຫ້ກັບລັດຖະບານກໍ່ຄືນະຄອນຫຼວງວຽງຈັນຈຳນວນ 100 ລ້ານໂດລາສະຫະລັດ ເພື່ອມາຂະຫຍາຍ, ປັບປຸງ, ກໍ່ສ້າງລະບົບນ້ຳປະປາຂະໜາດນ້ອຍ, ຂະຫຍາຍທໍ່ສົ່ງ ແລະ ກໍ່ສ້າງອາຄານຕ່າງໆ ຢູ່ໃນຫຼາຍເມືອງຕາມໜ້າວຽກຕົວຈິງ ປັດຈຸບັນໂຄງການດັ່ງກ່າວສຳເລັດ 100% ແລ້ວ ຈະເຮັດໃຫ້ລັດວິສາຫະກິດນ້ຳປະປາ ນະຄອນຫຼວງມີກຳລັງການຜະລິດນ້ຳປະປາອອກສູ່ຄົວເຮືອນປະມານ 340.000-350.000 ແມັດກ້ອນ/ວັນ ກວມເອົາ 90%-95%ໃນທົ່ວນະຄອນຫຼວງ.
ແນວໃດກໍ່ຕາມນັບທັງໂຄງການເກົ່າທີ່ມີຢູ່ແລ້ວ ແລະ ໂຄງການໃໝ່ນີ້ນະຄອນຫຼວງສາມາດເວົ້າໄດ້ວ່າສະໜອງນ້ຳປະປາຢູ່ 4 ຕົວເມືອງໃນໄດ້ແລ້ວ 100% ສ່ວນບາງບ້ານທີ່ຢູ່ໃນຈຳນວນ 5 ເມືອງນອກຂອງນະຄອນຫຼວງອາດຈະມີບາງບ້ານທີ່ຢູ່ຫ່າງໄກສອກຫຼີກເທົ່ານັ້ນທີ່ບໍ່ສະມາດເຂົ້າໄປເຖິງ.
ທ່ານ ຕົງ ຈີ້ເຟີງ ຜູ້ຊ່ວຍຜູ້ອຳນວຍການໃຫຍ່ບໍລິສັດ NORINCO ກ່າວວ່າ: NORINCO ໄດ້ປະກອບທຸລະກິດຫຼາຍຂະແໜງການໃຫຍ່ໃນ ສປປ ລາວ ນັບແຕ່ຊຸມປີ 1990 ໂຄງການນ້ຳປະປານະຄອນຫຼວງວຽງຈັນເລີ່ມລົງມືກໍ່ສ້າງມາແຕ່ຕົ້ນປີ 2017 ສຳເລັດໃນວັນທີ 15 ມັງກອນ 2019 ເຊິ່ງມີເນື້ອທີ່ກໍ່ສ້າງທໍ່ນ້ຳໃໝ່ມີລວງຍາວ 427 ກິໂລແມັດ, ປ່ຽນທໍ່ເກົ່າລວງຍາວ 152 ກິໂລແມັດ, ອ່າງເກັບນ້ຳໃໝ່ 3 ແຫ່ງ, ໂຮງງານຜະລິດນ້ຳ 2 ແຫ່ງ ແລະ ອາຄານ, ສຳນັກງານຫ້ອງການຈຳນວນໜຶ່ງ.