ກອງປະຊຸມຝຶກອົບຮົມວຽກງານການໃຫ້ນະໂຍບາຍສົ່ງເສີມການລົງທຶນ ແລະ ເຜີຍແຜ່ບາງນິຕິກຳລຸ່ມກົດໝາຍວ່າດ້ວຍ ການສົ່ງເສີມການລົງທຶນ ສະບັບປັບປຸງ ປີ 2016 ໄດ້ຈັດຂຶ້ນໃນວັນທີ 5 ມີນາ 2019 ຜ່ານມາ ທີ່ກະຊວງແຜນການ ແລະ ການລົງທຶນ ໂດຍການເປັນປະທານຂອງ ທ່ານ ນາງ ຄໍາຈັນ ວົງແສນບູນ ຮອງລັດຖະມົນຕີກະຊວງແຜນການ ແລະ ການລົງທຶນ ເຊິ່ງມີບັນດາພະແນກ ແຜນການ ແລະ ການລົງທຶນ, ພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງໃນຂອບເຂດທົ່ວປະເທດເຂົ້າຮ່ວມ.
ທ່ານ ນາງ ຄໍາຈັນ ວົງແສນບູນ ກ່າວວ່າ: ສປປ ລາວ ມີກົດໝາຍວ່າດ້ວຍສົ່ງເສີມການລົງທຶນໃນຊຸມທ້າຍປີ 1980 ແລະ ກໍ່ໄດ້ມີການປັບປຸງມາໂດຍຕະຫຼອດ ມາຮອດປີ 2016 ໄດ້ມີການປັບປຸງເປັນຄັ້ງທີ 4 ກົດໝາຍວ່າດ້ວຍສົ່ງເສີມການລົງທຶນ ສະບັບປັບປຸງ ປີ 2016 ໄດ້ຖືກຮັບຮອງເອົາໂດຍສະພາແຫ່ງຊາດ, ກະຊວງ ແຜນການ ແລະ ການລົງທຶນ ໄດ້ຈັດຕັ້ງ ແລະ ຜັນຂະຫຍາຍໂດຍສ້າງນິຕິກຳລຸ່ມກົດໝາຍສຳເລັດແລ້ວ 11 ສະບັບ ແລະ ກຳລັງສ້າງນິຕິກຳລຸ່ມກົດໝາຍຈຳນວນໜຶ່ງເພື່ອໃຫ້ມີຂໍ້ສະດວກໃນການຈັດຕັ້ງປະຕິບັດທີ່ເປັນເອກະພາບໃນທົ່ວປະເທດ ໂດຍແນໃສ່ອຳນວຍຄວາມສະດວກແກ່ນັກທຸລະກິດທີ່ຈະມາລົງທຶນໃນ ສປປ ລາວ ໃຫ້ມີຄວາມສະດວກສະບາຍວ່ອງໄວຂຶ້ນກວ່າເກົ່າ.
ກອງປະຊຸມ ແມ່ນໄດ້ຮັບຟັງການສະເໜີບົດກ່ຽວກັບບົດແນະນຳວ່າດ້ວຍການໃຫ້ນະໂຍບາຍສົ່ງເສີມການລົງທຶນດ້ານພາສີ ແລະ ອາກອນມູນຄ່າເພີ່ມ ສຳລັບແຜນນຳເຂົ້າຂອງວິສາຫະກິດ ສະບັບເລກທີ 01/ຄລທ.ສ, ລົງວັນທີ 02 ມັງກອນ 2019 ຈາກກົມສົ່ງເສີມການລົງທຶນ, ບົດສະເໜີກ່ຽວກັບລະບຽບການ ແລະ ຂັ້ນຕອນການແຈ້ງພາສີແກ່ບັນດາວິສາຫະກິດທີ່ໄດ້ຮັບນະໂຍບາຍສົ່ງເສີມການລົງທຶນຈາກກົມພາສີ, ກະຊວງການເງິນ, ບົດລະບຽບ ແລະ ຂັ້ນຕອນກ່ຽວກັບການນຳໃຊ້ແບບຟອມແຜນການປະຈຳປີຂອງບັນດາໂຮງງານເຮັດການຜະລິດຈາກກົມອຸດສາຫະກຳ ແລະ ການຄ້າ
ເພື່ອແນ່ໃສ່ການຈັດຕັ້ງປະຕິບັດການໃຫ້ນະໂຍບາຍດ້ານພາສີ ແລະ ອາກອນມູນຄ່າເພີ່ມໃຫ້ຖືກຕ້ອງຕາມຂັ້ນຕອນ ແລະ ວິທີການດຳເນີນງານໃນການອະນຸມັດຮັບຮອງ ແຜນນຳເຂົ້າຕາມກົດໝາຍ ແລະ ລະບຽບການກຳນົດໃຫ້ມີຄວາມເປັນເອກະພາບລະຫວ່າງຂັ້ນສູນກາງ ແລະ ທ້ອງຖິ່ນ ພ້ອມກັນນີ້ກໍ່ຍັງໄດ້ຮັບຟັງບົດສະເໜີກ່ຽວກັບດຳລັດວ່າດ້ວຍການຮັບຮອງເອົາບັນຊີກິດຈະການຄວບຄຸມ ແລະ ກິດຈະການສຳປະທານຂອງ ສປປ ລາວ ສະບັບເລກທີ 03/ນຍ ລົງວັນທີ 10 ມັງກອນ 2019, ຄໍາແນະນໍາກ່ຽວກັບການພິຈາລະນາອະນຸມັດການລົງທຶນ ແລະ ກົນໄກການຄຸ້ມຄອງທີ່ດິນໃຫ້ເຊົ່າ ຫຼື ສຳປະທານ ສຳລັບການປູກພືດກະສິກຳ, ຂໍ້ຕົກລົງວ່າດ້ວຍການວາງເງິນຄ້ຳປະກັນສຳລັບກິດຈະການສຳປະທານ ສະບັບເລກທີ 2735/ກຜທ, ລົງວັນທີ 02 ພະຈິກ 2018.