ພັກ ແລະ ລັດຖະບານ ຖືສຳຄັນຕໍ່ການພັດທະນາແມ່ຍິງ ດ້ວຍການປະຕິບັດນະໂຍບາຍພັດທະນາສົ່ງເສີມຄວາມກ້າວໜ້າປົກປ້ອງສິດ ແລະ ຜົນປະໂຫຍດອັນຊອບທຳ ຂອງແມ່ຍິງໂດຍການສ້າງທຸກເງື່ອນໄຂໃຫ້ແມ່ຍິງມີສຸຂະພາບແຂງແຮງ ມີຄວາມຮູ້ຄວາມສາມາດມີຄຸນສົມບັດສິນທຳປະຕິວັດມີວຽກເຮັດງານທຳ ແລະ ມີສິດເທົ່າທຽມກັບເພດຊາຍ ໂດຍບໍ່ຈຳແນກຖານະດ້ານການເມືອງ ເສດຖະກິດວັດທະນະທຳສັງຄົມ.
ສະນັ້ນ, ພັກ ແລະ ລັດຖະບານ ຈຶ່ງໄດ້ສ້າງກົດໝາຍວ່າດ້ວຍການພັດທະນາ ແລະ ການປົກປ້ອງແມ່ຍິງ ອອກມາເພື່ອຮອງຮັບ ແລະ ຍົກສູງ ຖານະບົດບາດຂອງແມ່ຍິງ; ກຳນົດເນື້ອໃນພື້ນຖານ, ມາດຕະການຂອງການພັດທະນາ ແລະ ປົກປ້ອງສິດຜົນປະໂຫຍດອັນຊອບທຳຂອງແມ່ຍິງ, ຄວາມຮັບຜິດຊອບຂອງລັດ, ສັງຄົມ ແລະ ຄອບຄົວຕໍ່ແມ່ຍິງແນໃສ່ສົ່ງເສີມຄວາມຮູ້ຄວາມສາມາດ, ຄຸນສົມບັດສິນທຳປະຕິວັດ, ຄວາມສະເໝີພາບ ຍິງ-ຊາຍ, ລົບລ້າງທຸກຮູບການຈຳແນກຕໍ່ແມ່ຍິງ, ສະກັດກັ້ນ ແລະ ຕ້ານການຄ້າແມ່ຍິງ ແລະ ເດັກນ້ອຍ, ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍໃນຄອບຄົວ, ສ້າງເງື່ອນໄຂໃຫ້ແມ່ຍິງໄດ້ ເຂົ້າຮ່ວມ ແລະ ເປັນກຳລັງແຮງໃນການປົກປັກຮັກສາ ແລະ ພັດທະນາ ປະເທດຊາດ. ສະນັ້ນ, ການພັດທະນາແມ່ຍິງແມ່ນມີຄວາມຈໍາເປັນ ເພື່ອເຮັດໃຫ້ແມ່ຍິງສາມາດເຂົ້າ ຮ່ວມຂະບວນການຢ່າງມີປະສິດທິ ພາບໃນທຸກຂົງເຂດວຽກງານຢູ່ໃນ ສັງຄົມໃຫ້ໄດ້ຮັບຜົນດີ. ການພັດທະນາແມ່ຍິງ ແມ່ນສຸມໃສ່ 4 ເນື້ອໃນ ອັນພື້ນຖານ. ຄຽງຄູ່ກັນນີ້ການພັດທະນາຄອບຄົວ ກໍເປັນປັດໄຈໜຶ່ງທີ່ ສຳຄັນໃນການຊຸກຍູ້ ເພື່ອພັດທະນາ ແມ່ຍິງດ້ານຕ່າງໆເຊັ່ນ:
1. ພັດທະນາແມ່ຍິງດ້ານຮ່າງກາຍແມ່ນການເຮັດໃຫ້ແມ່ຍິງມີການຂະຫຍາຍຕົວດ້ານຮ່າງກາຍຢ່າງສົມບູນ ມີສຸຂະພາບແຂງແຮງສະຫລາດ ແລະ ມີອາຍຸຍືນຍາວ.
2. ພັດທະນາແມ່ຍິງ ທາງດ້ານແນວຄິດຈິດໃຈແມ່ນເຮັດ ໃຫ້ແມ່ຍິງມີສຸຂະພາບຈິດທີ່ດີມີຈິດ ໃຈເຂັ້ມແຂງ, ມີອຸດົມການຂອງພັກ ທີ່ໜັກແໜ້ນ, ມີຄຸນສົມບັດສິນທໍາປະ ຕິວັດ, ມີວັດທະນະທໍາທີ່ດີງາມ, ມີກິລິຍາມາລະຍາດດີ, ມີຄວາມດຸໜັ່ນຂະຫຍັນພຽນໃນໜ້າທີ່ວຽກງານ ຂອງຕົນຮັບຜິດຊອບເພື່ອເຮັດໃຫ້ ຕົນເອງ ແລະ ຄອບຄົວມີຄວາມຈະເລີນກ້າວໜ້າ;
3. ການພັດທະນາແມ່ຍິງດ້ານການສຶກສາແມ່ນການສ້າງ ເງື່ອນໄຂໃຫ້ແກ່ແມ່ຍິງໄດ້ຮັບການສຶກສາຂັ້ນພື້ນຖານຢ່າງທົ່ວເຖິງ ໄດ້ຮັບການສຶກສາດ້ານເຕັກໂນໂລຊີ ເພື່ອມາໝູນໃຊ້ເຂົ້າໃນຊີວິດປະຈຳວັນ, ແນໃສ່ເຮັດໃຫ້ຜູ້ຍິງໄດ້ຍົກລະດັບຄວາມຮູ້ຄວາມສາມາດຢ່າງຮອບດ້ານ ແລະ ສົ່ງເສີມຜູ້ທີ່ມີພອນສະຫວັນ;
4. ການພັດທະນາແມ່ຍິງ ດ້ານວິຊາຊີບ ແລະ ສີມືແຮງງານ ແມ່ນການສ້າງເງື່ອນໄຂໃຫ້ແມ່ຍິງ ໄດ້ຮັບການຝຶກອົບຮົມວິຊາຊີບ ແລະ ເຮັດໃຫ້ຜູ້ຍິງມີຄວາມຊຳນິຊຳນານກ່ຽວກັບວຽກຂອງຕົນເທົ່າ ທຽມກັບເພດຊາຍ ເຂົ້າໃນການພັດ ທະນາເສດຖະກິດຄອບຄົວ ແລະ ສັງຄົມ.
ກົດໝາຍໄດ້ກຳນົດໄວ້ຈະແຈ້ງ ກ່ຽວການພັດທະນາແມ່ຍິງ ແຕ່ ຄວາມເປັນຈິງແລ້ວແມ່ຍິງສ່ວນ ຫລາຍແມ່ນອາໄສຢູ່ຊົນນະບົດ, ເຂດຫ່າງໄກສອກຫລີກສ່ວນຫລາຍຍັງ ມີຄວາມທຸກຍາກບໍ່ມີໂອກາດໃນ ການພັດທະນາຕົນເອງເປັນຕົ້ນແມ່ນເດັກນ້ອຍເພດຍິງບໍ່ມີໂອກາດ ໄດ້ສຶກສາຮໍ່າຮຽນ, ເພດຍິງມີລະດັບ ການສຶກສາຕ່ຳຮ້າຍແຮງໄປກວ່າ ນັ້ນເພດຍິງບາງຊົນເຜົ່າ, ບາງຄົນແມ່ນບໍ່ສາມາດອ່ານໜັງສືໄດ້ສິ່ງດັ່ງກ່າວໄດ້ກາຍເປັນອຸປະສັກອັນໜຶ່ງທີ່ກີດກັ້ນຄວາມຈະເລີນກ້າວໜ້າຂອງເພດຍິງ ເປັນຕົ້ນແມ່ນເຮັດ ໃຫ້ແມ່ຍິງບໍ່ສາມາດເຂົ້າຮ່ວມໃນວຽກງານຕ່າງໆໄດ້ເຊັ່ນ: ຂາດໂອກາດໃນການມີສ່ວນຮ່ວມວາງແຜນໃນຄອບຄົວ, ຊຸມຊົນ, ບໍ່ສາມາດເຂົ້າ ເຖິງຂໍ້ມູນຂ່າວສານ ແລະ ການບໍລິ ການຕ່າງໆ ສິ່ງສຳຄັນແມ່ນແມ່ຍິງ ເອງບາງເທື່ອກໍ່ບໍ່ກ້າຕັດສິນໃຈທ່ີ ຈະບຸກບືນຕໍ່ໜ້າທີ່ວຽກງານ ທີ່ຕົນ ໄດ້ຮັບມອບໝາຍໃຫ້ເຮັດຍ້ອນຂາດ ຄວາມຮູ້ຄວາມສາມາດ, ບໍ່ມີປະສົບການມາກ່ອນ ແລະ ຜ່ານມາກໍ່ບໍ່ໄດ້ ເປີດໂອກາດ, ສົ່ງເສີມໃຫ້ແມ່ຍິງພັດທະນາຕົນເອງເທົ່າທີ່ຄວນ.
ສັງລວມແລ້ວ ການຊຸກຍູ້ເພດ ຍິງໃຫ້ມີຄວາມກ້າວໜ້າ ຫລື ການພັດທະນາແມ່ຍິງແມ່ນປັດໄຈສຳ ຄັນເຂົ້າໃນການພັດທະນາປະເທດຊາດ ເພາະວ່າເພດຍິງແມ່ນກວມ ເອົາຫລາຍກວ່າເຄິ່ງໜຶ່ງຂອງຈຳນວນພົນລະເມືອງ. ສະນັ້ນ, ພັກ ແລະ ລັດຖະບານຈຶ່ງໄດ້ເອົາໃຈໃສ່ໃນການຊຸກຍູ້ເພດຍິງໃຫ້ມີຄວາມກ້າວໜ້າ ດ້ວຍການສ້າງເງື່ອນໄຂ ໃຫ້ແມ່ຍິງໄດ້ເຂົ້າຮ່ວມ ແລະ ເປັນກຳລັງແຮງໃນການປົກປັກຮັກສາ ແລະ ພັດທະນາປະເທດຊາດໃຫ້ຈະເລີນຮັ່ງມີໄປຕາມອຸດົມການຂອງ ປະຊາຊົນລາວບັນດາເຜົ່າ.
ທີ່ມາ: ຂປລ