ທີ່ສວນພຶກສາ ນະຄອນຫລວງວຽງຈັນ, ທ່ານ ຄຳພູວົງ ພະມີສິດ ເຈົ້າຂອງສວນພຶກສາ ໄດ້ເປັນເຈົ້າພາບຈັດງານສະເຫລີມສະຫລອງວັນແມ່ຍິງສາກົນ ຄົບຮອບ 109 ປີ ໃຫ້ສະມາຄົມຜູ້ອາຍຸສູງ ນະຄອນຫລວງວຽງຈັນຂຶ້ນ ທີ່ສວນດັ່ງກ່າວ, ເພື່ອໃຫ້ຜູ້ອາຍຸສູງໄດ້ມາພັກຜ່ອນ ແລະ ຊົມທິວທັດໃນສວນພຶກສາແຫ່ງນີ້ ເຊັ່ນ: ສວນດອກໄມ້ນາໆຊະນິດ, ຫໍແຫ່ງຄວາມຮັກ, ຢ້ຽມຊົມສວນນໍ້າ, ສວນປູກຜັກປອດສານພິດ, ເຮືອນຊົນເຜົ່າ ແລະ ຫ້ອງວາງສະແດງເຄື່ອງນຸ່ງຫົ່ມ, ເຄື່ອງໃຊ້ສອຍຊົນເຜົ່າຕ່າງໆ ຂອງລາວ ແລະ ອື່ນໆ.
ທ່ານ ພູວົງ ພະມີສິດ ກ່າວວ່າ: ການຈັດງານຄັ້ງນີ້, ເພື່ອເປັນການລະນຶກເຖິງຄຸນງາມຄວາມດີຂອງຜູ້ເປັນແມ່, ແມ່ຍິງທຸກຖ້ວນໜ້າ ແລະ ມື້ນີ້ ກໍເປັນວັນແມ່ຍິງສາກົນຄົບຮອບ 109 ປີ ຂ້າພະເຈົ້າຂໍເປັນສ່ວນໜຶ່ງທີ່ເຮັດໃຫ້ແມ່ຍິງໄດ້ມີຮອຍຍິ້ມ, ມີຄວາມສຸກກາຍສະບາຍໃຈ ທີ່ໄດ້ມາພັກຜ່ອນໃນສະ ຖານທີ່ແຫ່ງນີ້.
ພ້ອມນີ້, ພວກເຮົາກຳລັງຕົບແຕ່ງຫ້ອງວາງສະແດງເຄື່ອງນຸ່ງຫົ່ມ, ເຄື່ອງໃຊ້ສອຍຊົນ ເຜົ່າທີ່ເປັນເອກະລັກ ແລະ ເຊື່ອວ່າຫ້ອງວາງສະແດງນີ້ ຈະເປັນຈຸດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໂດຍສະເພາະນັກທ່ອງທ່ຽວຈາກ ສປ ຈີນ ທີ່ຈະເຂົ້າມາລາວ, ເຊິ່ງໃນປີນີ້ກໍເປັນປີທ່ອງທ່ຽວ ລາວ-ຈີນ ເພື່ອໃຫ້ເຂົາເຈົ້າໄດ້ສຶກສາ ຮີດຄອງປະເພນີອັນດີງາມ ທີ່ເປັນເອກະລັກຂອງແຕ່ລະຊົນເຜົ່າຂອງລາວເຮົາ ແລະ ພວກເຮົາກຳລັງຈະສ້າງທີ່ພັກ ໄວ້ຕ້ອນຮັບນັກທ່ອງທ່ຽວທີ່ມັກທຳມະຊາດ ທ່າມກາງສວນພຶກສາ ຄາດວ່າຈະສຳເລັດພາຍໃນປີນີ້.
ທີ່ມາ: ຂປລ