ເຮັດອາຫານລາວງ່າຍໆ ກັບ InsideLaos. ມື້ນີ້ມີສູດ “ນໍ້າຫວານໝາກຈອງ” ມາຝາກ ຫຼາຍໆຄົນອາດຍັງບໍ່ຮູ້ວ່າໝາກຈອງ ສາມາດເອົາມາເຮັດນໍ້າຫວານໄດ້ ແຊບ ແລະ ຍັງມີປະໂຫຍດອີກດ້ວຍ ວິທີເຮັດກໍງ່າຍແສນງ່າຍ ເຮົາມາເລີ່ມເຮັດກັນເລີຍເນາະ ສ່ວນປະກອບມີດັ່ງນີ້:
ສ່ວນປະກອບ:
1.ໝາກຈອງ 10-15 ເມັດ
2.ນໍ້າຕານໝາກພ້າວ 250g (ທີ່ເລືອກໃຊ້ນໍ້າຕານໝາກພ້າວເພາະມັນມີກີ່ນຫອມ)
3.ນ້ຳກະທິ 500g
4.ເກືອ 1/2 ບ່ວງກາເຟ
(ໝາຍເຫດ: ສຳລັບສູດນີ້ແມ່ນບໍ່ມີໃບເຕີຍເດີ້ ເພາະນໍ້າຕານໝາກພ້າວຫອມຢູ່ແລ້ວ ແລະ ອັດຕາສ່ວນແມ່ນສຳລັບ 2 ຖ້ວຍນ້ອຍ )
ເລີ່ມຈາກການລ້າງເມັດໝາກຈອງໃຫ້ສະອາດ ແລ້ວແຊ່ນ້ຳໄວ້ ປະມານ 2-3 ຊົ່ວໂມງ.
ກຽມເຮັດນໍ້າກະທິ ໂດຍການກຽມຖ້ວຍ ແລ້ວໃສ່ນໍ້າຕານໝາກພ້າວລົງໄປໃນຖ້ວຍ ໃຊ້ບ່ວງບົດຈົນນໍ້າຕານແຕກໂຕອອກຈາກກັນ ແລ້ວຄ່ອຍເອົາເກືອ ແລະ ນໍ້າກະທິລົງ
ເອົານໍ້າກະທິທີ່ກຽມໄວ້ລົງໝໍ້ ຕັ້ງໄຟປານກາງ ຄົນນໍ້າກະທິໄປເລື້ອຍໆ ຈົນນໍ້າກະທິຟົດ ແຕ່ບໍ່ໃຫ້ຟົດດົນເກີນໄປ ເພາະຈະເຮັດໃຫ້ນໍ້າກະທິແຕກມັນ ຫຼັງຈາກນັ້ນຊີມໃຫ້ໄດ້ຣົດຊາດ ຫວານ ມັນ ເຄັມ ຫຼື ແລ້ວແຕ່ມັກ ຕັກອອກໃສ່ຖ້ວຍໄວ້ເພື່ອພັກໃຫ້ເຢັນ ຫຼື ຈະແຊ່ເຢັນໄວ້ກໍໄດ້
ຫຼັງຈາກໝາກຈອງທີ່ແຊ່ໄວ້ ແຕກວຸ້ນອອກມາແລ້ວ ໃຫ້ແຍກເອົາວຸ້ນອອກຈາກແກ່ນໝາກຈອງ
ກຽມເສີບ ຈະໃສ່ວຸ້ນໝາກຈອງລົງໃນໝໍ້ ຫຼື ເສີບແຍກກໍໄດ້. ນອກຈາກນີ້ຍັງສາມາດເພີ່ມສ່ວນປະກອບຕາມມັກໄດ້ອີກ ບໍ່ວ່າຈະເປັນ ເຂົ້າລອດຊອງ, ໝາກຕ່າວ, ວຸ້ນດຳ, ແກ່ນອີ່ຕູ ຫຼື ອື່ນໆແລ້ວແຕ່ມັກ
ເຄັດລັບທີ່ໜ້າຮູ້: ນອກຈາກຣົດຊາດຈະແຊບ ແລະ ຊ່ວຍຄາຍຮ້ອນແລ້ວ ໝາກຈອງຍັງໃຫ້ຄຸນປະໂຫຍດອີກຫຼາຍໆຢ່າງເຊັ່ນ: ຊ່ວຍແກ້ອາການຮ້ອນໃນກະຫາຍນໍ້າ,ຊ່ວຍຫຼຸດຄວາມດັນ,ຊ່ວຍລ້າງສານພິດຕົກຄ້າງ ແລະ ອື່ນໆ. ຢ່າລືມໄປເຮັດກີນເດີ້ທຸກຄົນ
Hits: 8
