ຊຸມປີຜ່ານມາ ພັກ ແລະ ລັດຖະບານ ບັນດາຂະແໜງການ ອົງການທຽບເທົ່າຂັ້ນສູນກາງ ແລະ ອົງການປົກຄອງທ້ອງຖິ່ນຂັ້ນຕ່າງໆ ໄດ້ສຸມຄວາມພະຍາຍາມໃນການຊີ້ນຳ-ນຳພາ ລົງທຶນພັດທະນາເປັນຈຳນວນຫຼາຍ ທັງຈັດຕັ້ງກຳລັງໃນການຈັດຕັ້ງປະຕິບັດໃນຂອບເຂດທົ່ວປະເທດ ດ້ວຍມາດຕະຖານຕ່າງໆ ຈຶ່ງໄດ້ມີຜົນສຳເລັດຫຼາຍດ້ານໃນການພັດທະນາປະເທດຊາດ.
ອີງຕາມບົດສະຫຼຸບສັງລວມຕີລາຄາຮອບດ້ານ ກ່ຽວກັບການຈັດຕັ້ງປະຕິບັດແຜນພັດທະນາກະສິກຳ ປ່າໄມ້ ແລະ ພັດທະນາຊົນນະບົດ ປະຈຳປີ 2018 ໃຫ້ຮູ້ວ່າ:
ຊຸມປີຜ່ານມາ ມີ 5.179 ຄອບຄົວ ໄດ້ຫຼຸດພົ້ນອອກຈາກຄອບຄົວທຸກຍາກ ຍັງເຫຼືອ 64.593 ຄອບຄົວ ກວມ 5,34% ຂອງຈຳນວນຄອບຄົວທັງໝົດທົ່ວປະເທດ ໃນນີ້ ສາມາດລຶບລ້າງບ້ານທີ່ມີຄອບຄົວທຸກຍາກຫຼາຍກວ່າ 50% ຂຶ້ນເມືອຂອງຈຳນວນຄອບຄົວທັງໝົດພາຍໃນບ້ານ 22 ບ້ານ ຈາກ 678 ບ້ານ ໃນປີ 2016 ຍັງເຫຼືອ 657 ບ້ານໃນປີ 2018 ລຶບລ້າງບ້ານທຸກຍາກ 120 ບ້ານ ຍັງເຫຼືອ 1.536 ບ້ານ ກວມ 18,83% ຂອງຈຳນວນບ້ານທັງໝົດ ສ້າງບ້ານພັດທະນາ 221 ບ້ານ ລວມເປັນ 4.138 ບ້ານ ສ້າງບ້ານໃຫຍ່ທີ່ມີລັກສະນະຕົວເມືອງນ້ອຍໃນຊົນນະບົດ 25 ບ້ານ ລວມເປັນ 56 ບ້ານ.
ຜ່ານການຈັດຕັ້ງປະຕິບັດ ໄດ້ມີຫຼາຍແບບຢ່າງທີ່ດີ ທີ່ເປັນບົດຮຽນໃນການກຳນົດນະໂຍບາຍ ວິທີຈັດຕັ້ງປະຕິບັດວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກໃນຊຸມປີຕໍ່ໜ້າເຊັ່ນ:
ການທົດລອງສ້າງບ້ານແບບຢ່າງໃນການຈັດຕັ້ງປະຕິບັດທິດນຳ 3 ສ້າງ ການສ້າງບ້ານຈຸດສຸມພັດທະນາຊາຍແດນຮ່ວມມືລາວ-ຫວຽດນາມ ຢູ່ 4 ແຂວງ 5 ເມືອງ ບ້ານເປົ້າໝາຍທຸກຍາກບ້ານແບບຢ່າງໃນການຈັດສັນພູມລຳເນົາ ແລະ ອາຊີບ ຕິດພັນກັບການປົກປັກຮັກສາຊາຍແດນ ບ້ານ ແລະ ເມືອງເປົ້າໝາຍ ໃນການປະຕິບັດກອງທຶນຫຼຸດຜ່ອນຄວາມທຸກຍາກຂອງທະນາຄານໂລກ ໂຄງການສ້າງບ້ານຊົນນະບົດໃໝ່ຕາມຫຼັກແຊເມົາອຶນດົງຂອງ ສ ເກົາຫຼີ ຢູ່ 30 ບ້ານຂອງແຂວງວຽງຈັນ ແລະ ສະຫວັນນະເຂດ ບ້ານແບບຢ່າງໃນການແກ້ໄຂຄວາມທຸກຍາກດ້ວຍລັດ ຜູ້ປະກອບການ ແລະ ປະຊາຊົນຮ່ວມກັນເຮັດ ຢູ່ບ້ານຄຳປາແໜ ເມືອງຈຳພອນ ແຂວງສະຫວັນນະເຂດ ການຍົກຍ້າຍຈັດສັນພູມລຳເນົາໃໝ່ ແລະ ສ້າງອາຊີບໝັ້ນຄົງໃຫ້ປະຊາຊົນ ທີ່ໄດ້ຮັບຜົນກະທົບຈາກໂຄງການພັດທະນາຂອງລັດ ແລະ ພາກເອກະຊົນຈຳນວນໜຶ່ງຢູ່ທ້ອງຖິ່ນ ແບບຢ່າງໃນການຍົກຍ້າຍຈັດສັນພູມລຳເນົາຄົງທີ່ ໃຫ້ປະຊາຊົນທີ່ທຳມາຫາກິນເລື່ອນລອຍຢູ່ເຂດພູດອຍຊົນເຜົ່າ ໃຫ້ມີອາຊີບທີ່ໝັ້ນຄົງຢູ່ຫຼາຍທ້ອງຖິ່ນ ມີວຽກເຮັດງານທຳສ້າງອາຊີບໃໝ່ ແກ້ໄຂຄວາມທຸກຍາກ ຕິດພັນກັບການລົງທຶນໂດຍກົງຂອງພາກເອກະຊົນດ້ານກະສິກຳປ່າໄມ້ ແລະ ການບໍລິການຈຳນວນໜຶ່ງ ແລະ ອື່ນໆ.
ທີ່ມາ: ໜັງສືພິມວຽງຈັນໃໝ່