ກົມອະນາໄມ ແລະ ສົ່ງເສີມສຸຂະພາບກະຊວງສາທາລະນະສຸກ ເຜີຍແຜ່ດຳລັດວ່າດ້ວຍການປັບໃໝ ແລະ ນຳໃຊ້ມາດຕະການອື່ນ ຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບການຄວບຄຸມຢາສູບ.
ວັນທີ 3 ພຶດສະພາ 2019 ນີ້ ຢູ່ທີ່ຫ້ອງປະຊຸມພະແນກສາທາລະນະສຸກແຂວງສະຫວັນນະເຂດ ທາງກົມອະນາໄມ ແລະ ສົ່ງເສີມສຸຂະພາບກະຊວງສາທາລະນະສຸກໄດ້ມາ ເຜີຍແຜ່ດຳລັດວ່າດ້ວຍການປັບໃໝ ແລະ ນຳໃຊ້ມາດຕະການອື່ນ ຕໍ່ຜູລະເມີດກົດໝາຍ ແລະ ລະບຽບການກ່ຽວກັບການຄວບຄຸມຢາສູບ ໃຫ້ 6 ແຂວງພາກໃຕ້ຄື: ແຂວງຄຳມ່ວນ,ສະຫວັນນະເຂດ,ສາລະວັນ,ຈຳປາສັກ,ອັດຕະປື ແລະ ແຂວງເຊກອງ.
ໂດຍການເປັນກຽດເຂົ້າຮ່ວມຂອງທ່ານ ດຣ ພອນປະເສີດ ອຸນາພົນ ຮອງຫົວໜ້າກົມອະນາໄມ ແລະ ສົ່ງເສີມສຸຂະພາບກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມນຳ.
ໂອກາດເຂົ້າຮ່ວມກອງປະຊຸມ ທ່ານ ດຣ ພອນປະເສີດ ອຸນາພົນ ໄດ້ມີຄຳເຫັນວ່າ: ວຽກງານການຄວບຄຸມຢາສູບກໍ່ແມ່ນວຽກງານໜຶ່ງ ທີ່ກະຊວງສາທາລະນະສຸກ ໄດ້ມີຄວາມເອົາໃຈໃສ່ໃນການຫາວິທີຫຼຸດຜ່ອນອັດຕາຄວາມສ່ຽງຂອງປະຊາກອນທີ່ມີອັດຕາການເຈັບເປັນ ແລະ ການຕາຍສູງຍ້ອນພະຍາດທີ່ກ່ຽວພັນກັບຢາສູບ ໂດຍສະເພາະຢູ່ໃນໂລກແຕ່ລະປີມີຄົນຕາຍປະມານ 60 ລ້ານກວ່າຄົນ ຍ້ອນພະຍາດທີ່ຕິດພັນກັບຢາສູບ.
ຈາກນັ້ນທ່ານ ດຣ ນາງ ຄັດທະນະພອນ ພັນດວງສີ ຫົວໜ້າພະແນກສົ່ງເສີມສຸຂະພາບ-ສຸຂະສຶກສາ ແລະ ໂພຊະນາການ ກົມອະນາໄມ ແລະ ສົ່ງເສີມສຸຂະພາບ ກໍ່ໄດ້ໃຫ້ກຽດເຜີຍແຜ່ດຳລັດວ່າດ້ວຍການປັບໃໝ ແລະ ນຳໃຊ້ມາດຕະການອື່ນ ຕໍ່ຜູລະເມີດກົດໝາຍ ແລະ ລະບຽບການກ່ຽວກັບການຄວບຄຸມຢາສູບເຊິ່ງປະມີ 5 ໝວດ, 22 ມາດຕາ ທີ່ມີເນື້ອໃນກຳນົດອັດຕາປັບໃໝ ແລະ ນຳໃຊ້ມາດຕະການອື່ນ ຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບການຄວບຄຸມຢາສູບ ເພື່ອເປັນບ່ອນອີງໃຫ້ແກ່ເຈົ້າໜ້າທີ່ ຈັດຕັ້ງປະຕິບັດການປັບໃໝ ຕໍ່ຜູ້ລະເມີດຢ່າງຖືກຕ້ອງ,ເປັນເອກະພາບທົ່ວປະເທດ ແນໃສ່ເຮັດໃຫ້ການດຳເນີນທຸລະກິດຜະລິດຕະພັນຢາສູບຖືກຕ້ອງຕາມກົດໝາຍ ແລະ ລະບຽບການ,ໃຫ້ພົນລະເມືອງມີສຸຂະພາບເຂັ້ມແຂງ,ຫຼຸດຜ່ອນການຊົມໃຊ້ຢາສູບ ແລະ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.
ໝວດທີ 2 ມາດຕາ 5 ວ່າດ້ວຍການລະເມີດ ໄດລະບຸວ່າ: ພຶດຕິກຳທີ່ເປັນການລະເມີດກົດໝາຍ ແລະ ລະບຽບການກ່ຽວກັບການຄວບຄຸມຢາສູບ ປະກອບດ້ວຍ: ການບໍ່ພິມສະຫຼາກ ແລະ ຄຳເຕືອນສຸຂະພາບ ໃສ່ວັດຖຸຫຸ້ມຫໍ່,ການໂຄສະນາຜະລິດຕະພັນຢາສູບ,ການບໍ່ຕິດປ້າຍໃນສະຖານທີ່ຫ້າມສູບຢາ,ການສູບຢາໃນສະຖານທີ່ຫ້າມສູບຢາ,ການຂາຍຫຼືຈຳໜ່າຍຜະລິດຕະພັນຢາສູບ ໃນສະຖານທີ່ເກືອດຫ້າມ,ການຂາຍຢາສູບໃຫ້ເດັກຫຼືໃຫ້ເດັກຊື້ຫຼືຂາຍຜະລິດຕະພັນຢາສູບ,ການຂາຍຜະລິດຕະພັນຢາສູບດ້ວຍເຄື່ອງຈັກອັດຕະນຸມັດ,ການຜະລິດ,ນຳເຂົ້າ,ຈຳໜ່າຍຫຼືຂາຍຢາຊອງ ທີ່ບັນຈຸຕ່ຳກວ່າ 20 ກອກ,ຢາຊອງຫຼືຢາກະປ໋ອງເປັນກອກ ແລະ ຜະລິດຕະພັນຢາສູບນອກລະບົບທຸກຮູບການ ທັງໝົດນີ້ແມ່ນຈະຖືກປັບໃໝໄປຕາມແຕ່ລະກໍລະນີ ຈາກການສຶກສາອົບຮົມ ກ່າວເຕືອນກ້າວໄປເຖິງການປັບໃໝເປັນເງິນ ແລະ ຖອນໃບອະນຸຍາດດຳເນີນທຸລະກິດ ລວມທັງຢຶດ ແລະ ທຳລາຍຖິ້ມຜະລິດຕະພັນຢາສູບ.
ທີ່ມາຂໍ້ມູນ: ວິທະຍຸກະຈາຍສຽງ ສະຫວັນນະເຂດ
