ໃນປີ 2018 ມູນຄ່າການສົ່ງອອກພາຍໃຕ້ສິດທິພິເສດທາງການຄ້າ ບັນລຸໄດ້ປະມານ 1,31 ຕື້ ໂດລາສະຫະລັດ ກວມເອົາ 24.30% ຂອງມູນຄ່າການສົ່ງອອກທັງໝົດຂອງ ສປປ ລາວ ທີ່ມີມູນຄ່າ 5,41 ຕື້ ໂດລາສະຫະລັດ. ສໍາລັບມູນຄ່າການນຳເຂົ້າພາຍໃຕ້ສິດທິພິເສດທາງການຄ້າປະຕິບັດໄດ້ພຽງ 613,83 ລ້ານໂດລາສະຫະລັດ ກວມເອົາ 10.80% ຂອງມູນຄ່າການນໍາເຂົ້າທັງໝົດຂອງ ສປປ ລາວ ທີ່ມີມູນຄ່າ 5,84 ຕື້ ໂດລາສະຫະລັດ.
ກົມການນໍາເຂົ້າ ແລະ ສົ່ງອອກ, ກະຊວງອຸດສາຫະກໍາ ແລະ ການຄ້າ ໄດ້ສຳເລັດການສັງລວມສະຖິຕິການນຳເຂົ້າ – ສົ່ງອອກ ພາຍໃຕ້ສິດທິພິເສດທາງການຄ້າ ປະຈໍາປີ 2018. ໃນນັ້ນ, ການນຳເຂົ້າ ແລະ ສົ່ງອອກ ພາຍໃຕ້ສິດທິພິເສດທາງການຄ້າ ແບ່ງອອກເປັນ 02 ຮູບແບບດ້ວຍກັນຄື: ແບບຝ່າຍດຽວ (ລະບົບສິດທິພິເສດທົ່ວໄປ ຫຼື Generalized System of Preferences: GSP) ແລະ ແບບຕອບແທນກັນ ຫຼື ຕ່າງຝ່າຍຕ່າງໄດ້ຮັບຜົນປະໂຫຍດ (ສັນຍາການຄ້າເສລີ ຫຼື Free Trade Agreement: FTA).
ບັນດາປະເທດທີ່ ສປປ ລາວ ສົ່ງອອກພາຍໃຕ້ສິດທິພິເສດທາງການຄ້າມີທັງໝົດ 37 ປະເທດ,ໃນນັ້ນ ປະເທດທີ່ມີການສົ່ງອອກໄປຫຼາຍກວ່າໝູ່ແມ່ນ ໄທ, ສສ ຫວຽດນາມ ແລະ ສປ ຈີນ; ມີມູນຄ່າປະມານ 425,86 ລ້ານ ໂດລາສະຫະລັດ, 332,85 ລ້ານ ໂດລາສະຫະລັດ ແລະ 250,95 ລ້ານ ໂດລາສະຫະລັດ ຕາມລຳດັບ. ກຸ່ມສິນຄ້າທີ່ສົ່ງອອກຫຼາຍກວ່າໝູ່ສາມອັນດັບຕົ້ນແມ່ນ ກຸ່ມສິນຄ້າອຸດສາຫະກຳ ມີມູນຄ່າປະມານ 637,56 ລ້ານໂດລາສະຫະລັດ, ຮອງລົງມາແມ່ນ ກຸ່ມສິນຄ້າພືດກະສິກຳ ມີມູນຄ່າປະມານ 406,94 ລ້ານໂດລາສະຫະລັດ ແລະ ກຸ່ມສິນຄ້າຜະລິດຕະພັນແຮ່ທາດ ມີມູນຄ່າປະມານ 89,50 ລ້ານໂດລາສະຫະລັດ.
ສ່ວນປະເທດທີ່ ສປປ ລາວ ນໍາເຂົ້າພາຍໃຕ້ສິດທິພິເສດທາງການຄ້າມີທັງໝົດ 39 ປະເທດ, ໃນນັ້ນ ປະເທດທີ່ສປປ ລາວ ມີການນຳເຂົ້າຫຼາຍກວ່າໝູ່ແມ່ນ ໄທ, ສປ ຈີນ, ແລະ ສສ.ຫວຽດນາມ; ມີມູນຄ່າການນຳເຂົ້າປະມານ 329,04 ລ້ານ ໂດລາສະຫະລັດ, 79,58 ລ້ານ ໂດລາສະຫະລັດ ແລະ 76,39 ລ້ານ ໂດລາສະຫະລັດ ຕາມລຳດັບ. ສຳລັບສາມກຸ່ມສິນຄ້າທີ່ມີມູນຄ່າການນຳເຂົ້າຫຼາຍກວ່າໝູ່ແມ່ນ ກຸ່ມສິນຄ້າພາຫະນະ, ຊິ້ນສ່ວນ ແລະ ອາໄຫຼ່ ມີມູນຄ່າ 369,16 ລ້ານໂດລາສະຫະລັດ, ກຸ່ມສິນຄ້າເຄື່ອງກໍ່ສ້າງ ມີມູນຄ່າ 85,41 ລ້ານໂດລາສະຫະລັດ ແລະ ກຸ່ມສິນຄ້າເຄື່ອງນຸ່ງຫົ່ມເຄື່ອງໃຊ້ສອຍປະຈຳວັນ ມີມູນຄ່າ 64,14 ລ້ານໂດລາສະຫະລັດ.
ການສົ່ງອອກພາຍໃຕ້ສິດທິພິເສດທາງການຄ້າແບບຝ່າຍດຽວ ແລະ ແບບຕອບແທນກັນ ເຫັນວ່າ ການນຳໃຊ້ສິດທິພິເສດແບບຝ່າຍດຽວມີມູນຄ່າພຽງ 278,60 ລ້ານ ໂດລາສະຫະລັດ, ໃນຂະນະທີ່ການສົ່ງອອກແບບຕອບແທນກັນປະຕິບັດໄດ້ 1,03 ຕື້ ໂດລາສະຫະລັດ. ການສົ່ງອອກແບບຕອບແທນກັນ ກວມເອົາອັດຕາສ່ວນຫຼາຍກວ່າການສົ່ງອອກແບບຝ່າຍດຽວສູງເຖິງ 78.77%.
ແຫຼ່ງຂໍ້ມູນ: ສະຖິຕິການນຳເຂົ້າ-ສົ່ງອອກ ພາຍໃຕ້ສິດທິພິເສດທາງດ້ານການຄ້າ ສປປ ລາວ ປະຈຳປີ 2018 ຂອງ ພະແນກຄຸ້ມຄອງແຫຼ່ງກຳເນີດສິນຄ້າ, ກົມການນຳເຂົ້າ ແລະ ສົ່ງອອກ.
Hits: 28
