ລັດຖະບານກໍຄືການນຳກະຊວງກະສິກຳ ແລະປ່າໄມ້ ໄດ້ສະແດງຄວາມເປັນຫ່ວງ ແລະລົງຕິດຕາມກວດກາພື້ນທີ່ບຸກເບີກດິນເພື່ອປູກກ້ວຍຢູ່ເຂດບ້ານແສນດິນ ພ້ອມໃຫ້ຄຳເຫັນແນະນຳນັກລົງທຶນຫັນປ່ຽນໄປເປັນການປູກພືດຊະນິດອື່ນແທນການປູກກ້ວຍ ເພາະການປູກກ້ວຍຢູ່ພື້ນທີ່ດັ່ງກ່າວແມ່ນບໍ່ເໝາະສົມ ແລະອາດມີຜົນກະທົບຕໍ່ສີ່ງແວດລ້ອມ ແລະແຫຼ່ງນ້ຳ.
ຫຼັງຈາກການນຳສະເໜີຂ່າວ ກ່ຽວກັບຄຳເໜີຂອງພໍ່ແມ່ປະຊາຊົນຕໍ່ນັກລົງທຶນເຂົ້າໄປບຸກເບີກດິນເຊົ່ານຳປະຊາຊົນຢູ່ບ້ານແສນດີນ ແລະບ້ານອີ່ໄລເໜືອ ເມືອງນາຊາຍທອງ ນະຄອນຫຼວງວຽງຈັນ ເພື່ອດຳເນີນການປູກກ້ວຍ ເມື່ອຕົ້ນອາທິດຜ່ານມາ ກໍນັບວ່າສ້າງຄວາມສົນໃຈເປັນຢ່າງຍີ່ງໃຫ້ກັບສັງຄົມ ເນື່ອງຈາກຜ່ານມາການປູກກ້ວຍໃນຫຼາຍແຂວງທາງພາກເໜືອແມ່ນໄດ້ມີການຢຸດຕິໄປໝົດແລ້ວ ອັນມີຜົນມາຈາກບັນຫາສີ່ງແວດລ້ອມ ທັງນີ້ຫາງສຽງປະຊາຊົນຫຼາຍຄົນຕ່າງກໍສະແດງຄວາມເປັນຫ່ວງ ພ້ອມສະເໜີໃຫ້ພາກລັດ ໂດຍສະເພາະແມ່ນນະຄອນຫຼວງວຽງຈັນ ລົງຕິດຕາມກວດກາໂຄງການດັ່ງກ່າວ ເພື່ອຫາວິທີແກ້ໄຂຢ່າງເໝາະສົມ.
ແນວໃດກໍດີ ຕໍໍ່ກັບຂ່າວດັ່ງກ່າວທ່ານ ຄຳໄພ ພົມມະຈັນ ຫົວໜ້າຫ້ອງການກະສິກຳ ແລະປ່າໄມ້ເມືອງນາຊາຍທອງ ເປີດເຜີຍຕໍ່ທີມຂ່າວໜັງສືພິມ ເສດຖະກິດ-ສັງຄົມ ຮູ້ວ່າ: ຫຼັງຈາກຮັບຊາບຂ່າວທີ່ອອກໃນວັນທີ 30 ເມສາ 2019 ຄະນະນຳຂອງກະຊວງກະສິກຳ ແລະປ່າໄມ້ນຳໂດຍທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີກະຊວງກະສິກຳ ແລະປ່າໄມ້ ພ້ອມດ້ວຍບັນດາຜູ້ຕາງໜ້າຈາກກົມ, ພະແນກ ແລະຫ້ອງການທີ່ກ່ຽວຂ້ອງຂອງນະຄອນຫຼວງວຽງຈັນ ກໍໄດ້ສະແດງຄວາມເປັນຫ່ວງ ພ້ອມລົງຕິດຕາມພື້ນທີ່ການບຸກເບີກຕົວຈີງຢູ່ບ້ານແສນດິນ ທັງນີ້ຄະນະໄດ້ໃຫ້ຄຳເຫັນໃນການຫັກປ່ຽນ ເປັນການປູກພືດຊະນິດອື່ນແທນການປູກກ້ວຍເປັນຕົ້ນແມ່ນ ສາລີ ແລະມັນຕົ້ນ ເນື່ອງຈາກການປູກກ້ວຍຢູ່ພື້ນທີ່ດັ່ງກ່າວຄະນະທີ່ລົງໄປເຫັນວ່າ ບໍ່ເໝາະສົມ ແລະອາດມີຜົນກະທົບຕໍ່ບັນຫາສີ່ງແວດລ້ອມ ແລະແຫຼ່ງນ້ຳ.
ທ່ານ ຄຳໄພ ພົມມະຈັນ ກ່າວຕື່ມວ່າ: ປະຈຸບັນຢູ່ເມືອງນາຍຊາທອງມີໂຄງການປູກກ້ວຍທັງໝົດ 3 ໂຄງການຢູ່ບ້ານແສນດິນ 2 ໂຄງການມີເນື້ອທີ່ 200 ກວ່າເຮັກຕາ ໃນນີ້ປູກມາແຕ່ປີ 2015 ມີ 1 ໂຄງການເນື້ອນທີ່ 88 ເຮັກຕາ ແລະທີ່ບ້ານແສນດິນມີ 1 ໂຄງການ ໂດຍໆທຸກໆໂຄງການແມ່ນຍັງຢູ່ໃນຂັ້ນຕອນປະກອບເອກະສານຂໍອະນຸຍາດຈາກພາກສ່ວນລັດ ມີພຽງໂຄງການທີ່ບ້ານອີ່ໄລເໜືອເທົ່ານັ້ນທີ່ລັດຈະໃຫ້ປູກ 100 ເຮັກຕາເພື່ອເປັນການທົດລອງໃນໂຄງການຜະລິດກະສິກຳສະອາດ ( GAP ) ຊຶ່ງເວລານີ້ຍັງຢູ່ໃນຂັ້ນຕອນການຜ່ານເອກະສານດ້ານສິ່ງແວດລ້ອມຢູ່.
ຂ່າວໂດຍ: ໜັງສືພິມ ເສດຖະກິດ-ສັງຄົມ