ໃນຕອນບ່າຍຂອງວັນທີ 6 ພຶດສະພາ 2019 ທີ່ສະຖານທູດໄທ ປະຈຳນະຄອນຫຼວງວຽງຈັນ ໄດ້ຈັດພິທີຖວາຍພຣະພອນໄຊມຸງຄຸນແດ່ ເຈົ້າຊີວິດ ມະຫາວະຊິຣາລົງກອນ ບະດິນທະຣະເທບພະຍະວະຣາງກູນ ແຫ່ງ ລາຊະອານາຈັກໄທ ເນື່ອງໃນໂອກາດຂື້ນຄອງລາຊະສົມບັດ ເປັນກະສັດແຫ່ງ ລາຊະອານາຈັກໄທ ຢ່າງເປັນທາງການ ໃນລາຊະການທີ່ 10 ໂດຍງານດັ່ງກ່າວແມ່ນມີພະນັກງານລັດພ້ອມດ້ວຍຄອບຄົວ ແລະ ປະຊາຊົນຊາວໄທທີ່ອາໄສຢູ່ໃນ ສປປ ລາວ ເຂົ້າຮ່ວມຢ່າງຫຼວງຫຼາຍ.
ທ່ານ ກຽດຕິຄຸນ ຊາດປະເສິດ ກ່າວວ່າ: ສະຖານເອກຄະລັດຊະທູດໄທ ປະຈຳນະຄອນຫຼວງວຽງຈັນ ໄດ້ເຊີນຊ່ວນ ຄົນໄທ ແລະ ຄອບຄົວ ໃຫ້ມາຮ່ວມ ກິດຈະກຳເພື່ອສະແດງຄວາມຈົ່ງຮັກພັກດີ ເພື່ອເທີດພຣະກຽດ ແດ່ພຣະອົງທ່ານ ໂດຍກິດຈະກຳ ທຳອິດແມ່ນຈັດຂື້ນໃນຕອນເຊົ້າຂອງວັນທີ 4 ພຶດສະພາ 2019 ໂດຍມີການເຮັດບຸນຕັກບາດຕອນເຊົ້າ ແດ່ພຣະສົງຈຳນວນ 80 ອົງ ທີ່ ກົມມະລຽນພຣະທາດຫຼວງ ເຊິ່ງເປັນວັດເອກຂອງ ສປປ ລາວ ໂດຍມີພະນັກງານລັດ ແລະ ຄອບຄົວ ພີ່ນ້ອງຊາວໄທ ໃນ ສປປ ລາວ ເຂົ້າຮ່ວມຢ່າງຫຼວງຫຼາຍ ໃນມື້ດຽວກັນນັ້ນ ທາງປະເທດໄທກໍຈັດງານທາງພຣະພຸດທະສາດສະໜາເຊັ່ນກັນ
ໃນວັນທີ 6 ພຶດສະພາ 2019 ທາງສະຖານເອກຄະລັດຊະທູດ ກໍໄດ້ເຊີນຊ່ວນຄົນໄທ ໃນ ສປປ ລາວ ໃຫ້ມາຮ່ວມກັນທີ່ ສະຖານເອກຄະລັດຊະທູດໄທ ເພື່ອຖວາຍພຣະພອນໄຊມຸງຄົນ ພ້ອມກັນກັບ ທາງປະເທດໄທ ໂດຍມີການດືງສັນຍານ ການຖ່າຍທອດສົດຈາກປະເທດໄທເພື່ອໃຫ້ປະຊາຊົນຄົນໄທໃນທົ່ວໂລກ ກໍຄືປະຊາຊົນຄົນໄທ ໃນປະເທດລາວ ໄດ້ຖວາຍພຣະພອນໄຊມຸງຄົນແດ່ພຣະເຈົ້່າມະຫາຊິວິດພ້ອມກັນ.
ທ່ານ ກຽດຕິຄຸນ ຊາດປະເສິດ ຍັງໄດ້ກ່າວຕື່ມວ່າ: ວັນທີ 29 ພຶດສະພາ 2019 ຈະມີການຈັດກິດຈະກຳຈິດອາສາ ໂດຍການໄປຊ່ວຍເຫຼືອ ໂຮງຮຽນເດັ່ກພີການ ໂດຍມີຫຼາຍກິດຈະກຳເຊັ່ນ: ຊ່ວຍເຫຼືອລະບົບນໍ້າປະປາ, ລ້ຽງອາຫານ, ການຊ່ວຍເຫຼືອໃນດ້ານການຝືກອົບຮົມຄູ່ ແລະ ອີກກິດຈະກຳໜື່ງ ໃນວັນທີ 5-6 ມິຖຸນາ 2019 ແມ່ນຈະຈັດໂຄງການທັນຕະແພດພຣະຣາດຊະທານ ໂດຍການກວດສຸຂະພາບແຂ້ວແດ່ພຣະສົງ ທີ່ ວັດອົງຕື້ ເພື່ອຖວາຍເປັນກຸສົນແດ່ ເຈົ້າຊີວິດ ມະຫາວະຊິຣາລົງກອນ ບະດິນທະຣະເທບພະຍະວະຣາງກູນ
Hits: 5
