ນັບແຕ່ຕົ້ນເດືອນ ມັງກອນ ຫາເດືອນ ພຶດສະພາ ປີ 2019 ຢູ່ເມືອງໂຂງ ແຂວງຈຳປາສັກ ໄດ້ມີຜູ້ຕິດເຊື້ອໄຂ້ຍຸງລາຍຈຳນວນທັງໝົດ 87 ກໍລະນີ ແລະ ເສຍຊີວິດ 1 ຄົນທີ່ບ້ານຫາງສັນ; ພາກສ່ວນທີ່ກ່ຽວຂ້ອງກໍ່ຄືຫ້ອງການສາທາລະນະສຸກເມືອງມີຄວາມກັງວົນວ່າ: ພະຍາດໄຂ້ຍຸງລາຍຈະລະບາດເປັນວົງກວ້າງຄືກັບຫຼາຍປີທີ່ຜ່ານມາ ຈຶ່ງຫາວິທີປ້ອງກັນໂດຍຈັດກິດຈະກຳທຳລາຍໜອນນ້ຳ ແລະ ວິທີອື່ນໆ.
ພາກສ່ວນທີ່ກ່ຽວຂ້ອງຍັງໄດ້ຮຽກຮ້ອງໃຫ້ທຸກພາກສ່ວນຈົງມີສ່ວນຮ່ວມຫຼາຍຂຶ້ນໃນການຕອບໂຕ້ການແຜ່ລະບາດຂອງພະຍາດໄຂ້ຍຸງລາຍ ໂດຍໃຫ້ປະຕິບັດ 5 ປເຊັ່ນ: ປິດຝາພາຊະນະທີ່ເກັບນ້ຳໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂ່ໃສ່; ປ່ຽນນ້ຳ ແລະ ຜັດຖູພາຊະນະເຊັ່ນ: ເຕົ້າດອກໄມ້, ນ້ຳຮອງຕີນຕູ້, ຖ້ານຮອງຈອກນ້ຳ…; ປ່ອຍປາຫາງນົກຍຸງ ເພື່ອກິນໜອນນ້ຳ; ປັບປຸງບໍ່ໃຫ້ມີນ້ຳຄ້າງຂັງກະໂປະ, ກະປ໋ອງ, ຮາງລິນ, ຢາງຕີນລົດເກົ່າ…; ປະຕິບັດເປັນປະຈຳທຸກໆອາທິດ ແລະ ຖ້າເປັນໄຂ້ໃຫ້ຟ້າວໄປປິ່ນປົວຢູ່ໂຮງໝໍ ຫຼືສຸກສາລາໃກ້ບ້ານທ່ານ.
ທີ່ມາ: ໜັງສືພິມປະເທດລາວ
