ປັດຈຸບັນ ກ້າວເຂົ້າສູ່ລະດູຝົນເຊິ່ງເປັນລະດູທີ່ມີຄວາມສ່ຽງ ກໍ່ໃຫ້ເກີດພະຍາດຕ່າງໆ ໂດຍສະເພາະ ພະຍາດໄຂ້ຍຸງລາຍ (ໄຂ້ເລືອດອອກ) ເພື່ອປ້ອງກັນ ແລະ ຕ້ານສະກັດກັ້ນພະຍາດດັ່ງກ່າວ ທຸກຄົນຄວນເປັນເຈົ້າການໃນການຈັດຕັ້ງປະຕິບັດຫຼັກການ 5 ປ ຢ່າງເອົາໃຈໃສ່.
ອີງຕາມການໃຫ້ຂໍ້ມູນຂອງທີມງານລະບາດວິທະຍາ ກະຊວງສາທາລະນະສຸກ ໃຫ້ຮູ້ວ່າ: ຜ່ານການສະຫຼຸບສັງລວມຄົນເຈັບພະຍາດໄຂ້ຍຸງລາຍ ນັບແຕ່ວັນທີ 29 ທັນວາ 2018 ເຖິງປັດຈຸບັນ ໄດ້ມີກໍລະນີຄົນເຈັບໄຂ້ຍຸງລາຍສະສົມ 3.652 ກໍລະນີ ແລະ ເສຍຊີວິດ 12 ກໍລະນີ ສະເພາະວັນທີ 11-17 ພຶດສະພາ 2019 ໄດ້ມີຄົນເຈັບຍ້ອນພະຍາດດັ່ງກ່າວ 425 ກໍລະນີ ແລະ ເສຍຊີວິດ 1 ກໍລະນີ ໃນນັ້ນ ແຂວງຈຳປາສັກ 145 ກໍລະນີ ສະຫວັນນະເຂດ 75 ກໍລະນີ ນະຄອນຫຼວງວຽງຈັນ 52 ກໍລະນີ ສາລະວັນ 29 ກໍລະນີ ຄຳມ່ວນ 32 ກໍລະນີ ຫຼວງນ້ຳທາ 13 ກໍລະນີ ວຽງຈັນ 10 ກໍລະນີ ອັດຕະປື 8 ກໍລະນີ ບໍລິຄຳໄຊ 4 ກໍລະນີ ເສຍຊີວິດ 1 ກໍລະນີ ໄຊຍະບູລີ 3 ກໍລະນີ ຫຼວງພະບາງ 2 ກໍລະນີ ແລະ ແຂວງເຊກອງ 1 ກໍລະນີ.
ສະນັ້ນ ທຸກຄົນຕ້ອງເປັນເຈົ້າການດ້ວຍຕົນເອງໃນການປະຕິບັດຫຼັກການ 5 ປ ທີ່ກະຊວງສາທາລະນະສຸກວາງອອກຄື: ປົກປິດພາຊະນະທີ່ກັກເກັບນ້ຳທັງໃນ ແລະ ນອກເຮືອນບໍ່ໃຫ້ຍຸງລາຍມາໄຂ່ໃສ່ ປ່ຽນນ້ຳ ແລະ ຜັດຖູທາງດ້ານໃນຂອງພາຊະນະທີ່ກັກເກັບນ້ຳເຊັ່ນ: ເຕົ້າດອກໄມ້ ນ້ຳຮອງຕີນຕູ້ ຖ້ານຮອງຈອກນ້ຳ ອ່າງເກັບນ້ຳເປື້ອນຫຼັງຕູ້ເຢັນ ປ່ອຍປາຫາງນົກຍຸງ ເພື່ອກິນໜອນນ້ຳຢູ່ຕາມອ່າງທີ່ໃຫຍ່ບໍ່ສາມາດຂວ້າມລ້າງໄດ້ ປັບປຸງສິ່ງແວດລ້ອມໃຫ້ສະອາດເປັນປະຈຳທຸກອາທິດ ບໍ່ມີກະໂປະ ກະປ໋ອງ ຢາງຕີນລົດ ແລະ ນ້ຳຂັງທີ່ເປັນແຫຼ່ງເພາະພັນຂອງຍຸງ ເປັນໄຂ້ຮີບຟ້າວໄປພົບໝໍຢູ່ໂຮງໝໍໃກ້ບ້ານທ່ານ ບໍ່ຄວນຖືເບົາຊື້ຢາມາກິນເອງຊັກຊ້າອາດພາໃຫ້ເສຍຊີວິດ.
ຂໍ້ມູນອ້າງອີງ: ໜັງສືພິມວຽງຈັນໃໝ່
Hits: 11
