Friday, July 19, 2024
Lenovo

ບຸນບັ້ງ​ໄຟ ບັນຫາເລື່ອງ “ຄວາມ​ປອດ​ໄພ ແລະ ຮີດຄອງ” ​

ບຸນບັ້ງ​ໄຟ ແມ່​ນ​ຮີດ​ຄອງ​ຂອງ​ຄົນ​ລາວ​ມາ​ຫຼາຍ​ເຊັ່ນ​ຄົນ​ແລ້ວ ແລະ​ເປັນ​ເອ​ກະ​ລັກ​ອັນ​ໜຶ່ງ​ຂອງ​ລາວ ແຕ່​ມາ​ຮອດປັດຈຸ​ບັນ ເຫດ​ຜູ້​ຄົນ​ໄດ້​ຮັບ​ບາດ​ເຈັບ​ ຫຼື ເສຍ​ຊີ​ວິດ​ຈາກ​ບຸນບັ້ງ​ໄຟ ມີ​ໃຫ້​ເຫັນ​ເກືອບ​ທຸກ​ປີ ອັນ​ນີ້​ເປັນ​ສັນ​ຍານ​ວ່າ ​ພວກ​ເຮົາ ຍັງ​ຈະ​ເຮັດ​ຄື​ເກົ່າ​ບໍ່?

ເຫດ​ບັ້ງ​ໄຟ ຕຳ​ຫົວເດັກ​ນ້ອຍຊາຍ ອາ​ຍຸ 8 ປີ ໃນ​ວັນ​ທີ 4 ພຶດ​ສະ​ພາ 2019 ໃນ​ບຸນບັ້ງ​ໄຟຂອງ​ບ້ານ ໂພນ​ໄຊ ແຂວງວຽງ​ຈັນ ແລະ​ເສຍ​ຊີ​ວິດ ເມື່ອເວ​ລາ​ຕໍ່​ມາ ໄດ້​ສ້າງ​ຄວາມ​ເສົ້າ​ສະຫຼົດ​ຕໍ່​ຄອບ​ຄົວ ແລະ​ສັງ​ຄົມ​ຢ່າງ​ຍິ່ງ.

ເຫດ​ການ​ດັ່ງ​ກ່າວ ແມ່ນ​ເກີດ​ຈາກ​ການ​ຈູດບັ້ງ​ໄຟ​ນ້ອຍ ທີ່​ແມ່​ຄ້າເອົາ​ມາ​ຂາຍ​ໃນ​ງານ ເຊິ່ງ​ຜູ້​ຈູດ​ກໍ​ເປັນ​ຊາຍ​ສະ​ກັນ ທີ່​ບໍ່​ຮູ້​ເທົ່າ​ເຖິງ​ການ ແລະ​ຖືກ​ຕຳຫຼວດກັກ​ໃນ​ໄລ​ຍະ​ຕໍ່​ມາ.

ຫຼັງ​ຈາກນັ້ນ​ສອງ​ອາ​ທິດ ຄື​ວັນ​ທີ 18 ພຶດ​ສະ​ພາ 2019 ກໍ​ມີ​ເຫດ​ການບັ້ງ​ໄຟ​ຕຳ​ຫົວ​ເດັກ​ນ້ອຍຍິງ ​ເສຍ​ຊີ​ວິດ​ອີກ, ເທື່ອນີ້ ເ​ກີດ​ຂຶ້ນ​ຢູ່​ບ້ານວັງ​ຄີ, ເມືອງຫີນ​ເຫີບ ແຂວງວຽງ​ຈັນ.

ເດັກ​ນ້ອຍ​ຄົນ​ດັ່ງ​ກ່າວ ອາ​ຍຸ​ໄດ້​ພຽງ​ 6 ປີ ເທົ່າ​ນັ້ນ. ເຫດ​ການ​ຄັ້ງ​ນີ້ ກໍ​ແມ່ນ​ເກີດ​ຈາກບັ້ງ​ໄຟ​ນ້ອຍອີກ ເຊິ່ງ​ເປັນເລື່ອງ​ໜ້າ​ເສົ້າ​ເປັນ​ທີ່​ສຸດ.

ໃນ​ເວ​ລາໄລ​ເລ່ຍ​ກັນ ກໍ​ມີ​ເຫດ​ການບັ້ງ​ໄຟຕົກ​ໃສ່​ເຮືອນ​ປະ​ຊາ​ຊົນ ຢູ່​ບ້ານ​ນາ​ຊອນ ເມືອງ​ປາກ​ງື່ມນະ​ຄອນຫຼວງວຽງ​ຈັນ ເຊິ່ງ​ເປັນ​ບ້ານ​ທີ່​ມີຊື່​ສຽງ​​ ເລື່ອງ ບຸນບັ້ງ​ໄຟ​ແຫ່ງ​ໜຶ່ງ​ເຊັ່ນ​ກັນ, ​ເປັນ​ຈັ່ງ​ໂຊກ ບໍ່​ມີ​ຜູ້​ບາດ​ເຈັບ ຫຼື ເສຍ​ຊີ​ວິດ ແຕ່​ກໍ​ອາດ​ສະ​ເທືອນຈິດ​ໃຈ ​ຜູ້​ເປັນ​ເຈົ້າ​ຂອງ​ເຮືອນບໍ່​ແມ່ນ​ໜ້ອຍ.

ຈາກ​ບັນ​ດາ​ເຫດ​ການ​ທີ່​ເກີດ​ຂຶ້ນທັງ​ປີນີ້ ແລະ​ປີ​ຜ່ານ​ມານັ້ນ ໄດ້​ເຮັດ​ໃຫ້​ຜູ້​ຄົນ​ໃນ​ສັງ​ຄົມເກີດ​ມີ​ການ​ຖົກ​ຖຽງ​ກັນ​ວ່າ ຈະ​ເອົາ​ອັນ​ໃດ ລະ​ຫວ່າງ ຮີດ​ຄອງວັດ​ທະ​ນະ​ທຳ ແລະ ຄວາມ​ປອດ​ໄພທາງຊີ​ວິດ ແລະ​ຊັບ​ສິນ​ຂອງ​ຜູ້​ຄົນ?

ບຸນບັ້ງ​ໄຟ ແມ່ນ​ມີ​ກາ​ນ​ສະ​ເຫຼີມ​ສະຫຼອງ​ມາ​ແຕ່​ດົນ​ນານ​ແລ້ວ, ກາຍ​ເປັນ​ເອ​ກະ​ລັກ ແລະ​ສາ​ມາດ​ດຶງ​ດູດ​ຄວາມ​ສົນ​ໃຈຈາກ​ຊາວ​ລາວ ແລະ​ຄົນ​ຕ່າງ​ປະ​ເທດບໍ່​ໜ້ອຍ.

ຕາມ​ຄວາມ​ເຊື່ອ​ແລ້ວ ການ​ເຮັດ​ບຸນບັ້ງ​ໄຟ ແມ່ນ​ການ​ຂໍ​ໃຫ້ ຝົນ​ຕົກ​ຕາມ​ລະ​ດູ​ການ ເພື່ອ​ໃຫ້​ມີ​ນ້ຳ​ພຽງ​ພໍ ຕໍ່​ການ​ຜະ​ລິດ​ຂອງ​ປະ​ຊາ​ຊົນ ເຊິ່ງ​ເປັນ​ເລື່ອງ​ທີ່​ສວາຍ​ງາມ ທີ່​ພວກ​ເຮົາ​ປະ​ຕິ​ບັດ​ກັນ​ສືບ​ມາ.

ພວກ​ເຮົາ​ອາດ​ເຂົ້າ​ໃຈ​ກັນ​ດີ​ວ່າໃນ​ອາ​ດີດນັ້ນ ປູ​ຍ່າ ຕາ​ຍາຍ ເພິ່ນມີ​ເນື້ອ​ທີ່​ທີ່ບໍ່​ມີ​ຜູ້​ຄົນ​ອາ​ໄສ​​ຢູ່ນັ້ນ ຢ່າງກວ້າງ​ຂວາງ ແລະ​ບໍ່​ມີບັ້ງ​ໄຟນ້ອຍ ທີ່​ຜູ້​ຄົນ​ສາ​ມາດ​ຊື້ ແລະ​ຈູດ​ຊະ​ຊາຍ​ຄື​ດຽວນີ້, ເພາະ​ສະ​ນັ້ນ ຄວາມ​ສ່ຽງໃນ​ການ​ເກີດ​ອຸ​ບັດ​ເຫດອາດ​ມີ​ຕ່ຳ​ກວ່າ ເຊິ່ງ​ກົງ​ກັນ​ຂ້າມຄື​ທຸກມື້ນີ້ ປະ​ຊາ​ຊົນ​ເພີ່ມ​ຂຶ້ນເຮືອນ​ຊານ ກໍ​ຢັ່ງ​ຢາຍໄປ​ທົ່ວ​ທຸກ​ບ່ອນ, ບວກກັບທ່າ​ອ່ຽງ​ທີ່​ວ່າ ພວກ​ເຮົາໄດ້​ເອົາ ງານ​ບຸນບັ້ງ​ໄຟ (ແລະ​ບຸນ ອື່ນໆ) ເປັນ​ເຫດ​ຜົນ ​ໃນການ​ດຶ່ມ​ເຫຼົ້າເມົາ​ສຸ​ລາ ຍິ່ງ​ເພີ່ມ​ຄວາມ​ສ່ຽງ​ຕໍ່​ການ​ເກີດເຫດ​ທີ່ບໍ່ເພິ່ງ​ປາ​ຖະ​ໜານີ້.

ເພາະ​ສະ​ນັ້ນ, ປະ​ຊາ​ຊົນຈຳ​ນວນຫຼວງ​ຫຼາຍ ຈຶ່ງ​ຮຽກ​ຮ້ອງວ່າ ການ​ຈັດ​ງານ​ບຸນບັ້ງ​ໄຟ ເຊິ່ງ​ເປັນ​ການ​ຮັກ​ສາຮີດ​ຄອງ​ຂອງ​ພວກ​ເຮົາ​ນັ້ນ ຕ້ອງ​ເອົາ​ຄວາມ​ປອດ​ໄພ​ມາ​ກ່ອນ, ເລີ່ມ​ຈາກການ​ຫ້າມ​ຈຳ​ໜ່າຍ ແລະ​ຈູດບັ້ງ​ໄຟ​ນ້ອຍຊະ​ຊາຍ, ການ​ສຳ​ຫຼວດພື້ນ​ທີ່ ແລະ​ມາດ​ຕະ​ຖານຕ່າງໆ ຂອງ​ “ຄັ້ງ​ຈູດບັ້ງ​ໄຟ” ຈົນ​ຮອດຂະ​ໜາດບັ້ງ​ໄຟຢ່າງ​ເຄັ່ງ​ຄັດ ເພື່ອຫຼຸ​ດ​ຜ່ອນ​ຄວາມ​ສ່ຽງຕໍ່​ການ​ສູນ​ເສຍ​ທີ່​ບໍ່​ຕ້ອງ​ການນັ້ນ​ລົງ.

ພ້ອມນັ້ນ, ອາດ​ສົ່ງ​ເສີມ​ການ​ປະ​ກວດ​ຄວາມ​ງາມການເຮັດ​ບຸນບັ້ງ​ໄຟ ​ເລີ່ມ​ຈາກການ​ປະ​ດັບ​ດາບັ້ງ​ໄຟ, ການ​ແຫ່ ແລະ ອື່ນໆ ເພື່ອດຶງ​ດູງ​ນັກ​ທ່ອງ​ທ່ຽວ ​ແທນ​ທີ່​ຈະ​ສົ່ງ​ເສີມ​ການຈູດ​ທີ່​ນຳ​ມາ​ເຊິ່ງ​ຄ​ວາມ​ສ່ຽງ​ດັ່ງ​ກ່າວ ຫຼື ວິ​ທີ​ທາງ​ອື່ນ ເພື່ອ​ຫັນ​ເອົາຄວາມ​ເປັນ​ເອ​ກະ​ລັກ​ນີ້ ໜີ​ຈາກ​ຄວາມ​ອັນ​ຕະ​ລາຍກາຍ​ເປັນ​ສິ່ງ​ງົດ​ງາມ​ຂອງວິ​ຖີ​ຊີ​ວິດ​ຊາວ​ລາວ​ສືບ​ຕໍ່​ໄປ.

ແຫຼ່ງຂໍ້ມູນ: ໜັງສືພິມລາວພັດທະນາ

InsideLaos
InsideLaoshttp://insidelaos.com
Online Journalists at insidelaos.com.

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

“ອົດອາຫານ” ບໍ່ຊ່ວຍໃຫ້ຫຼຸດນຳ້ໜັກ

ການອົດອາຫານນັ້ນ ສຳພັນກັບການຈຳກັດ ແຄລໍຣີ່ ຂອງອາຫານທີ່ເຮົາກິນໃນແຕ່ລະມື້, ການນັບ ແຄລໍຣີ່ ເປັນວິທີທີ່ໄດ້ຮັບຄວາມນິຍົມຫຼາຍ ຊຶ່ງມີທີມນັກວິໄຈດ້ານໂພຊະນາການ ໃນ ສະຫະລັດ ອາເມຣິກາ ໄດ້ລາຍງານລົງໃນວາລະສານ ການແພດ ເຈເອເອັມເອ (JAMA International Medicine) ເຖິງຜົນການລົງເລິກກວດຜູ້ໃຫຍ່ ທີ່ລະບຸວ່າ ອ້ວນເຖິງ 100 ຄົນ ໂດຍແບ່ງຈາກພຶດຕິກຳການກິນເປັນ 3 ກຸ່ມ ຊຶ່ງເປັນເວລາ 1 ປີ.

ຈົບມໍປາຍ ຈະຮຽນຕໍ່ສາຍໃດດີ?

ເມື່ອກ່ອນ ການສຶກສາຖືໄດ້ວ່າມີບັນຍາກາດຄຶກຄື້ນ ແລະ ເປັນຂະບວນການ ຫຼາຍຄົນແຂ່ງກັນຮຽນ ແຂ່ງກັນເສັງເພື່ອຈະໄດ້ເຂົ້າຮຽນສາຍທີ່ຕົນເອງມັກ ແຕ່ຕົກມາຍຸກປັດຈຸບັນນີ້ ດ້ວຍສະພາບເສດຖະກິດ ສະພາບແວດລ້ອມ ແລະ ຫຼາຍຢ່າງໃນສັງຄົມທີ່ຜັນແປໄປ ເດັກນ້ອຍສ່ວນໃຫຍ່ບໍ່ຢາກທີ່ຈະຮຽນຕໍ່, ບາງຄົນກໍຈຳເປັນຕ້ອງອອກໄປເຮັດວຽກເພື່ອຫາເງິນຊ່ວຍຄອບຄົວ, ຫຼາຍຄົນກໍອອກມາປະກອບກິດຈະການເຮັດທຸລະກິດ ເປັນນາຍຂອງຕົນເອງ ແຕ່ບໍ່ວ່າຈະຢ່າງໃດກໍຕາມ ຖ້າຄົນທີ່ມີເງືອນໄຂກໍຍັງສະໜັບສະໜູນໃຫ້ຮຽນຕໍ່ສາຍວິຊາຊີບໃຫ້ຈົບຈະເປັນການດີທີ່ສຸດ.

ຍຸກນີ້! ຕ້ອງອວດກັນປະຢັດ

ເມື່ອສັງຄົມເຮົາກ້າວເຂົ້າສູ່ຍຸກທີ່ເຂົ້າຍາກມາກແພງ ຫຼາຍຄົນ “ຫາເຊົ້າກິນເຊົ້າ” ບໍ່ແມ່ນ “ຫາເຊົ້າກິນຄໍ່າ” ຄືແຕ່ກ່ອນແລ້ວ ເຄື່ອງໃຊ້ຂອງສອຍຕ່າງໆ ກໍລ້ວນແຕ່ລາຄາສູງຂຶ້ນເທົ່າຕົວ, ເຮົາຍັງຈະພາກັນມາອວດລວຍໂຊລົດສະນິຍົມດີໆ ໃຊ້ຂອງແພງໆ ກິນອາຫານຫຼູຫຼາ ຕາມຄົນມີລາຍຮັບທີ່ໝັ່ນຄົງ ຫຼື ຄົນຮັ່ງມີບໍ່ໄດ້ແລ້ວ