ພາກວິຊາສ້າງຄູພາສາລາວ-ວັນນະຄະດີ ຄະນະສຶກສາສາດ ມະຫາວິທະຍາໄລແຫ່ງຊາດ ໄດ້ຈັດງານແຂ່ງຂັນໂຕ້ວາທີ ພາຍໃຕ້ຫົວຂໍ້ “ນະວັດຕະກໍາ ນໍາສ້າງສັນ ທັນສະໄໝ” ຄັ້ງທີ 2 ຂຶ້ນທີ່ ຫ້ອງປະຊຸມ ສະໂມສອນ ມະຫາວິທະຍາໄລແຫ່ງຊາດ.
ໂດຍການເຂົ້າຮ່ວມເປັນປະທານຂອງທ່ານ ປທ.ວິຊຽນ ທອງທະວີ ຮອງຄະນະບໍດີ ຄະນະສຶກສາສາດ, ມີບັນດາຫົວໜ້າພະແນກ, ຮອງພະແນກ, ຫົວໜ້າພາກວິຊາ, ພະນັກງານອາວຸໂສ, ແຂກທີ່ຖືກເຊີນ ພະນັກງານ, ຄູ-ອາ ຈານ ແລະນັກສຶກສາເຂົ້າຮ່ວມ.
ໃນໂອກາດນີ້, ທ່ານ ປທ. ວິຊຽນ ທອງທະວີ ໄດ້ຂຶ້ນກ່າວເປີດພິທີ ທ່ານໄດ້ກ່າວບາງຕອນວ່າ:
ພາສາລາວແມ່ນຜະລິດຕະພັນອັນໜຶ່ງຂອງຊາດລາວ ທັງເປັນພາຫະນະໃນການສຶ່ສານຂອງຄົນເຮົາໃນສັງຄົມ.
ດັ່ງນັ້ນ, ເພື່ອເປັນການອະນຸລັກ ແລະສົ່ງເສີມໄວ້. ພາກວິຊາສ້າງຄູພາສາລາວ-ວັນນະຄະດີ ຈຶ່ງຈັດງານການແຂ່ງ ຂັນຄັ້ງນີ້ຂຶ້ນ ໂດຍມີຈຸດປະສົງແນໃສ່ສົ່ງເສີມທັກສະການນໍາໃຊ້ພາສາລາວ, ເຝິກການເວົ້າວາທະສິນ ທັງເປັນການທົດສອບຄວາມຮູ້ ຄວາມສາມາດໃນການໂຕ້ວາທີຂອງນັກສຶກສາ ທັງນີ້ກໍເພື່ອເປັນການປົກປັກຮັກສາວັດທະນະທໍາອັນລໍ້າຄ່າຂອງຊາດ ໂດຍສະເພາະແມ່ນພາສາລາວ.
ພ້ອມນັ້ນການຈັດການແຂ່ງຂັນດັ່ງກ່າວ ຍັງເປັນການສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ V ຂອງຄະນະພັກຮາກຖານ ຄະນະສຶກສາສາດ ອີກດ້ວຍ.
ການແຂ່ງຂັນດັ່ງກ່າວ, ປະກອບມີ 4 ທີມ: ມີທີມສາມໃບອ່ອນ, ທີມຍຸກໃໝ່ຫົວໃຈ 4G, ທີມສັງສິນໄຊ ແລະທີມມາກັບພຣະ. ການແຂ່ງຂັນແມ່ນແບ່ງອອກເປັນ 2 ສາຍ ໂດຍຄັດເອົາທີມທີ່ຊະນະເຂົ້າໄປພົບກັນໃນຮອບສຸດທ້າຍ.
ຜ່ານການແຂ່ງຂັນ ຜົນປະກົດວ່າທີມຊະນະເລີດໄດ້ແດ່: ທີມມາກັບພຣະ ຜ່ານຫົວຂໍ້ “ສິບຜູ້ຮູ້ ບໍ່ທໍ່ຜູ້ເຄີຍ” ທີມຊະນະເລີດແມ່ນໄດ້ຮັບຂັນລາງວັນໄປຄອງ.
ໃນແຂ່ງຂັນໃນຄັ້ງນີ້ແມ່ນໄດ້ຮັບການສະໜັບສະໜູນຈາກຫຼາຍພາກສ່ວນ ໂດຍສະເພາະແມ່ນ ທະນາຄານການຄ້າຕ່າງປະເທດລາວ, ຮ້ານຂາຍປຶ້ມດີບຸກ, ສວນພູໄທທິລະ ແລະພາກສ່ວນອື່ນໆອີກດ້ວຍ.
ແຫຼ່ງຂໍ້ມູນ: ເວບໄຊມະຫາວິທະຍາໄລແຫ່ງຊາດ (www.nuol.edu.la)