ຫົວໜ້າກົມປ່າໄມ້ ກະຊວງກະສິກໍາ ແລະ ປ່າໄມ້ ໄດ້ໃຫ້ສໍາພາດວ່າ: ເພື່ອສ້າງຂະບວນການ ເນື່ອງໃນໂອກາດ ວັນປູກຕົ້ນໄມ້ແຫ່ງຊາດປີນີ້ ກະຊວງກະສິກໍາ ແລະ ປ່າໄມ້ ໄດ້ວາງຄາດໝາຍໄວ້ວ່າທົ່ວປະເທດຈະປູກໄມ້ໃຫ້ໄດ້ທັງໝົດ 10 ພັນເຮັກຕາ ແລະ ຟື້ນຟູປ່າທໍາມະຊາດໃຫ້ໄດ້ 5 ແສນເຮັກຕາ ແລະ ເພື່ອບັນລຸຄາດໝາຍດັ່ງກ່າວ ກໍໄດ້ສົມທົບກັບອົງການປົກຄອງທ້ອງຖິ່ນໃນທົ່ວປະເທດ ກະກຽມ ແລະ ກ້າເບ້ຍໄມ້ໄວ້ແລ້ວ 22 ລ້ານກວ່າເບ້ຍ ແລະ ຈະເລັ່ງໃຫ້ການບົວລະບັດຮັກສາໄມ້ປູກໃໝ່ມີປະສິດທິຜົນກວ່າເກົ່າ.
ສະເພາະວັນທີ 1 ມິຖຸນາ ຊຶ່ງເປັນວັນປູກໄມ້ແຫ່ງຊາດ ນີ້, ກະຊວງກະສິກໍາ ແລະ ປ່າໄມ້ ຈະໄດ້ຮ່ວມກັບ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ນະຄອນຫຼວງວຽງຈັນ ຈັດພິທີປູກໄມ້ ຢູ່ສວນພຶກສາສາດ ຫ້ວຍຍາງ-ດົງໝາກຄາຍ ໃນເນື້ອທີ່ 5 ເຮັກຕາ.
ໃນແຜນຈະປູກໄມ້ຢູ່ສວນດັ່ງກ່າວທັງໝົດ 50 ເຮັກຕາ ເພື່ອຟື້ນຟູ່ສະພາບປ່າໄມ້ຢູ່ສວນດັ່ງກ່າວ ໃຫ້ມີຄວາມດົກໜາ ແລະ ອຸດົມສົມບູນໄປດ້ວຍຊະນິດໄມ້ພື້ນເມືອງ ແລະ ພັນໄມ້ນາໆຊະນິດ ແນໃສ່ສ້າງສວນແຫ່ງນີ້ກາຍເປັນສະຖານທີ່ສຶກສາຄົ້ນຄວ້າດ້ານປ່າໄມ້, ເປັນແຫຼ່ງພັນໄມ້, ເປັນເຂດສຶກສານິເວດວິທະຍາ, ທັງເປັນແຫຼ່ງທ່ອງທ່ຽວທໍາມະຊາດ ແລະ ເປັນບ່ອນພັກຜ່ອນຢ່ອນໃຈຂອງສັງຄົມໃນອະນາຄົດ.
ທ່ານຫົວໜ້າກົມປ່າໄມ້ຍອມຮັບວ່າ: ການປູກໄມ້ໃນໄລຍະຜ່ານມາ ຍັງບໍ່ມີປະສິດທິຜົນເທົ່າທີ່ຄວນ ຍ້ອນງົບປະມານມີຈໍາກັດ, ປູກແລ້ວບໍ່ມີງົບປະມານໃນການບົວລະບັດຮັກສາ ແລະ ໂດຍບໍ່ໄດ້ມອບໝາຍໃຫ້ບຸກຄົນຮັບຜິດຊອບ.
ດັ່ງນັ້ນໃນຕໍ່ໜ້ານີ້, ກະຊວງຈະເພີ່ມຄວາມເອົາໃຈໃສ່ໃນການບົວລະບັດຮັກສາຕົ້ນໄມ້ທີ່ປູກໄປແລ້ວນັ້ນ ຄື: ມອບຄວາມຮັບຜິດຊອບໃຫ້ບຸກຄົນ ຫຼືພາກສ່ວນຮັບຜິດຊອບຢ່າງຂາດຕົວ ເຊັ່ນ: ຢູ່ສວນພຶດສາສາດ ຊຶ່ງໄດ້ມີການແຕ່ງຕັ້ງຄະນະຮັບຜິດຊອບບົວລະບັດຮັກສາເລີ່ມແຕ່ມື້ປູກຈົນຮອດຕົ້ນໄມ້ລອດຕາຍ.
ນອກຈາກເບື້ອງລັດຈະຮັບຜິດຊອບໃນສ່ວນປູກແລ້ວ, ຍັງຈະສົ່ງເສີມໃຫ້ບໍລິສັດ, ຜູ້ປະກອບການ ແລະ ປະຊາຊົນມີສ່ວນຮ່ວມ ໃນການສ້າງຂະບວນການປູກໄມ້ ແລະ ປົກປັກຮັກສາປ່າໄມ້ ເພື່ອກ້າວໄປສູ່ການນໍາໃຊ້ໄມ້ປູກເທື່ອລະກ້າວ. ຊຶ່ງໃນລະຍະຜ່ານມາທາງກົມປ່າໄມ້ໄດ້ມີການສໍາຫຼວດເນື້ອທີ່ດິນໃນຂອບເຂດທົ່ວປະເທດ ແລະ ຮູ້ແລ້ວວ່າປ່າເຂດໃດສາມາດຟື້ນຟູໄດ້ດ້ວຍຕົວມັນເອງ ແລະ ເຂດໃດທີ່ຊຸດໂຊມເປັນພູປອກໂລ້ນເພື່ອຈະມີແຜນປູກໄມ້ໃຫ້ຫຼາຍຂຶ້ນ.
ແຫຼ່ງຂໍ້ມູນ: ໜັງສືພິມລາວພັດທະນາ
