ສູນກາງຊາວໜຸ່ມປະຊາຊົນປະຕິວັດລາວ ຮ່ວມກັບ ບໍລິສັດ ສີສານ ອາດທິສ ເປັນຜູ້ຖືລິຂະສິດການຈັດງານປະກວດ Mister International Laos (Smart & Healthy) ຈາກລະດັບໂລກພຽງຜູ້ດຽວໃນລາວ ໄດ້ຈັດງານຖະແຫຼງຂ່າວການປະກວດຊາຍງາມ (Mister International Laos 2019) ເພື່ອສົ່ງຕໍ່ໄປລະດັບໂລກ ຢູ່ທີ່ໂຮງແຮມ ຄລາວ ພລາຊ່າ ວຽງຈັນ.
ໃຫ້ກຽດເຂົ້າຮ່ວມ ໄດ້ແກ່: ທ່ານ ສົມສະໜຸກ ມີໄຊ ຮອງຫົວໜ້າສະມາຄົມນັກຂ່າວແຫ່ງ ສປປ ລາວ ທັງເປັນປະທານ ແລະທີ່ປຶກສາໃຫ້ກັບກອງປະກວດ Mister International Laos, ທ່ານ ນວນທອງ ສຸວັນວິໄຊ ຫົວໜ້າຫ້ອງການ ສູນກາງຊາວໜຸ່ມປະຊາຊົນປະຕິວັດລາວ, ທ່ານ ສຸລິຍາ ແກ້ວພິລາວົງ ຫົວໜ້າກົມຂະບວນ ການຊາວໜຸ່ມ ຄະນະຊີ້ນໍາ-ນໍາພາ ໂຄງການ Mister International Laos, ທ່ານ ໄຊຊະນະນໍຣະສິງຫ໌ ສີສານ ຜູ້ອໍານວນການ ບໍລິສັດ ສີສານ ອາດທິສ ເຈົ້າຂອງລິຂະສິດ Mister International Laos ພຽງຜູ້ດຽວໃນ ສປປ ລາວ ແລະທ່ານ ວຽງສະໝອນ ຈິດຕະລາດ ຫົວໜ້າວິຊາການ ແລະພົວພັນຕ່າງປະເທດຂອງກອງປະກວດ Mister International Laos ພ້ອມດ້ວຍແຂກທີ່ຖືກເຊີນ.
ຈຸດປະສົງແມ່ນເພື່ອເລືອກເຟັ້ນເອົາ “ໜຸ່ມໜ້າຕາດີ, ສຸຂະພາບດີ ແລະມີຄວາມສາມາດ” ເພື່ອຍົກລະດັບເວທີການປະກວດຜູ້ຊາຍລາວກ້າວສູ້ສາກົນ, ເຜີຍແຜ່ຄວາມຮູ້ຄວາມສາມາດ ແລະຄວາມກ້າສະແດງອອກ ໃຫ້ເປັນທີ່ຮູ້ຈັກໃນລະດັບສາກົນ, ແລກປ່ຽນວັດທະນະທໍາ ຜ່ານກິດຈະກໍາຕ່າງໆ ໃນເວທີສາກົນ ແລະຍັງເປັນການສົ່ງເສີມການໂຄສະນາການທ່ອງທ່ຽວລາວສູ່ສາຍຕາຊາວໂລກອີກດ້ວຍ.
ເງື່ອນໄຂຜູ້ທີ່ຈະເຂົ້າສະໝັກ Mister International Laos ມີຄື: ຜູ້ຊາຍແທ້ສະຖານະໂສດ, ສັນຊາດລາວ, ອາຍຸລະຫວ່າງ 18-28 ປີ, ລວງສູງ 175 ຂຶ້ນໄປ ແລະມີຄວາມຮູ້ພື້ນຖານດ້ານພາສາອັງກິດ.
ການຄັດເລືອກ (Audition) ແມ່ນຈະເປີດຮັບ 2 ຄັ້ງ ຄື:
ຄັ້ງທີ 1 ວັນທີ 08 ມິຖຸນາ 2019 ແລະຄັ້ງທີ 2 ວັນທີ 06 ກໍລະກົດ 2019 ເລີ່ມຕັ້ງແຕ່ເວລາ 13:00-17:00 ໂມງ ທີ່ໂຮງແຮມ ຄລາວ ພລາຊ່າ ນະຄອນຫຼວງວຽງຈັນ.
ສ່ວນມື້ປະກວດຮອບສຸດທ້າຍແມ່ນ ວັນທີ 05 ຕຸລາ 2019 ທີ່ໂຮງແຮມ ຄລາວ ພລາຊ່າ ນະຄອນຫຼວງວຽງຈັນ ແລະຕົ້ນເດືອນ ພະຈິກ 2019 ແມ່ນຈະສົ່ງໄປປະກວດຢູ່ຕ່າງປະເທດ ຈະໄປປະກວດຢູ່ປະເທດໃດນັ້ນ ທາງກອງປະກວດຈະແຈ້ງໃຫ້ຮູ້ຕື່ມພາຍຫຼັງ.
ນອກນັ້ນ, ຍັງເປັນໂອກາດໃຫ້ນັກອອກແບບໜຸ່ມນ້ອຍ ໄດ້ມີການແຂ່ງຂັນກັນອອກແບບຊຸດປະຈໍາຊາດລາວໃຫ້ກັບຜູ້ຊະນະເລີດ Mister International Laos 2019 ຄົນທໍາອິດຂອງລາວ ໄດ້ສວມໃສ່ໃນເວທີລະດັບໂລກ. ຊຸດໃດຖືກຄັດເລືອກ ນັກອອກແບບຈະໄດ້ຮັບເງິນສົດມູນຄ່າ 1 ລ້ານກີບ.
ແຫຼ່ງຂໍ້ມູນ: ວາລະສານມະຫາຊົນ