ກອງປະຊຸມຄົບຄະນະບໍລິຫານງານສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ຈັດຂຶ້ນທີ່ ສຄອຊ ເປັນປະທານຂອງທ່ານ ອຸເດດ ສຸວັນນະວົງ ປະທານ ສຄອຊ ມີຄະນະບໍລິຫານງານ ສຄອຊ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ພູໄຊ ເທບພະວົງ ເລຂາທິການ ສຄອຊ ໄດ້ລາຍງານການຈັດຕັ້ງປະຕິບັດແຜນຍຸດທະສາດການພັດທະນາພາກທຸລະກິດຕາມ 4 ເສົາຄ້ຳ ແຕ່ປີ 2018-2020 ທີ່ກອງປະຊຸມຄະນະບໍລິຫານງານໄດ້ຮັບຮອງເອົາປີ 2017 ເພື່ອໃຫ້ກອງປະຊຸມຮັບຊາບ ແລະ ໃຫ້ທິດຊີ້ນຳ ເຊິ່ງເຫັນວ່າໄລຍະຜ່ານມາ ສຄອຊ ໄດ້ເອົາໃຈໃສ່ໃນການປະຕິບັດແຜນຍຸດທະສາດ ການພັດທະນາພາກທຸລະກິດຂອງຕົນຢ່າງເປັນລະບົບທີ່ປະກອບດ້ວຍ 4 ເສົາຄ້ຳຫຼັກ ແລະ ສອງເສົາຄ້ຳສະໜັບສະໜູນ ເພື່ອສ້າງຄວາມເຂັ້ມແຂງໃຫ້ອົງການຈັດຕັ້ງ ສຄອຊ ແລະ ພາກທຸລະກິດ ໃນນັ້ນ ມີວຽກງານພັດທະນາແວດລ້ອມທຸລະກິດ ບໍລິການສົ່ງເສີມວິສາຫະກິດຂະໜາດນ້ອຍ ແລະ ກາງ (SME) ການສົ່ງເສີມການຕະຫຼາດຂອງຜະລິດຕະພັນລາວ ແລະ ວຽກງານພັດທະນາລະບົບການຄຸ້ມຄອງຂໍ້ມູນຂ່າວສານ ແລະ ການປະຊາສຳພັນແບບລວມສູນຂອງພາກທຸລະກິດ ນອກນີ້ ສຄອຊ ຍັງໄດ້ເອົາໃຈໃສ່ຊຸກຍູ້ສົ່ງເສີມວຽກງານພົວພັນຮ່ວມມືຕ່າງປະເທດ ແລະ ການປັບປຸງການຈັດຕັ້ງຂອງ ສຄອຊ ແຂວງ ແລະ ສະມາຄົມ-ກຸ່ມທຸລະກິດໃຫ້ມີຄວາມເຂັ້ມແຂງຫຼາຍຂຶ້ນ.
ສຳລັບການເຄື່ອນໄຫວວຽກງານອັນພົ້ນເດັ່ນ ໃນຂະແໜງການຕ່າງໆໄລຍະ 5 ເດືອນຜ່ານມາ ໂດຍສະເພາະ ການພັດທະນາສົ່ງເສີມການຕະຫຼາດຜະລິດຕະພັນລາວ ເພື່ອເພີ່ມທະວີການສົ່ງເສີມຜະລິດຕະພັນຍີ່ຫໍ້ລາວ ໃຫ້ກ້າວສູ່ຕະຫຼາດສາກົນ ສຄອຊ ໄດ້ສ້າງຕັ້ງຫ້ອງການສົ່ງເສີມຜະລິດຕະພັນລາວ ຢູ່ສຳນັກງານຂອງຕົນ ເພື່ອບໍລິການໃຫ້ບໍລິສັດຜູ້ສົ່ງອອກຜະລິດຕະພັນຈາກລາວ ໄດ້ເຂົ້າເຖິງຕະຫຼາດ ຫຼື ເຂົ້າຮ່ວມຕ່ອງໂສ້ການຜະລິດລະດັບພາກພື້ນ ໂດຍໄດ້ຮ່ວມມືກັບກະຊວງອຸດສາຫະກຳ ແລະ ການຄ້າ ແລະ ອົງການສະຫະປະຊາຊາດ ພ້ອມນັ້ນ ໄດ້ຄັດເລືອກເອົາຜະລິດຕະພັນລາວຈຳນວນໜຶ່ງ ເພື່ອສ້າງເປັນຜະລິດຕະພັນຕົວແບບສົ່ງອອກຂອງລາວ ເຊັ່ນ: ຊາ ກາເຟ ເຂົ້າໜຽວ ແພໄໝ ອາຫານ ການທ່ອງທ່ຽວແບບອະນຸຮັກທຳມະຊາດ ແລະ ໄດ້ຈົດລິຂະສິດໃນໂລໂກຂອງ Made In Laos ເພື່ອຢັ້ງຢືນແຫຼ່ງກຳນົດສິນຄ້າຢ່າງເປັນທາງການ ໃນປີ 2018 ແລະ ອື່ນໆ.
ນອກນີ້ ກອງປະຊຸມຍັງໄດ້ຄົ້ນຄວ້າປືກສາຫາລືກ່ຽວກັບການມີສ່ວນຮ່ວມ ຂອງຄະນະບໍລິຫານງານທີ່ປືກສາ ແລະ ບັນດາບໍລິສັດໃຫຍ່ ທີ່ມີທ່າແຮງຊຸກຍູ້ການສ້າງຄວາມເຂັ້ມແຂງໃຫ້ກັບພາກທຸລະກິດຂັ້ນແຂວງ ແລະ ສະໜັບສະໜູນການແກ້ໄຂຄວາມທຸກຍາກຂອງປະຊາຊົນ ຕາມນະໂຍບາຍຂອງລັດຖະບານ ສະເໜີໂຄງການເງິນສົມທົບເພື່ອສົ່ງເສີມທຸລະກິດ ແລະ ບັນຫາເສດຖະກິດຕ່າງໆ ເພື່ອນຳສະເໜີລັດຖະບານພິຈາລະນາແກ້ໄຂ.
ແຫຼ່ງຂໍ້ມູນ: ໜັງສືພິມວຽງຈັນໃໝ່