ກອງປະຊຸມສະເໜີຫ້ອງປະຕິບັດງານເຫດການສຸກເສີນ ດ້ານສາທາລະນະສຸກ (PHEOC) ທີ່ເປັນມາດຕະຖານສາກົນ ແລະ ພັດທະນາຄູ່ມືທີ່ເປັນມາດຕະຖານ ໃນການຈັດຕັ້ງປະຕິບັດ ຈັດຂຶ້ນທີ່ແຂວງວຽງຈັນ ເປັນປະທານຮ່ວມຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ທ່ານ ມາກຈາຄອບ ຜູ້ຕາງໜ້າອົງ ການອະນາໄມໂລກປະຈຳລາວ ມີຜູ້ຕາງໜ້າຈາກກົມ ສູນ ແລະ ພະແນກສາທາລະນະສຸກແຂວງທົ່ວປະເທດເຂົ້າຮ່ວມ.
ຫ້ອງປະຕິບັດງານເຫດການສຸກເສີນດ້ານສາທາລະນະສຸກ ແມ່ນເພື່ອສ້າງຄວາມເຂັ້ມແຂງຕໍ່ວຽກງານເຝົ້າລະວັງສອບສວນ ແລະ ໂຕ້ຕອບຂອງພະຍາດຕິດຕໍ່ ໂດຍສະເພາະ ພະຍາດທີ່ເກີດຕາມລະດູການ ເຊັ່ນ:
ໄຂ້ຫວັດສັດປີກ ກໍຄື ພະຍາດທີ່ປ້ອງກັນດ້ວຍວັກຊີນ ແລະ ພະຍາດອື່ນໆ ເຊິ່ງໃນໄລຍະຜ່ານມາກະຊວງສາທາລະ ນະສຸກ ໄດ້ລິເລີ່ມເປີດຫ້ອງປະຕິບັດງານສຸກເສີນຂຶ້ນ ເພື່ອຕິດຕາມ ແລະ ໂຕ້ຕອບການລະບາດຂອງພະຍາດຕ່າງໆ ນັບແຕ່ຕົ້ນປີ 2019 ເປັນຕົ້ນມາ ອົງການອະນາໄມໂລກ ໄດ້ລາຍງານພະຍາດຊຶມເຊື້ອທີ່ເກີດຂຶ້ນໃໝ່ ແລະ ກັບຄືນມາເກີດໃໝ່ໃນທົ່ວໂລກ.
ປັດຈຸບັນ ພະຍາດອີໂບລາຍັງສືບຕໍ່ລະບາດໃນປະເທດຄົງໂກ ມີຈຳນວນສະສົມຫຼາຍກວ່າ 1.920 ກໍລະນີ ແລະ ເສຍຊີວິດ 1.281 ກໍລະນີ ພະຍາດຊຶມເຊື້ອລະບົບຫາຍໃຈ (MERS COV) ໃນປະເທດຊາອຸດິອາຣາເບຍ (Saudi Arabia) ມີ 2.037 ກໍລະນີ ແລະ ເສຍຊີວິດ 760 ກໍລະນີ ສະເພາະລາວເຮົານັບແຕ່ປີ 2013 ເຖິງປັດຈຸບັນ ກໍມີການລາຍງານສະພາບພະຍາດຕິດຕໍ່ເກີດຂຶ້ນຢ່າງເປັນປະຈຳ ກະຊວງສາທາລະນະສຸກ ໄດ້ເຮັດວຽກຢ່າງໃກ້ຊິດກັບບັນດາກົມກອງອ້ອມຂ້າງກະຊວງສາທາລະນະສຸກ ແລະ ຄູ່ຮ່ວມພັດທະນາເອົາໃຈໃສ່ຕິດຕາມເຝົ້າລະວັງ 18 ພະຍາດຕິດຕໍ່ ແລະ ວາງມາດຕະການສະກັດກັ້ນການລະບາດ ເຊິ່ງສາມາດສະກັດກັ້ນໄດ້ເຊັ່ນ:
ພະຍາດເປ້ຍລ່ອຍ ໄຂ້ທໍລະພິດ ອັກເສບຕັບຊະນິດເອ ໝາກແດງ ຄໍຕີບ ແລະ ພະຍາດຕິດຕໍ່ອື່ນໆທີ່ພົ້ນເດັ່ນ ສາ ມາດປ້ອງກັນ ແລະ ສະກັດກັ້ນບໍ່ໃຫ້ມີການລະບາດຂອງພະຍາດຕິດຕໍ່ ໄດ້ຢູ່ເຂດທີ່ໄດ້ຮັບຜົນກະທົບຈາກໄພພິ ບັດ ເມືອງສະໜາມໄຊ ແຂວງອັດຕະປື ການສະກັດກັ້ນ ແລະ ໂຕ້ຕອບການລະບາດ ຮຽກຮ້ອງໃຫ້ມີຈຸດປະສານງານໃນການຕິດຕາມເຝົ້າລະວັງ ແລະ ບັນຊາການທີ່ເປັນເອກະພາບໃນຂອບເຂດທົ່ວປະເທດ ຮັບປະກັນຄວາມເປັນເອກະພາບ ແລະ ໄດ້ຮັບມາດຕະຖານສາກົນ ທັງນີ້ ເພື່ອສະກັດກັ້ນບໍ່ໃຫ້ພະຍາດເກີດຂຶ້ນ ແລະ ແຜ່ກະຈາຍຢູ່ໃນປະເທດ ປ້ອງກັນບໍ່ໃຫ້ພະຍາດກະຈາຍອອກໄປນອກປະເທດ ແລະ ບໍ່ໃຫ້ພະຍາດຈາກປະເທດອື່ນເຂົ້າມາແຜ່ກະຈາຍໃນປະເທດເຮົາ.
ແຫຼ່ງຂໍ້ມູນ: ໜັງສືພິມວຽງຈັນໃໝ່