Thursday, July 10, 2025
Kbank Laos โอน รับ จ่าย

ປະຫວັດຂອງ “ຫໍຄໍາ” ພະລາດຊະວັງເກົ່າຂອງລາວ ແບບສິລະປະ ຝຣັ່ງ

ຫໍຄຳ ຫຼື ສຳນັກງານ​ປະທານ​ປະ​ເທດ ຕັ້ງສະຫງ່າ ​ແລະ​ໂດດ​ເດັ່ນ​ຢູ່​ປາຍ​ສຸດ​ຂອງ​ຖະ​ໜົນລ້ານ​ຊ້າງ ​ເຊິ່ງຕັດ​ກັບ​ຖະ​ໜົນ​ເສດ​ຖາ​ທິລາດ. ສະຖານ​ທີ່​ນີ້ຖືກ​ສ້າງ​ຂຶ້ນມາ​ສຳລັບ​ລັດຖະບານ​ຂອງ​ພວກ​ລ່າ​ເມືອງ​ຂຶ້ນ​ຝຣັ່ງ ​ແລະ ຕໍ່​ມາ​ກໍ​ໄດ້​ຖືກ​ນຳ​ມາ​ໃຊ້ພະຣາຊະ​ວັງ​ ຫລັງ​ທີ 2 ຂອງ​ ພະ​ເຈົ້າສີສະ​ຫວ່າງ​ວົງ (ພະຣາຊະ​ວັງ​ ຫລັງ​ທີ 1 ຢູ່​ທີ່ ​ແຂວງ ຫລວງ​ພະ​ບາງ).

ຫໍຄໍາທີ່ເຮົາເຫັນຢູ່ທຸກມື້ນີ້ ຕາມພົງສາວະດານລາວ ແມ່ນຈຸດຕັ້ງຂອງພະລາດຊະວັງລ້ານຊ້າງວຽງຈັນ ເຊິ່ງສ້າງຂຶ້ນປີໃດກັນແທ້ນັ້ນ ຜູ້ຂຽນຂາດຂໍ້ມູນ ແຕ່ສັນນິຖານໄດ້ວ່າ ສະໄຫມພະເຈົ້າໄຊເຊດຖາທິລາດ. ພະລາດຊະວັງດັ່ງກ່າວສ້າງຂຶ້ນດ້ວຍສິລະປະທີ່ປານິດຈົບງາມ ປະດັບເອ້ດ້ວຍຍອດຄໍາແທ້ໆທີ່ມີຄ່າສູງຢ່າງມະຫາສານ.

ແຕ່ມໍລະດົກດັ່ງກ່າວ ຖືກສັກດີນາສະຫຍາມ ຈູດເຜົາທໍາລາຍໄປພ້ອມໆ ກັບເມືອງວຽງຈັນໃນປີ ຄ.ສ. 1828. ຫລັງຈາກນັ້ນກໍ່ກາຍເປັນພະລາດຊະວັງຮ້າງທີ່ເຫລືອແຕ່ກ້ອນຫິນ, ຂອນໄມ້ ກັບເທົ່າຖ່ານ ເປັນເວລາ ເກືອບ 65 ປີຈຶ່ງມີການຟື້ນຟູຄືນໃຫມ່ໃນສະໄຫມ ຝຣັ່ງເຂົ້າມາປົກຄອງລາວ.

ຝຣັ່ງຈຶ່ງສ້າງສໍານັກງານຂ້າຫລວງໃຫຍ່ ໃສ່ສະຖານທີ່ເດີມຂອງພະລາດຊະວັງດັ່ງກ່າວ. ຕໍ່ມາລັດຖະບານລາວໄດ້ຮື້ຕຶກຂ້າ ຫລວງນັ້ນອອກແລ້ວສ້າງຫໍຄໍາ ຫລັງທີ່ເຫັນໃນຮູບ ທໍາອິດນີ້ຂຶ້ນແທນໃນປີ 1974 ເພື່ອເປັນບ່ອນປະ ທັບຂອງເຈົ້າຊີວິດ, ໂດຍສ້າງຂຶ້ນຕາມ ແບບເຮືອນຝຣັ່ງທີ່ນະຄອນ ຕລີອານົງ ເຊິ່ງເຈົ້າຊີວິດເຄີຍໄປປະທັບໃນເມື່ອກ່ອນ. 

ຕໍ່ມາຫລັງຈາກ ປີ1975 ສະຖານທີ່ແຫ່ງນີ້ໄດ້ຖືກໃຊ້ເປັນ ສໍານັກງານປະທານປະເທດ ແລະຕໍ່ມາໃນປີ 1993 ໄດ້ມີການດັດແປງດ້ານຫນ້າຂອງອາຄານ ເພື່ອໃສ່ຕົວຫນັງສືລາວ ວ່າ “ຫໍຄໍາ“  ແລະຕໍ່ມາໃນປີ 2012 ເພື່ອຫວນຄືນເຖິງຄວາມສີວິໄລ ຂອງນະຄອນຫລວງວຽງຈັນປາງອາດີດ ແລະ ເພື່ອຮັກສາສິລະປະຊົງຫໍປາງ ຂອງກະ ສັດລາວ ທາງລັດຖະບານລາວ ຈຶ່ງມີການປັບປຸງຫລັງຄາໃຫ້ມີຈອມແຫລມ 5 ຈອມ, ມີຈອມໃຫຍ່ຢູ່ກາງ ທີ່ເປັນຍອດຈອມຄໍາແທ້ໆ 999.9 ນໍ້າຫນັກປະມານ 5 ກິໂລກຣາມ. ແລະ ຍອດຈອມ ນ້ອຍ 4 ຍອດ ປະກອບດ້ວຍທອງສໍາລິດ.

ການປັບປຸງຫລືສ້າງຫໍຄໍາໃຫມ່, ບໍ່ວ່າສະໄຫມໃດ ເລີ່ມຕົ້ນຝຣັ່ງປົກຄອງມາ ຈະສັງເກດເຫັນວ່າ ບໍ່ມີການຍຶດຖື ເອົາເອກະລັກເປັນຈຸດຢືນ. ສ້າງຂຶ້ນຕາມລົດນິຍົມ ຝຣັ່ງໂດຍບໍ່ຄໍານຶງເຖິງຄວາມເປັນເອກະລາດຂອງຕົນເອງ.

ແຕ່ມາໃນປັດຈຸບັນນີ້, ເພິ່ນໄດ້ເພີ່ມເຕີມບາງສ່ວນ ທີ່ສະແດງໃຫ້ເຫັນເຖິງ ເອກະລັກ ແລະສະຖາປັດຕະຍະກຳແບບລາວໆແລ້ວ.

ປັດຈຸບັນ, ສະຖານ​ທີ່​ດັ່ງກ່າວ​ຖືກ​ໃຊ້​ເປັນ​ບ່ອນ​ຮັບ​ແຂກ ​ແລະ ​ເປັນ​ບ່ອນ​ເຮັດ​ວຽກຂອງ​ປະທານ​ປະ​ເທດ​​ແຫ່ງ ສປ ປ ລາວ. ຫໍຄຳ​ເປັນ​ສະຖານ​ປັດຕະຍະ​ກຳໜຶ່ງທີ່​ອອກ​ແບບ​ດ້ວຍ​ການ​ປະສົມ​ປະສານ​ສິລະ​ປະ​ແບບ​ຟຣັ່ງ ​ແລະ ​ແບບ​ລາວ ຈຶ່ງ​ເຮັດ​ໃຫ້​ສະຖານ​ທີ່​ນີ້ມີ​ຄວາມ​ສວຍ​ງາມ, ສະດຸດ​ຕາ ​ແລະ ​ເປັນ​ເອກະລັກ​ສະ​ເພາະ​ອັນ​ໄດ້​ສ້າງ​ຄວາມ​ປະ​ທັບ​ໃຈ​ໃຫ້​ແກ່​ຜູ້​ຄົນ​ທີ່​ໄດ້​ພົບ​ເຫັນ. ​

ເຖິງ​ວ່າ​ຫໍຄຳ​ຈະ​ບໍ່​ໄດ້​ເປີດ​ໃຫ້​ບັນດາ​ນັກ​​ທ່ອງ​ທ່ຽວ​ເຂົ້າທ່ຽວຊົມ​ ຄື​ກັນ​ກັບ​ສະຖານ​ທີ່​ທ່ອງ​ທ່ຽວອື່ນ​ກໍ່ຕາມ, ແຕ່​ບັນດາ​ທ່ານ​ສາມາດ​ໄປ​ແວ່​ຊົມ​ຄວາມ​ສວຍ​ງາມ ຫລື ຖ່າຍຮູບ​ຢູ່​ບໍລິ​ເວນ​ດ້ານ​ນອກ​ຂອງ​ຫໍຄຳ​ໄດ້.

InsideLaos
InsideLaoshttp://insidelaos.com
Online Journalists at insidelaos.com.

More from author

Related posts

Latest posts

ປະຫວັດບຸນເຂົ້າພັນສາ

ວັນບຸນເຂົ້າພັນສາ ໃນປີນີ້ ແມ່ນກົງກັບ ວັນທີ 20 ກໍລະກົດ 2024 ຫຼື ຂຶ້ນ 15 ຄໍ່າ ເດືອນ 8 ລາວ ຊຶ່ງເປັນມື້ທີ່ຊາວພຸດທະສາສະໜາ ຈະໄດ້ພ້ອມກັນນຳພາຄອບຄົວອອກໄປຟັງທຳມະເທສະໜາ ແລະ ໄດ້ມີການກະກຽມສິ່ງຂອງຕ່າງໆ ເພື່ອໄປທຳບຸນໃນມື້ເຂົ້າພັນສາ

ຢ່າມົວເຮັດວຽກຈົນລືມໄປທ່ຽວ ກັບ 5 ສະຖານທີ່ທ່ຽວໃນລະດູຝົນ

ເມື່ອເວົ້າເຖິງລະດູຝົນແລ້ວ ຫຼາຍຄົນອາດຄິດວ່າ ບໍ່ເໝາະສຳລັບການທ່ອງທ່ຽວ ຫຼື ແຄ້ມປິ້ງ ເພາະຝົນເຮັດໃຫ້ການເດີນທາງລຳບາກ, ປຽກ ແລະ ເປື້ອນ ແຕ່ຮູ້ບໍ່ວ່າຊ່ວງຝົນນີ້ລະ ເປັນອີກລະດູການທີ່ໜ້າທ່ຽວທີ່ສຸດໂດຍສະເພາະທ່ຽວທຳມະຊາດ ເພາະເຮົາຈະໄດ້ສຳຜັດກັບອາກາດທີ່ເຢັນສະບາຍ, ໃບໄມ້ທີ່ຂຽວງາມ, ໝອກທີ່ຈາງໆ ໃນຍາມເຊົ້າ, ຝົນຝອຍທີ່ຍ້ອຍລົງມາ ເຮັດໃຫ້ຮູ້ສຶກດີ ຜ່ອນຄາຍໄດ້ຫຼາຍທີ່ສຸດ.

“ວັດໂຕະໂມະ” ເມືອງປະທຸມພອນ ແຂວງຈຳປາສັກ

ວັດໂຕະໂມະ ທີ່ຕັ້ງຢູ່ບ້ານໂຕະໂໝະທ່າ, ເມືອງປະທຸມພອນ, ແຂວງຈຳປາສັກ ແມ່ນກຸ່ມສະຖານບູຮານ ທີ່ຕັ້ງຢູ່ທາງທິດຕາເວັນອອກຂອງແມ່ນໍ້າຂອງ ແລະ ຢູ່ຫ່າງຈາກວັດພູໄປທາງທິດຕາເວັນ ອອກສ່ຽງໃຕ້ 11ກມ ຮ່ອງຮອຍຂອງສະຖານບູຮານແຫ່ງນີ້ໄດ້ກະແຈກກະຈາຍຢູ່ຕາມພັກທັງສອງທີ່ໄດ້ຮັບການກໍ່ສ້າງຂື້ນຢູ່ໃນ ກາງປ່າທີ່ເຕັມໄປດ້ວຍຕົ້ນໄມ້ໃຫຍ່, ເທິງແຄມຝັ່ງຫ້ວຍນ້ຳໂຕະໂມະ ທີ່ເປັນອີກສາຂາໜຶ່ຂອງແມ່ນໍ້າຂອງ. ວັດໂຕະໂມະເປັນວັດ ແຫ່ງດຽວຂອງຊາວຂະແມທີ່ຕັ້ງຢູ່ທາງຝັ່ງຊ້າຍຂອງແມ່ນ້ຳຂອງ.