ນ້ອງ ນິດາ ໄດ້ເລົ່າສູ່ຟັງວ່າ: ກ່ອນທີ່ຈະເປັນນັກຮຽນເກັ່ງໄດ້ໃນເວລາອາຈານຂຶ້ນຫ້ອງສິດສອນນ້ອງຕ້ອງຕັ້ງໃຈຟັງຢ່າງຈົດຈໍ່ ພ້ອມທັງຈົດກ່າຍຄໍາອະທິບາຍເອົາໄວ້, ຖ້າມີຫຍັງບໍ່ເຂົ້າໃຈກໍຖາມຄືນ, ບໍ່ພຽງເທົ່ານັ້ນ ນ້ອງຍັງຕ້ອງທົບຄວນຄືນບົດຮຽນດ້ວຍຕົນເອງ, ເຮັດວຽກບ້ານທີ່ອາຈານໃຫ້ມາ ແລະ ຢູ່ໃນໂຮງຮຽນກໍຕ້ອງປະຕິບັດລະບຽບຂອງທາງໂຮງຮຽນວາງອອກ, ໜັ່ນມາໂຮງຮຽນຢ່າງບໍ່ຂາດ ໃນເວລາຂາດຮຽນມື້ໜຶ່ງຮຽນບໍ່ທັນໝູ່ ແລະ ຍັງຖືຕັດຄະແນນປະຈໍາປີອີກດ້ວຍ.
ວິຊາທີ່ ນ້ອງນິດາ ຮຽນເກັ່ງ ແມ່ນວິຊາພາສາລາວ ແລະ ວັນນະຄະດີ, ເຊິ່ງເປັນວິຊາທີ່ເຂົ້າໃຈໄວ, ຮຽນງ່າຍ ແລະ ມັກຮັກໃນການປະດິດຄິດແຕ່ງຂອງສິລະປະວັນນະຄະດີຕ່າງໆ, ແຕ່ກໍມີບາງວິຊາທີ່ເຫັນວ່າຍັງບໍ່ທັນໄດ້ດີ ໂດຍສະ ເພາະແມ່ນວິຊາຄະນິດສາດ, ຟີຊິກ ແລະ ເຄມີ ທັງໝົດແມ່ນມີຄວາມເຂົ້າໃຈຍາກ ແລະ ສະຫຼັບຊັບຫຼາຍ ໃນເວ ລາສອບເສັງປະຈໍາເດືອນຄະແນນອອກມາຖືວ່າຍັງຕໍ່າ.
ແຕ່ນ້ອງກໍພະຍາຍາມຮຽນນໍາຄົນເກັ່ງ ແລະ ຄູອາຈານເພື່ອພັດທະນາການຮຽນຂອງຕົນໃຫ້ດີຂຶ້ນ. ແຕ່ຢ່າງໃດກໍຕາມ, ນ້ອງ ນິດາ ກໍຍັງມີຄວາມໄຝ່ຝັນໃນອະນາຄົດຢາກເປັນແພດ-ໝໍ ເພື່ອຈະໄດ້ມີໂອກາດປິ່ນປົວຄົນ ໂດຍສະເພາະເດັກນ້ອຍທີ່ຊົນນະບົດ ເພື່ອໃຫ້ເຂົາເຈົ້າມີສຸຂະພາບ ດີ ແລະ ໃຫຍ່ຂຶ້ນມາກາຍເປັນຄົນເກັ່ງ, ເປັນຄົນດີຂອງພໍ່ ແມ່ ກໍຄືຂອງສັງຄົມ.
ນາງ ບົວວັນ ແມ່ຂອງນ້ອງ ນີດາ ກ່າວວ່າ: ທາງຄອບຄົວມີຄວາມດີໃຈຫຼາຍທີ່ຜົນການຮຽນຂອງລູກອອກມາດີ ແລະ ທີ່ຜ່ານມາຄອບຄົວກໍໄດ້ສົ່ງເສີມລູກໃຫ້ເຂົ້າໂຮງຮຽນຢ່າງເຕັມທີ່ ໃນເວລາເຮັດໄຮ່-ເຮັດນາ ກໍບໍ່ບອກໃຫ້ລູກຂາດໂຮງຮຽນມາຊ່ວຍວຽກຄອບຄົວ, ບໍ່ມີແນວຄິດໃຫ້ລູກອອກໂຮງຮຽນ ຫຼື ສ້າງຄອບຄົວແຕ່ຍັງໄວໝຸ່ມເທື່ອ ເພາະຢາກເຫັນອະນາຄົດ ແລະ ຄວາມໄຝ່ຝັນຂອງລູກໃຫ້ສໍາເລັດ.
ນ້ອງນິດາ ອາຍຸ 15 ປີ ນັກຮຽນຊັ້ນ ມ5 ຂອງໂຮງຮຽນ ມສສໍາພັນໄຊ ເມືອງຄູນ ແຂວງຊຽງຂວາງ ນ້ອງໄດ້ເອົາ ໃຈໃສ່ໃນການຟັງຄໍາອະທິດບາຍຂອງຄູອາຈານ ແລະ ໜັ່ນຄົ້ນຄວ້າຮໍ່າຮຽນ, ຈາກຄວາມຂະຫຍັນໝັ່ນພຽນຂອງນ້ອງຈິ່ງເຮັດໃຫ້ນ້ອງໄດ້ຄະແນນຂອງອອກມາດີ, ເຊິ່ງສະເລ່ຍຈັດອັນດັບໃນແຕ່ລະເດືອນບໍ່ຫຼຸດທີ 1 – 3 ໃນຈໍານວນນັກຮຽນ 29 ຄົນທີ່ຮ່ວມຊັ້ນຮຽນດຽວກັນ.
ແຫຼ່ງຂໍ້ມູນ: Media Laos