ກົມສົ່ງເສີມການລົງທຶນ, ກະຊວງແຜນການ ແລະການລົງທຶນເປີດເຜີຍວ່າອັນດັບຄວາມສະດວກໃນການດໍາເນີນທຸລະກິດຂອງ ສປປ ລາວ ໃນບົດງານປີ 2020 ອາດ ຈະບໍ່ບັນລຸໄດ້ລະດັບຄາດໝາຍເນື່ອງຈາກຫຼາຍສາເຫດ.
ກອງປະຊຸມເຜີຍແຜ່ບັນດານິຕິກໍາ ແລະລະບຽບການເພື່ອສະໜັບສະໜູນການຈັດຕັ້ງປະຕິບັດຄໍາສັ່ງເລກທີ 02/ນຍ ໄດ້ຈັດຂຶ້ນທີ່ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ອຸຕະແກ້ວ ແກ້ວດວງສິນ ຫົວໜ້າກົມສົ່ງເສີມການລົງທຶນ, ທ່ານນາງ ວາລີ ເວດຊະພົງ ຮອ ງປະທານສະພາການຄ້າ ແລະອຸດສະຫະກໍາແຫ່ງຊາດລາວ, ມີຄະນະກົມ, ພະແນກ, ວິຊາການ ແລະຕາງໜ້າຈາກຫົວໜ່ວຍທຸລະກິດເຂົ້າຮ່ວມ.
ທ່ານ ອຸຕະແກ້ວ ແກ້ວດວງສິນ ກ່າວວ່າ: ຈຸດປະສົງຂອງກອງປະຊຸມຄັ້ງນີ້ແມ່ນເພື່ອຮັບຟັງການເຜີຍແຜ່ນິຕິກໍາ ແລະລະບຽບການຕ່າງໆ ເພື່ອສະໜັບສະ ໜູນການຈັດ ຕັ້ງປະຕິບັດຄໍາສັ່ງເລກທີ 02/ນຍ ເປັນຕົ້ນແມ່ນ ດໍາລັດວ່າດ້ວຍການຮັບຮອງເອົາບັນຊີກິດຈະການຄວບຄຸມ ແລະກິດຈະການສໍາປະທານຂອງ ສປປ ລາວບົດແນະນໍາວ່າດ້ວຍການໃຫ້ນະໂຍບາຍສົ່ງເສີມການລົງທຶນດ້ານພາສີ ແລະອາກອນມູນຄ່າເພີ່ມສໍາລັບການນໍາເຂົ້າຂອງວິສາຫະ ກິດ;ຂໍ້ຕົກລົງວ່າດ້ວຍການສ້າງຕັ້ງ ແລະຄຸ້ມຄອງຫ້ອງ ການຜູ້ຕາງໜ້າຂອງນິຕິບຸກຄົນຈາກຕ່າງປະເທດ ແລະ ບັນດານິຕະກໍາ ແລະ ລະບຽບການອື່ນໆ ທີ່ຕິດພັນກັບການປັບຕົວຊີ້ວັດອໍານວຍຄວາມສະດວກໃນການດໍາເນີນ ທຸລະກິດ.
ປະຈຸບັນກົມສົ່ງເສີມການລົງທຶນໄດ້ສໍາເລັດລາຍງານກ່ຽວກັບບັນດານິຕິກໍາ ແລະ ລະບຽບການຕ່າງໆທີ່ໄດ້ຮັບການປັບປຸງ ແລະ ຖືກຈັດຕັ້ງປະຕິບັດໃນໄລຍະ 12 ເດືອນຜ່ານມາເພື່ອປະກອບເປັນຂໍ້ມູນໃຫ້ທີມງານເຮັດການປະເມີນຂອງກຸ່ມທະນາຄານໂລກທີ່ສໍານັກງານໃຫຍ່ໃນວໍຊິງຕັນສະຫະລັດອາເມລິກາສໍາລັບການປະເມີນໃນປີ 20 20 ໃນນັ້ນລາຍການປັບປຸງ Reform Memo ແມ່ນເອກະສານທີ່ສໍາຄັນທີ່ສຸດທີ່ສະແດງໃຫ້ເຫັນເຖິງການປັບປຸງໃນໄລຍະຜ່ານມາຊຶ່ງປະກອບມີ 2 ເນື້ອໃນສໍາຄັນຄື: Data reform ແລະ Data correction.
ຫົວໜ້າກົມສົ່ງເສີມການລົງທຶນກ່າວຕື່ມວ່າ:
ອັນດັບຄວາມສະດວກໃນການດໍາເນີນທຸລະກິດຂອງ ສປປ ລາວ ໃນບົດງານປີ 2020 ອາດຈະບໍ່ບັນລຸໄດ້ລະ ດັບຄາດໝາຍເນື່ອງຈາກຫຼາຍສາເຫດຄື: 1) ເຖິງແມ່ນວ່າຈະມີນິຕິກໍາຫຼາຍສະບັບໄດ້ຮັບການປັບປຸງ ແລະສ້າງຂຶ້ນມາໃຫຍ່ແຕ່ໃນຕົວຈິງຍັງບໍ່ທັນຖືກຈັດຕັ້ງປະຕິບັດໃນໄລຍະ 12 ເດືອນຜ່ານມາ.
ດັ່ງນັ້ນທະນາຄານໂລກຈະບໍ່ນັບເຂົ້າໃນການປະເມີນຂອງບົດລາຍງານ 2020 ແຕ່ຈະນັບເຂົ້າໃນການປະເມີບົດລາຍ ງານ 2021 ຖ້າໄດ້ຮັບການປະຕິ ບັດຢ່າງຈິງຈັງ. 2) ມີບາງຕົວຊີ້ວັດໄດ້ສ້າງ ແລະປັບປຸງບາງນິຕິກໍາທີ່ຕິດພັນກັບຂະແໜງການຕົນແລ້ວແຕ່ຈະຍັງບໍ່ມີຜົນກະທົບຕໍ່ການປ່ຽນແປງຂອງອັນດັບໃນບົດລາຍ ງານປີ 2020 ເຊັ່ນ: ຕົວຊີ້ວັດທີ 6 ການປົກປ້ອງຜູ້ລົງທຶນລາຍຍ່ອຍ.
ຕະຫຼາດຫຼັກຊັບໄດ້ອອກນິຕິກໍາຫຼາຍສະບັບຊຶ່ງນິຕິກໍາດັ່ງກ່າວນີ້ຈະມີຜົນຕໍ່ການປ່ຽນແປງຂອງອັນດັບກໍຕໍ່ເມື່ອມີບໍລິສັດຈົດທະບຽນໃນຕະຫຼາດຫຼັກຊັບຫຼາຍກວ່າ 10 ບໍລິສັດ. ນອກຈາກນີ້ຕົວຊີ້ວັດບາງຕົວອາດຈະບໍ່ມີການປ່ຽນແປງອັນດັບໃນທາງທີ່ດີຂຶ້ນໃນໄລຍະອັນໃກ້ນີ້ຍ້ອນການປັບປຸງຕົວຊີ້ວັດແມ່ນຕິດພັນກັບຂະບວນການປັບປຸງກົດໝາຍເປັນຕົ້ນຕົວຊີ້ວັດທີ 9 ການບັງຄັບໃຊ້ສັນຍາ ແລະຕົວຊີ້ວັດທີ 10 ການແກ້ໄຂບັນຫາລົ້ມລະລາຍຊຶ່ງເຫັນວ່າບັນຫານີ້ຕ້ອງໃຊ້ເວລາໃນການປັບປຸງ.
ແຫຼ່ງຂໍ້ມູນ: ໜັງສືພິມເສດຖະກິດ-ສັງຄົມ