ທີ່ນະຄອນຫຼວງວຽງຈັນ ໄດ້ມີພິທີລົງນາມການຮ່ວມມືທາງທຸລະກິດລະຫວ່າງກຸ່ມບໍລິສັດພົງສະຫວັນ ແລະກຸ່ມລັດວິສາຫະກິດອິນໂດເນເຊຍ ໂດຍໃຫ້ກຽດເຂົ້າຮ່ວມຂອງທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນ ການ ແລະການລົງທຶນ,ທ່ານ ອາລຸນແກ້ວ ກິດຕິຄຸນ ລັດຖະມົນຕີປະຈຳສຳນັກງານນາຍົກລັດຖະມົນຕີ, ທ່ານນາງ ຣິນີມາເຣຍນິ ໂຊມ່າໂນ ລັດຖະມົນຕີກະຊວງລັດວິສາຫະກິດອິນໂດເນເຊຍ, ທ່ານ ອ໊ອດ ພົງສະຫວັນ ຜູ້ກໍ່ຕັ້ງ ແລະປະທານທີ່ປຶກສາກິດຕິມະສັກກຸ່ມບໍລິສັດ ພົງສະຫວັນ, ພ້ອມດ້ວຍຮອງລັດຖະມົນຕີ, ເອກອັກຄະລັດຖະ ທູດອິນໂດເນເຊຍປະຈຳລາວ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ການຮ່ວມມືຄັ້ງນີ້ໄດ້ມີການລົງນາມບົດບັນທຶກຄວາມເຂົ້າໃຈທັງໝົດ 4 ສະບັບປະກອບມີ:
1). ບົດບັນທຶກຄວາມເຂົ້າໃຈເພື່ອຮ່ວມມືພັດທະນາໂຄງການກະສິກຳລະຫວ່າ ງບໍລິສັດໄພບູນການຄ້າຂາເຂົ້າ-ຂາອອກຈຳກັດ, ລັດວິສາຫະກິດ PT Perkebunan Nusantara,ລັດວິສາຫະກິດ PT Pupuk Indonesia ແລະ ລັດວິສາຫະກິດ PerumBulog. ຄາດຄະເນຜົນການຮ່ວມມືຄັ້ງດັ່ງກ່າວນີ້ແມ່ນຈະໄດ້ຮ່ວມທຶນຜະລິດ ແລະສົ່ງອອກສິນຄ້າກະສິກຳໄປຍັງຕະຫຼາດສາກົນເປັນຕົ້ນແມ່ນເຂົ້າ, ສາລີ, ຖົ່ວເຫຼືອງ, ອ້ອຍ ແລະອື່ນໆ ຫຼາຍກວ່າ 1 ລ້ານໂຕນຕໍ່ປີ,
2). ບົດບັນທຶກຄວາມເຂົ້າໃຈເພື່ອຮ່ວມມືພັດທະນາໂຄງການພື້ນຖານໂຄງລ່າງ ແລະ ຄົມມະນາຄົມລະຫວ່າງບໍລິສັດປີໂຕຣລ້ຽມເທຣດດິ້ງລາວມະຫາຊົນ ແລະ ລັດວິສາຫະກິດ Indonesia Railway Development Consortium ຄາດວ່າໃນເບື້ອງຕົ້ນຈະໄດ້ຮ່ວມທຶນພັດທະນາໂຄງການທາງລົດໄຟຈາກຕົວເມືອງທ່າແຂກແຂວງຄຳມ່ວນ ສປປ ລາວ ໄປຫາທ່າເຮືອຫວຸ້ງອ່າງສສຫວຽດນາມ.
ສ່ວນສັນຍາທີ 3 ແມ່ນບົດບັນທຶກຄວາມເຂົ້າໃຈເພື່ອຮ່ວມມືພັດທະນາໂຄງການອຸດສາຫະກຳບໍ່ແຮ່ລະຫວ່າງບໍລິສັດ ປີໂຕຣລ້ຽມເທຣດດິ້ງ ລາວມະຫາຊົນ ແລະ ລັດວິ ສາຫະກິດ PT Timah TBK ແລະລັດວິສາຫະກິດ Pupuk Indonesia ເພື່ອຮ່ວມກັນສຳຫຼວດແລະຂຸດຄົ້ນບໍ່ເກືອກາລີ ແລະ ບໍ່ກົ່ວ, ສັນຍາທີ 4 ແມ່ນບົດບັນ ທຶກຄວາມເຂົ້າໃຈການຊື້-ຂາຍຖ່ານຫີນລະຫວ່າງບໍລິສັດ ປີໂຕຣລ້ຽມເທຣດດິ້ງລາວມະຫາຊົນ ແລະລັດວິສາຫະ ກິດ Bukit Asam ເພື່ອສະໜອງໃຫ້ໂຮງງານໄຟຟ້າພະລັງງາຄວາມຮ້ອນຖ່ານຫີນ 2.000MW ທີ່ແຂວງຄຳມ່ວນ ສປປ ລາວ.
ທ່ານ ຈັນທອນ ສິດທິໄຊປະທານບໍລິສັດປີໂຕຣລ້ຽມເທຣດດິ້ງລາວມະຫາຊົນໃຫ້ສໍາພາດວ່າ:
ຈຸດປະສົງຂອງການລົງນາມໃນຄັ້ງນີ້ເປັນການເຊັນບົດບັນທຶກວ່າດ້ວຍການຮ່ວມມືທາງທຸລະກິດລະຫວ່າງກຸ່ມບໍລິສັດ ພົງສະຫວັນກັບກຸ່ມລັດວິສາຫະກິດຂອງປະເທດອິນໂດເນເຊຍໂດຍສືບເນື່ອງຈາກການຮ່ວມມືຂອງລັດຖະບານສອງຝ່າຍກ່ຽວ ກັບວຽກງານການຄ້າ-ການລົງທຶນ, ທັງເປັນການຜັນຂະຫຍາຍນະໂຍບາຍຂອງພັກ-ລັດຖະບານໃນການພັດທະນາເສດຖະກິດ-ສັງຄົມຂອງລາວ.
ໃນນີ້, ວຽກທໍາອິດຂອງການຮ່ວມມືແມ່ນເລີ່ມຕົ້ນຈາກກະສິກໍາແມ່ນເຂົ້າເນື່ອງຈາກເຂົ້າເປັນພື້ນຖານຂອງປະ ເທດເຮົາທີ່ປະຊາຊົນຜະລິດໄດ້ຫຼາຍແສນໂຕນລໍຖ້າການສົ່ງອອກຢູ່ພວກເຮົາກໍ່ຄິດວ່າຈະປຸກລະດົມໃຫ້ປະຊາຊົນປູກຫຼາຍໆເພື່ອຜະລິດເປັນສິນຄ້າສົ່ງອອກແລ້ວໂອກາດ ຕໍ່ໄປອາດຈະຕັ້ງໂຮງງານເພື່ອສົ່ງເສີມການຜະລິດເຂົ້າຈາກນີ້ໄປອີກ 5 ປີຂ້າງ ໜ້າຈະຕ້ອງໃຫ້ໄດ້ 1 ລ້ານໂຕນຕໍ່ປີ. ສໍາລັບການຮ່ວມມືລະຫວ່າງສອງຝ່າຍຈະເຮັດໃຫ້ທຸລະກິດການແລກປ່ຽນສິນຄ້າມີມູນຄ່າສູງຂຶ້ນເຮັດໃຫ້ການສົ່ງອອກສິນຄ້າຈາກລາວໄປຍັງອິນໂດເນເຊຍ ຫຼືນໍາເຂົ້າສິນຄ້າຈາກອິນໂດເນເຊຍມີຕະຫຼາດຮອງຮັບຢ່າງກວ້າງຂວາງທັງເປັນການເພີ່ມພູນເສດຖະກິດເຮັດໃຫ້ຈີດີພີທັງສອງປະເທດສູງຂຶ້ນ.
ແຫຼ່ງຂໍ້ມູນ: ໜັງສືພິມເສດຖະກິດ-ສັງຄົມ
