ທ່ານ ໂລຟາເຕີ ໄດ້ລາຍງານການດຳເນີນທຸລະກິດຂອງບໍລິສັດ ກໍຄື ການປູກກ້ວຍຫອມເປັນສິນຄ້າຢູ່ບ້ານກົ້ວ ເຊິ່ງບໍລິສັດໄດ້ເລີ່ມການຜະລິດປູກກ້ວຍດ້ວຍການເຊົ່າເນື້ອທີ່ດິນນຳປະຊາຊົນ 160 ກວ່າເຮັກຕາ ມີໄລຍະເຊົ່າສຳປະທານ 10 ປີ (2014-2024) ເຊິ່ງໃນການດຳເນີນທຸລະກິດ ບໍລິສັດໄດ້ຮັບການອະນຸຍາດ ເປັນຕົ້ນ ໃບທະບຽນວິສາຫະກິດ ໃບຢັ້ງຢືນການມອບພັນທະອາກອນ ໃບອະນຸຍາດດຳເນີນທຸລະກິດກະສິກຳ ແລະ ປ່າໄມ້ ໃບອະນຸຍາດນຳໃຊ້ນ້ຳ ໃບຢັ້ງຢືນພື້ນທີ່ປູກກ້ວຍຫອມເປັນສິນຄ້າສົ່ງໄປຈີນ ໃບຢັ້ງຢືນສະຖານທີ່ຫຸ້ມຫໍ່ຜະລິດຕະພັນໝາກກ້ວຍຫອມ ແລະ ອື່ນໆ ທີ່ກ່ຽວຂ້ອງຈາກພາກລັດ ກໍຄືພາກສ່ວນກ່ຽວຂ້ອງຂັ້ນກະຊວງ ພະແນກການຂັ້ນທ້ອງຖິ່ນ ແລະ ອຳນາດການປົກຄອງແຕ່ລະຂັ້ນ ໃນການດຳເນີນການຜະລິດໄດ້ນຳໃຊ້ພະນັກງານ ທັງໝົດ 220 ຄົນ ໃນນັ້ນ ມີພະນັກງານຈີນ 20 ຄົນ ເຊິ່ງການປູກກ້ວຍໄດ້ຮັບຜົນຜະລິດໝາກກ້ວຍ 6.000 ໂຕນຕໍ່ປີ ແລະ ຜົນຜະລິດຕົ້ນຕໍແມ່ນໄດ້ສົ່ງຈຳໜ່າຍໄປປະເທດຈີນ ສາມາດສ້າງລາຍຮັບໄດ້ 1,5-2 ລ້ານໂດລາສະຫະລັດ ຫຼື ປະມານ 16 ຕື້ກີບຕໍ່ປີ ສະເລ່ຍລາຍຮັບຂອງກຳມະກອນທີ່ເປັນເງິນເດືອນພື້ນຖານ 1 ລ້ານກີບຕໍ່ເດືອນ ນອກນີ້ ກຳມະກອນຍັງໄດ້ເງິນເພີ່ມຈາກຜົນຜະລິດກ້ວຍ ກິໂລລະ 400 ກີບຕື່ມອີກ ອັນໄດ້ສ້າງວຽກເຮັດງານທຳ ແລະ ສ້າງລາຍຮັບໃຫ້ແກ່ແຮງລາວທີ່ຢູ່ອ້ອມຂ້າງໂຄງການ ປະກອບສ່ວນແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າ ຕາມແນວທາງນະໂຍບາຍຂອງພັກ-ລັດຖະບານລາວວາງອອກ.
ສຳລັບການປູກກ້ວຍໃຊ້ເວລາ 8 ເດືອນ ຈຶ່ງໄດ້ຮັບຜົນຜະລິດ ແລະ ການປູກປີໜຶ່ງຈະນຳໃຊ້ຢາປາບສັດຕູພືດ 1-2 ຄັ້ງ (ອີງໃສ່ການລະບາດຂອງສັດຕູພືດ) ນອກນັ້ນ ຍັງໄດ້ນຳໃຊ້ຝຸ່ນເຄມີບຳລຸງຕົ້ນ ແລະ ໝາກ ເພື່ອໃຫ້ໄດ້ຜົນຜະລິດກ້ວຍຕາມເປົ້າໝາຍ ສ່ວນຂັ້ນຕອນການຜະລິດ ກ່ອນຈະສົ່ງອອກໄປຈີນນັ້ນ ໄດ້ນຳເອົາໝາກກ້ວຍດິບມາເຄືອບສານຮັກສາຄວາມສົດ ແລະ ໃນການໃສ່ສານເຄມີ ກໍຄື ປຸຍເຄມີ ແມ່ນອີງໃສ່ການແນະນຳຂອງພະນັກງານວິຊາການພະແນກກະສິກຳ ແລະ ປ່າໄມ້ ນວ ບໍ່ໃຫ້ມີຜົນກະທົບຕໍ່ສິ່ງແວດລ້ອມອ້ອມຂ້າງ ຕໍ່ສຸຂະພາບຂອງແຮງງານກຳມະກອນ ທີ່ເຮັດວຽກກັບບໍລິສັດ ແລະ ປະຊາຊົນເຂດອ້ອມຂ້າງ.
ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍຄະນະ ໄດ້ລົງຢ້ຽມຢາມສວນກ້ວຍຫອມຂອງບໍລິສັດ ໂຍງເຊິນ ສົ່ງເສີມການຜະລິດການຄ້າ ຂາອອກ-ຂາເຂົ້າ ຈຳກັດຜູ້ດຽວ ຢູ່ບ້ານກົ້ວ ເມືອງສັງທອງ ຖືກຕ້ອນຮັບໂດຍທ່ານ ໂລຟາເຕີ ຮອງປະທານບໍລິສັດ ໂຍງເຊິນ ສົ່ງເສີມການຜະລິດການຄ້າ ຂາອອກ-ຂາເຂົ້າ ຈຳກັດຜູ້ດຽວ ພ້ອມດ້ວຍພະນັກງານ.
ສວນກ້ວຍດັ່ງກ່າວເປັນໜຶ່ງໃນ 3 ສວນກ້ວຍທີ່ພະແນກກະສິກຳ ແລະ ປ່າໄມ້ ນວ ກະກຽມທົດລອງສ້າງເປັນສວນກ້ວຍຕົວແບບຜະລິດຕາມມາດຕະຖານທີ່ດີ (GAP) ເພື່ອເປັນຕົວແບບໃຫ້ແກ່ໂຄງການປູກກ້ວຍຂອງບໍລິສັດອື່ນໆ ທີ່ມາລົງທຶນປູກກ້ວຍຢູ່ບັນດາເມືອງຕ່າງໆໃນ ນວ ເພື່ອພ້ອມກັນປະຕິບັດຢ່າງເຂັ້ມງວດໃນການນຳໃຊ້ປຸຍ ແລະ ສານເຄມີເຂົ້າໃນການປູກ ແລະ ຂອດການຜະລິດຕ່າງໆທີ່ຈະມີຜົນກະທົບຕໍ່ສິ່ງແວດລ້ອມ ແຮງງານກຳມະກອນ ແລະ ຜູ້ບໍລິໂພກ.
ແຫຼ່ງຂໍ້ມູນ: ໜັງສືພິມວຽງຈັນໃໝ່