ປະຊາຊົນເກືອບ 150 ຄອບຄົວໃນຈໍານວນ 19 ບ້ານຢູ່ເມືອງໄຊເສດຖາ ແລະ ເມືອງໄຊທານີ, ນະຄອນຫລວງວຽງຈັນ ທີ່ຖືກຜົນກະທົບຈາກໂຄງການກໍ່ສ້າງທາງດ່ວນວຽງຈັນໝາຍເລກ 1 ແຕ່ສູນການຄ້າລາວ-ໄອເຕັກຫາບ້ານດົງໝາກຄາຍແມ່ນມີຄວາມຕ້ອງການຮັບຄ່າຊົດເຊີຍໃນຮູບແບບເປັນເງິນສົດ ຫລາຍກວ່າຮູບແບບຊົດເຊີຍເຮືອນພ້ອມທີ່ດິນ ແລະ ການເຂົ້າຮຸ້ກັບບໍລິສັດ. ໃນນີ້ເມືອງໄຊທານີມີ 7 ບ້ານ ແລະ 31 ຄອບຄົວ ແລະ ເມືອງໄຊເຊດຖາມີ 12 ບ້ານ ແລະ 115 ຄອບຄົວຖືກກະທົບຈາກໂຄງການດັ່ງກ່າວ ແລະ ການຊົດເຊີຍແມ່ນມີ 3 ປະເພດຄື: ຊົດເຊີຍດິນ, ສິ່ງປຸກສ້າງ ແລະ ຜົນລະປູກກະສິກຳ ໃນລາຄາທີ່ສົມເຫດສົມຜົນ ໂດຍອີງຕາມແຕ່ລະປະເພດຂອງທີ່ດິນ ແລະ ສິ່ງປຸກສ້າງ ແລະ ຕາມການປະເມີນຂອງລະບົບທະນາຄານ ແລະ ໜ່ວຍງານກ່ຽວຂ້ອງ ແລະ ປະຊາຊົນຜູ້ໄດ້ຮັບຜົນກະທົບສ່ວນຫລາຍແມ່ນເຫັນດີເຫັນພ້ອມໃນການກໍ່ສ້າງໂຄງການດັ່ງກ່າວ, ແຕ່ສ່ວນຫລາຍຕ້ອງການໃຫ້ບໍລິສັດຈ່າຍຄ່າຊົດເຊີຍເປັນເງິນສົດຫລາຍກວ່າການຊົດເຊີຍໃນຮູບແບບອື່ນ ຫລື ການຄິດໄລ່ເປັນທຶນເພື່ອຮ່ວມ ຮຸ້ນກັບບໍລິສັດ.
ທ່ານ ບຸນຈັນ ແກ້ວສີທຳມະ ຮອງຫົວໜ້າພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ ໃຫ້ຮູ້ວ່າ: ໂຄງການນີ້ຄາດວ່າຈະເລີ່ມລົງມືກໍ່ສ້າງໃນທ້າຍປີນີ້, ມີຄວາມຍາວ 15 ກິໂລແມັດ, ມີ 4 ຊ່ອງຈະລາຈອນ, ມີຫລາຍຈຸດເຊື່ອມຕໍ່ກັບຖະໜົນສາຍຫລັກ, ພ້ອມຈຸດລ້ຽວກັບ, ມີລະບົບແສງສະຫວ່າງ ແລະ ສິ່ງອຳນວຍຄວາມສະດວກອື່ນໆ, ໂດຍແມ່ນບໍລິສັດເອເຊຍລົງທຶນພັດທະນາ ແລະ ກໍ່ສ້າງຈໍາກັດຜູ້ດຽວຮ່ວມກັບບໍລິສັດ ນໍລິໂກ ສປ ຈີນ ໃນຮູບແບບ BOT (ກໍ່ສ້າງ, ດຳເນີນງານ ແລະ ມອບໂອນ) ເຊິ່ງຄາດວ່າຈະໃຊ້ເວລາໃນການກໍສ້າງພາຍໃນ 3 ປີ ເພື່ອຊ່ວຍແກ້ໄຂ ແລະ ຫລຸດຜ່ອນບັນຫາການສັນຈອນແອອັດໃນຕົວເມືອງ ແລະ ສ້າງຄວາມສະດວກສະບາຍໃຫ້ຜູ້ໃຊ້ລົດໃຊ້ຖະໜົນ ແລະ ມາຮອດປັດຈຸບັນຢູ່ໃນຂັ້ນຕອນການໄກ່ເກ່ຍຄ່າຊົດເຊີຍໃຫ້ມີຄວາມເປັນເອກະພາບ ແລະ ຈັດຕັ້ງປະຕິບັດຢ່າງມີປະສິດທິຜົນ.
ແຫຼ່ງຂໍ້ມູນ: ໜັງສືພິມລາວພັດທະນາ