ໃນຜ່ານມາ ລັດຖະບານໄດ້ມີໂຄງການລົງທຶນຂອງລັດເຂົ້າ ໃນການພັດທະນາພື້ນຖານໂຄງລ່າງ ເປັນຕົ້ນ ກໍ່ສ້າງຖະໜົນຫົນທາງ ຂົວ ຊົນລະປະທານ ຄອງລະບາຍນ້ຳ ສຳນັກງານອົງການຂອງລັດ ໂຮງຮຽນ ໂຮງໝໍ ແລະ ອື່ນໆຫຼາຍໂຄງການທີ່ໃຫ້ບໍລິສັດເອກະຊົນເປັນຜູ້ລົງທຶນກ່ອນ ເຮັດໃຫ້ມີຫຼາຍໂຄງການມີຜົນສຳເລັດ ແລະ ຫຼາຍໂຄງການບໍ່ສຳເລັດ ຍ້ອນຫຼາຍປັດໄຈ.
ໂດຍສະເພາະ ກໍແມ່ນບັນຫາເງິນທີ່ລັດສະໜອງໃຫ້ບໍລິສັດທີ່ລົງທຶນກ່ອນບໍ່ພຽງພໍ ເກີດມີໜີ້ສິນຄຸມເຄືອມາເປັນເວລາຫຼາຍປີ ອັນໄດ້ສ້າງຄວາມຫຍຸ້ງຍາກໃຫ້ສອງຝ່າຍ ເພື່ອແກ້ໄຂບັນຫາດັ່ງກ່າວ ນັບແຕ່ປີ 2018 ເປັນຕົ້ນມາ ລັດຖະບານກໍໄດ້ຊອກຫາຊ່ອງທາງແກ້ໄຂດ້ວຍຫຼາຍວິທີ ແລະ ຜ່ານການຈັດຕັ້ງປະຕິບັດ ມາຮອດປັດຈຸບັນ ເຫັນວ່າເລີ່ມເປັນຮູບເປັນຮ່າງຂຶ້ນມາ ສາມາດແກ້ໄຂໜີ້ສິນໄດ້ຈຳນວນໜຶ່ງ.
ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໃຫ້ສຳພາດວ່າ: ການແກ້ໄຂໜີ້ສິນພາຍໃນ ເປັນຕົ້ນ ໜີ້ສິນການລົງທຶນຂອງລັດ ໄດ້ມີຄວາມພະຍາຍາມທີ່ໄດ້ສົມທົບກັບກະຊວງ ແຜນການ ແລະ ການລົງທຶນ ເພື່ອແກ້ໄຂໜີ້ສິນທີ່ຍັງຄ້າງຄາມາຫຼາຍປີ ໃນປີ 2018 ແລະ ປີ 2019 ໄດ້ແກ້ໄຂຫຼາຍຮູບການດ້ວຍການແບ່ງທຶນປົກກະຕິໄປຊຳລະ.
ນອກນັ້ນ ຍັງໄດ້ອອກພັນທະບັດຂອງກະຊວງການເງິນ ເພື່ອໄປອວ່າຍໜີ້ທຸລະກິດທີ່ລັດເອົາຕິດໜີ້ກັບທະນາຄານ ເອີ້ນວ່າ ພັນທະບັດອວ່າຍໜີ້ສາມແຈ ແລະ ຮູບການອື່ນໆ ກໍໄດ້ພິຈາລະນາເຮັດໃຫ້ໜີ້ສິນຈຳນວນໜຶ່ງຫຼຸດລົງ ແຕ່ໂດຍລວມແລ້ວຕົວເລກໜີ້ສິນກໍຍັງສູງຢູ່ ໃນປັດຈຸບັນ ເນື່ອງຈາກບັນດາໂຄງການທີ່ກຳລັງຈັດຕັ້ງປະຕິບັດກໍຍັງສືບຕໍ່ເຮັດວຽກຕໍ່ໄປ ເຮັດໃຫ້ໜີ້ສິນເພີ່ມຂຶ້ນຕື່ມ ແກ້ໂຕເກົ່າຍັງບໍ່ແລ້ວ ໂຕໃໝ່ມາອີກ ສະນັ້ນ ພວກເຮົາຈະພະຍາຍາມຄົ້ນຄວ້າຄືນບັນຫານີ້ ເພື່ອຊອກຫາວິທີແກ້ໄຂຕື່ມໃນຕໍ່ໜ້າ.
ທ່ານ ສົມດີ ດວງດີ ຍັງໃຫ້ຮູ້ຕື່ມວ່າ:
ການແກ້ໄຂໜີ້ສິນການລົງທຶນຂອງລັດ ຂອງທຸລະກິດທີ່ລົງທຶນກ່ອນ ທີ່ລັດບໍ່ສາມາດຊຳລະໃຫ້ເຂົາເຈົ້າຕາມແຜນການ ຕາມກຳນົດເວລາແກ່ຍາວມານັ້ນ ການແກ້ໄຂໄດ້ອວ່າຍໜີ້ສາມແຈມາແຕ່ຕົ້ນປີ 2018 ຮອດປັດຈຸບັນປະມານ 3.000 ກວ່າຕື້ກີບ.
ສາມາດແກ້ໄຂໄປສ່ວນໜຶ່ງ ນອກນີ້ ໃນແຕ່ລະປີຍັງໄດ້ແບ່ງເອົາງົບປະມານທີ່ອະນຸມັດການລົງທຶນສ່ວນໜຶ່ງມາຊຳລະໜີ້ ເຊິ່ງປີ 2019 ປະມານ 400 ຕື້ກີບ ເພື່ອມາຊຳລະໜີ້ເກົ່າ ແລະ ປີ 2020 ກຳລັງເຮັດແຜນ ສ່ວນວິທີຈັດຕັ້ງປະຕິບັດໄດ້ປຶກສາຫາລືກັບກະຊວງແຜນການ ແລະ ການລົງທຶນຄະນະແກ້ໄຂໜີ້ສິນ ຈະບໍ່ແກ້ໜີ້ສິນໃຫ້ແລ້ວເປັນແຕ່ລະບໍລິສັດໄປ ແຕ່ຈະແກ້ແບບສະເລ່ຍຜູ້ມີໜີ້ຫຼາຍກໍຈະໄດ້ຫຼາຍ ຜູ້ມີໜີ້ໜ້ອຍຈະໄດ້ໜ້ອຍຕາມອັດຕາສັດສ່ວນເພື່ອຄວາມສະເໝີພາບ ຈະບໍ່ເຮັດແບບວ່າຜູ້ໄດ້ ຜູ້ບໍ່ໄດ້ ທັງນີ້ ກໍເພື່ອຫຼີກລ່ຽງບໍ່ໃຫ້ມີຫາງສຽງທີ່ວ່າ ຄົນເຈົ້າ ຄົນຂ້ອຍ ແລະ ມີຄວາມໂປ່ງໃສ ຍຸຕິທຳໃຫ້ແກ່ຫົວໜ່ວຍທຸລະກິດ.
ແຫຼ່ງຂໍ້ມູນ: ໜັງສືພິມວຽງຈັນໃໝ່
Hits: 19
