ມະຫາວິທະຍາໄລແຫ່ງຊາດໄດ້ ຈັດຝຶກອົບຮົມ ການສຶກສາພິເສດ ໃຫ້ແກ່ ຄູ-ອາຈານ ໃນ ສປປ ລາວ, ຂຶ້ນທີ່ຫ້ອງປະຊຸມ ສະຖາບັນພັດທະນາຊັບພະຍາກອນມະນຸດ ລາວ-ຢີ່ປຸ່ນ ພາຍໃຕ້ການເປັນປະທານຂອງທ່ານ ຮສ. ປອ. ອຸດົມ ພອນຄໍາເພັງ ຮອງອະທິການບໍດີ ມະຫາວິທະຍາໄລແຫ່ງຊາດ, ມີທ່ານ ນາງ ຊາມາ ໂຈບລິມ ຜູ້ອໍານວຍການສູນຊີແມວເຊັນ (SEAMEO SEN) ປະຈໍາປະເທດມາເລເຊຍ, ທ່ານ ຮສ. ປອ. ນາງ ສຸລິນທອນ ສັກລໍຄໍາ ຜູ້ອໍານວຍການ ສູນຊີແມວ ຊີອີດີ(SEAMEO CED) ປະຈໍາ ສປປ ລາວ, ມີຜູ້ຕາງໜ້າຈາກພະແນກສຶກສານະຄອນຫຼວງວຽງຈັນ, ສະມາຄົມຄົນພິການແຫ່ງຊາດ ພ້ອມດ້ວຍ ພະນັກງານ, ຄູ-ອາຈານ ອ້ອມຂ້າງ ມະຫາວິທະຍາໄລແຫ່ງຊາດເຂົ້າຮ່ວມ.
ຈຸດປະສົງ ຂອງການຝຶກອົບຮົມຄັ້ງນີ້, ກໍເພື່ອແນໃສ່ປະຕິບັດນະໂຍບາຍການສຶກສາ ກໍຄືໃຫ້ທຸກຄົນໄດ້ສຶກສາຮໍ່າຮຽນຮ່ວມກັນ ໂດຍສະເພາະແມ່ນ ນັກຮຽນຜູ້ທີ່ພິການທາງສາຍຕາ, ທາງດ້ານການຮັບຟັງ ແລະກຸ່ມເດັກນ້ອຍພິເສດ, ເພື່ອສ້າງໃຫ້ຄູ-ອາຈານການເປັນຄູຝຶກທີ່ ມີຄວາມເຂັ້ມແຂງ, ຮຽນຮູ້ວິທີການສິດສອນໜັງສື ໃຫ້ແກ່ຄົນພິການຢ່າງທົ່ວເຖິງ ແລະສາມາດຖ່າຍທອດຄວາມຮູ້ໃຫ້ແກ່ຄູ-ອາຈານທີ່ບໍ່ໄດ້ຜ່ານການຝຶກອົບຮົມໃຫ້ມີຄວາມຊໍານານໃນການສິດສອນໜັງສື ໃຫ້ແກ່ຄົນພິການ.
ການຝຶກອົບຮົມຄັ້ງນີ້ ຜູ້ເຂົ້າຮ່ວມຍັງໄດ້ຮຽນຮູ້ຜ່ານ ຄວາມຮູ້ເບື້ອງຕົ້ນກ່ຽວກັບຜູ້ທີ່ມີຄວາມບົກຜ່ອງທາງສາຍ ຕາ, ຜູ້ທີ່ມີຄວາມບົກຜ່ອງໃນຟັງ ແລະເດັກພິເສດ ອໍທິສຕິກ, ການວັດ, ການປະເມີນຜົນ ແລະສາເຫດທີ່ພາໃຫ້ເກີດຄວາມບົກຜ່ອງທາງດ້ານສາຍຕາ, ທາງດ້ານຫູຟັງ; ການຝຶກອົບຮົມແມ່ນດໍາເນີນເປັນເວລາ 3 ວັນຈິ່ງຈະໄດ້ປິດລົງ.
ແຫຼ່ງຂໍ້ມູນ: ມະຫາວິທະຍາໄລແຫ່ງຊາດ
Hits: 19
